သျှမ်းပြည် လားရှိုးမြို့ပေါ်သို့ စစ်ကောင်စီတပ်က လေကြောင်းဗုံးကြဲ တိုက်ခိုက်ခဲ့ခြင်းကြောင့် သီရိမင်္ဂလာ မန်ဆူသျှမ်းကျောင်းတွင် ခိုလှုံနေသည့် စစ်ဘေးရှောင် အမျိုးသမီး ၃ ဦးအပါအဝင် (၅) ဦး ထိခိုက်သေဆုံးခဲ့ကြောင်း စုံစမ်းသိရသည်။
ယမန်နေ့ (ဇူလိုင်လ ၂၈ ရက်) နံနက်ပိုင်းတွင် လားရှိုးမြို့ရှိ သီရီမင်္ဂလာ မန်ဆူဘုန်းကြီးကျောင်း အနီးသို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ရပ်ကွက်(၅) ဝမ်ကောင်းဘက်မှ ထွက်ပြေးတိမ်းရှောင်လာသည့် စစ်ဘေးရှောင် အမျိုးသမီး ၃ ဦးအပါအဝင် (၅) ဦး ပွဲချင်းပြီး သေဆုံးသွားပြီး (၇) ဦးထက်မနည်း ထိခိုက်ဒဏ်ရာ ရရှိခဲ့ကြောင်း လားရှိုးဒေသခံများထံမှ သိရသည်။
“မန်ဆူသျှမ်းကျောင်း ဇရပ်ထဲက စစ်ရှောင်တွေကို ထိတယ်၊ အဒေါ်ကြီး ၃ ယောက်နဲ့ အမျိုးသား ၂ ယောက်ကတော့ ပွဲချင်းပြီး ဆုံးသွားတာ။ ဘေးနားက တခြားစစ်ရှောင်တွေလည်း ဒဏ်ရာရတာရှိတယ်။ ဝမ်ကောင်းဘက်ကနေ ဘုန်းကြီးကျောင်းထဲ တည်းနေပြီး ဘယ်မှ မသွားနိုင်တဲ့ စစ်ရှောင်တွေ ကျန်နေတာ”ဟု လားရှိုးမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ယမန်နေ့ နံနက်ပိုင်းအထိ လားရှိုးမြို့ သီရိမင်္ဂလာ မန်ဆူသျှမ်းကျောင်းတွင် လားရှိုးမြို့ ရပ်ကွက် (၅)ဘက် ဝမ်ကောင်းကျေးရွာအုပ်စုမှ စစ်ဘေးရှောင် (၈၀) ကျော် ကျန်ရှိနေပြီး ၎င်းတို့ကို ဘေးလွတ်ကင်းရာ စစ်ဘေးရှောင်စခန်းသို့ စတင်ရွှေ့ပြောင်းပေးနေကြောင်း စစ်ဘေးရှောင် ကူညီပေးသူများထံမှ သိရသည်။
“ဦးပဉ္ဇင်းနဲ့ကိုရင် ၄၃ ပါးရယ်၊ နောက်ပြီး ကပ္ပိယတွေနဲ့ဆိုရင် စုစုပေါင်း ၆၀ ကျော်လောက်ရှိမယ်။ ကျောင်းဝင်းထဲ ဗုံးဆံ မကျခင်ရက်က အားလုံးထွက်နိုင်ခဲ့တယ်။ ကျောင်းမှာ ကျန်တာကတော့ ရပ်ကွက်(၅) ဝမ်ကောင်းဘက်ကနေ ဘုန်းကြီးကျောင်းကို ရှောင်လာတဲ့ စစ်ဘေးရှောင် ၈၀ ကျော် ကျန်တာ”ဟု လားရှိုးမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
အလားတူ မန်ဆူကျောင်းထိုင်ဆရာတော် ဒေါက်တာဘဒ္ဒန္တ ပုညနန္ဒသည်လည်း ဇွန်လပိုင်းမှ စတင်၍ သျှမ်းပြည်တောင်ပိုင်းသို့ ကြွရောက်ပြီး ဝါဆိုဝါကပ်နေကြောင်း သိရသည်။
“ဗမာစစ်သားနဲ့ ကိုးကန့်တပ်နဲ့က မန်ဆူဘုန်းကြီးကျောင်းနားမှာ ကပ်လျက်ရှိနေတာ လမ်းမကြီးပဲ ခြားတယ်။ လက်နက်ကြီးနဲ့ကော သေနတ်အသေးနဲ့ကော ပစ်နေတုန်းပဲ။ မြို့ထဲ လမ်းပေါ်မှာ ဒဏ်ရာနဲ့သေနေတဲ့ အလောင်းတွေလည်း ရှိတယ်၊ အခု ကြာကန်သုဿာန် ပို့လို့မရတော့ အကုန်ဒုက္ခရောက်နေတယ်”ဟု လားရှိုးမြို့ စစ်ဘေးရှောင်ကူညီနေသူတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့ပေါ်တွင် ငွေကြေးမတတ်နိုင်ဘဲ ထွက်ပြေးတိမ်းရှောင်ရန် ခက်ခဲသည့် ပြည်သူများမှာ နှစ်ဘက်တိုက်ပွဲအတွင်း ကြားညှပ်ပိတ်မိနေပြီး စားနပ်ရိက္ခာနှင့် ဆေးဝါးအကူအညီ လိုအပ်လျက်ရှိကာ တိုက်ပွဲဆက်လက် ပြင်းထန်လာပါက ထိခိုက်သေဆုံးမှု ထပ်မံမြှင့်တက်လာနိုင်ကြောင်း ၎င်းအမျိုးသားက ဆက်ပြောသည်။
ယမန်နေ့ (ဇူလိုင်လ ၂၈) ရက်တွင် လားရှိုးမြို့ ရပ်ကွက် (၁၂) လားရှိုးကြီးဘက်တွင် စစ်ကောင်စီတပ်နှင့် ကိုးကန့်တပ်ဖွဲ့တို့ တိုက်ပွဲပြင်းထန်ခဲ့ပြီး လားရှိုးအကျဉ်းထောင်ကို ဖွင့်ပေးလိုက်ခြင်းကြောင့် အကျဉ်းကျခံနေရသူအားလုံး လွတ်မြောက်သွားကြောင်း ထောင်နှင့် နီးစပ်သည့် သတင်းရင်းမြစ်က အတည်ပြုသည်။
လားရှိုးမြို့ရှိ တိုင်းရင်းသားပေါင်းစုံ၏ လိုလားချက်အရဟုဆိုကာ ဇူလိုင်လ ၂၇ ရက် ညပိုင်းက ‘ဝ’ တပ်ဖွဲ့ UWSA ဝင်ရောက်လာပြီးနောက် လားရှိုးမြို့ကို တရားမျှတစွာ အုပ်ချုပ်မည်ဖြစ်ကြောင်း ကိုးကန့်တပ်ဖွဲ့က ယမန်နေ့ (ဇူလိုင်လ ၂၈ ရက်)တွင် ထပ်မံထုတ်ပြန်ထားသည်။
Leave a Comments