သျှမ်းပြည် သီ‌ပေါမြို့နယ်တွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ တိုက်ပွဲပြင်းထန်နေပြီး နှစ်ဘက်အပြိုင် စစ်အင်အားများ ဖြည့်တင်းနေကြောင်း စုံစမ်းသိရသည်။

ယမန်နေ့ (ဇူလိုင်လ ၂၈ ရက်) မှစတင်ပြီး သီပေါမြို့နယ် နောင်ကော်ကျေးရွာတွင် အခြေစိုက်ထားသည့် စစ်ကောင်စီ ခြေမြန်တပ်ရင်း ခမရ-(၁၄၇) ကို ကိုးကန့်တပ်ဖွဲ့ MNDAA တို့က စတင်ထိုးစစ်ဆင်၍ ယနေ့အချိန်ထိ တိုက်ပွဲပြင်းထန်နေကြောင်း စစ်ရေးသတင်း အရင်းအမြစ်တစ်ဦးက ပြောသည်။

“မိုင်းရယ်ကနေ တက်လာတဲ့ ကိုးကန့်တပ်တွေက အဲ့ဒီ ၁၄၇ တပ်ကို ထိုးစစ်ဆင်နေတာ။ ဒီနေ့ထိ တိုက်ပွဲ ဖြစ်နေတယ်။ အသံတွေ ကြားနေတုန်းပဲ။ ပြီးတော့ စစ်ကောင်စီရဲ့ သံချပ်ကာကား တွေရှိတဲ့ နားကန်ရွာကိုလည်း ဝင်တိုက်နေတာ။ ဒီနေ့တော့ အဲ့ဒီသံချပ်ကာကားတွေကတော့ နောင်ကော် ကျေးရွာမှာ စုနေပြီ။ ခုထိတော့ အဲ့တပ်ကို မသိမ်းနိုင်သေးပါဘူး”ဟု ၎င်းစစ်ရေး သတင်းရင်းမြစ်က သျှမ်းသံတော်ဆင့်ကို ပြောသည်။

ထို့အပြင် ယနေ့ (ဇူလိုင်လ ၂၉ ရက်) တွင်လည်း စစ်ကောင်စီတပ်သည် ကားကြီးများဖြင့် လူအင်အား (၁၀၀၀) ခန့်ကို မိုင်းကိုင်မြို့ မှ တန့်ယန်းမြို့သို့ ဦးတည်၍ ချီတက်နေကြောင်း တပ်တွင်းသတင်းရင်းမြစ်က ဆိုသည်။

ယမန်နေ့ (ဇူလိုင်လ ၂၈ ရက်) တွင် ကိုးကန့်တပ်ဖွဲ့ MNDAA သည် မိုင်းရယ်မြို့ မှ နမ့်လန်မြို့ အနီးတဝိုက်ထိ နေရာယူထားပြီး သီပေါမြို့နယ် နားမခေါ်‌ကျေးရွာ၊ ကောင်းမူးကျေးရွာ၊ ဟိုနားကျေးရွာတို့တွင် စစ်အင်အားများ ဖြည့်တင်းထားကြောင်း ၎င်းက ဆက်ပြောသည်။

ယခုတိုက်ပွဲဖြစ်ပွားနေသည့် နောင်ကော်ကျေးရွာသည် သီပေါမြို့နှင့် ၁၄ မိုင်ခန့်သာ ကွာဝေးပြီး ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA ထိန်းချုပ်သည့် နယ်မြေဖြစ်ကြောင်း သိရသည်။

လက်ရှိ သီပေါမြို့နယ်တွင် ကိုးကန့်တပ်ဖွဲ့ MNDAA ၊ သျှမ်းတပ် SSPP/SSA ၊ တအာင်း(ပလောင်) အမျိုးသားလွတ်မြောက်ရေး တပ်မတော် TNLA တို့ သွားလာလှုပ်ရှားနေကြောင်း သိရသည်။