သျှမ်းပြည်မြောက်ပိုင်း လားရှိုးမြို့အတွင်း စစ်ကောင်စီနှင့် ကိုးကန့်တပ်ဖွဲ့ (MNDAA) တို့ တိုက်ပွဲ ပြင်းထန်မှုကြောင့် ထွက်ပြေးတိမ်းရှောင်သည့် အသက် ၅၃နှစ်အရွယ် အမျိုးသမီးသည် အပြင်းဖျားနာပြီး သေဆုံးသွားကြောင်း သတင်းရရှိသည်။
အဆိုပါ အမျိုးသမီးသည် လားရှိုးမြို့မှ မန္တလေးသို့ စစ်ဘေးရှောင်ရန် သွားနေစဉ် လမ်းခရီးအတွင်း အပြင်းဖျားနာကာ ယမန်နေ့ (ဇူလိုင် ၃၀) ရက် ညနေ ၅နာရီတွင် သျှမ်းပြည်တောင်ပိုင်း ပင်လုံမြို့သို့ ရောက်ရှိလာချိန် သေဆုံးသွားကြောင်း မြတ်နှလုံးသား လူမှုကူညီရေးအသင်း မှ တာဝန်ရှိသူ တစ်ဦးက သျှမ်းသံတော်ဆင့် ကိုပြောသည်။
“နဂိုတည်းက ကျန်းမာရေး မကောင်းဘူး၊ မနေ့က ညနေ ၅ နာရီလောက် ပင်လုံကိုရောက်တယ်၊ ရောက်ရောက်ချင်းပဲ အောက်ဆီဂျင်တွေ ဘာတွေသွင်းပေးပေမယ့် ရောက်ရောက်ချင်းပဲ ဆုံးသွားတယ်၊ လားရှိုးကနေ မန္တလေးကို စစ်ရှောင်မလို့ ပင်လုံအရောက်မှာပဲဆုံးသွားတာ” ဟု ၎င်းကပြောသည်။
လက်ရှိပင်လုံမြို့တွင်း လားရှိုးမြို့မှ စစ်ဘေးရှောင်လာသူ သုံးထောင် (၃,၀၀၀)ခန့်ရှိပြီး ၊ ထိုသူအများစုသည် အိမ်ခန်း ငှားရမ်း နေထိုင် နေရကြောင်း သိရသည်။
“တချို့စစ်ရှောင်တွေကို တော်တော်လေးသနားတယ် ကလေးငယ်လေးတွေနဲ့ ဆိုင်ကယ်တွေနဲ့လေ တချို့ဆို မွေးစ တစ်လ သုံးလလေးတွေနဲ့လည်း မိုးထဲရေထဲပြေးနေရတာတွေရှိတယ်” ဟု သူကပြောသည်။
သျှမ်းသံတော်ဆင့်မှ ကောက်ယူထားသော စာရင်းများအရ လားရှိုးမှ စစ်ရှောင်လာစဉ် လမ်းခရီးတွင် သေဆုံးသွားသည့် အသက်ကြီးရွယ်အို ၅ဦးထက်မနည်း ရှိကြောင်းသိရသည်။
လက်ရှိအချိန်ထိ လားရှိုးမြို့တွင် တိုက်ပွဲများ ဆက်လက်ပြင်းထန်နေပြီး မီးလောင်ကျွမ်းမှုများ ရှိနေကြောင်း၊ ရမခ စစ်ဌာနချုပ် အတွင်း ရှော့တိုက်ဒုံးများ ကျရောက်ပေါက်ကွဲကြောင်း ဒေသခံများပြောပြချက်အရသိရသည်။
ပြီးခဲ့သည့် ဇူလိုင် ၂၈ ရက်နှင့် ၂၉ ရက်နေ့တွင် လားရှိုးရှိ ဆက်သွယ်ရေးတပ်ရင်း၊ အမှတ် (၇၀၀၅) သံချပ်ကာ တပ်ရင်း၊ အမှတ် (၂၄၂) စစ်လက်နက်တပ်ခွဲ၊ လားရှိုးဘူတာ၊ တပ်မတော် ဂေါက်ကွင်း တို့ကို တိုက်ခိုက် သိမ်းပိုက်ခဲ့ကြောင်း ကိုးကန့် ပူးပေါင်းတပ်က ထုတ်ပြန်ထားသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments