သျှမ်းမြောက်၊ လားရှိုးမြို့၊ ရပ်ကွက်ကြီး (၁၂) အနီးတွင် တည်ရှိသည့် လားရှိုးအကျဥ်းထောင်ကို ယနေ့ (ဇူလိုင်လ ၂၈ ရက်) နံနက်ပိုင်းက ဖွင့်ပေးလိုက် သဖြင့် အကျဉ်းကျခံနေသူ အားလုံး လွတ်မြောက်သွားပြီဖြစ်ကြောင်း ထောင်နှင့်နီးစပ်သည့် သတင်းရင်းမြစ်က အတည်ပြုပြောသည်။
ယနေ့ နံနက်ပိုင်းက အကျဉ်းထောင်အနီး တိုက်ပွဲ ပြင်းထန်ခဲ့ပြီး အကျဉ်းထောင်တွင်း လက်နက်ကြီး ကျရောက် ပေါက်ကွဲမှုများ ရှိခဲ့သဖြင့် ထောင်ကို ဖွင့်ပေးလိုက်ခြင်းဖြစ်သည်ဟု ကြားသိရကြောင်း ၎င်းကဆိုသည်။
“ထောင်ပိုင်ကြီးနဲ့ ထောင်ဆရာဝန်တွေက မနေ့ကတည်းက ထွက်သွားကြပြီ။ ကျန်ခဲ့တဲ့ အရာရှိငယ်တွေက ထောင်ဖွင့်ပေးလိုက်တာလို့ သိရပါတယ်” ဟု ၎င်းကဆိုသည်။
လားရှိုးထောင်တွင် ထောင်နှင့်ချီသည့် အကျဉ်းသားများရှိနေပြီး နိုင်ငံရေး အကျဉ်းသား ၄၀၀ ခန့်ရှိရာ အဆက်အသွယ်ရရှိရန် ကြိုးစားနေဆဲဖြစ်ကြောင်း အခြား သတင်းရင်းမြစ်က ပြောဆိုသည်။
ယနေ့ နံနက်ပိုင်းက အကျဉ်းထောင် အနီးနေ ပြည်သူများ ဘေးလွတ်ရာ ထွက်ပြေးမှုများ ရှိခဲ့ပြီး ထောင်မှ လွတ်မြောက်လာသူများ အနေဖြင့် တိုက်ပွဲ ဖြစ်ပွားနေသည့် လားရှိုးမြို့မှ မည်သို့ ထွက်ခွာသည် ဆိုသည်ကိုမူ စုံစမ်းမေးမြန်းနေဆဲ ဖြစ်သည်။
လားရှိုးမြို့ရှိ တိုင်းရင်းသားပေါင်းစုံ၏ လိုလားချက်အရဟုဆိုကာ ယမန်နေ့ ညပိုင်းက ဝ တပ်ဖွဲ့ ဝင်ရောက်လာပြီးနောက် လားရှိုးမြို့ကို တရားမျှတစွာ အုပ်ချုပ်မည်ဖြစ်ကြောင်း ကိုးကန့်တပ်ဖွဲ့က ယနေ့ ထုတ်ပြန်ထားသည်။
လားရှိုးမြို့စောင့်တပ် ဖြစ်သည့် ခလရ (၆၈) တပ်နှင့် ဆင်တောင်တပ်စခန်းအား တိုက်ခိုက်သိမ်းပိုက်ပြီး မြို့ကို တည်ငြိမ်အောင် ထိန်းချုပ်နေကြောင်း ကိုးကန့်တပ်ဖွဲ့က ယနေ့ ထုတ်ပြန်ထားသည်
Leave a Comments