သျှမ်းမြောက်၊ လားရှိုး တိုက်ပွဲ အတွင်း စစ်မြေပြင်တွင် ကြီးကြပ် ကွက်ကဲနေသည့် ရမခ ဒုစစ်တိုင်းမှူး ဗိုလ်မှူးချုပ် တင်းထွန်းအောင် ဒဏ်ရာပြင်းထန် သဖြင့် ဆေးကုသမှု ခံယူနေရသည်ဟု စစ်ရေးသတင်းရင်းမြစ်က ယနေ့ (ဇူလိုင်လ ၂၈ ရက်) တွင် ပြောသည်။

ပြီးခဲ့သည့် ဇူလိုင်လ ၂၆ ရက်နေ့က လားရှိုးမြို့တွင်းရှိ မြို့တော်ခန်းမတွင် အထိုင်ကျတပ်စွဲ၍ စစ်မြေပြင်ကို ကွက်ကဲနေစဥ် ကိုးကန့်တပ် ကြဲချသည့် ဒရုန်းဗုံးထိမှန်သဖြင့် ဗိုလ်မှူးချုပ်တင်ထွန်းအောင် နှင့် ပြည်နယ်အဆင့် ရဲအရာရှိ တစ်ဦး ပြင်းထန် ဒဏ်ရာရခဲ့ကြောင်း ၎င်းကဆိုသည်။

“ဒုတိုင်းမှူး မကျဘူး။ သူနဲ့ ရဲမှူး တစ်ယောက် ဒဏ်ရာရတယ်။ ဒဏ်ရာပြင်းထန်တယ်လို့ သိရတယ်။ အခု မေမြို့စစ်ဆေးရုံမှာ ကုသနေတယ်လို့ သိရပါတယ်။ ရမခ ဆေးတပ်က ကျသွားပြီ ဆိုတော့။ သူဒဏ်ရာရပြီးတော့ ခန်းမလည်း ကျသွားပါပြီ” ဟု ၎င်းကဆိုသည်။

ယမန်နေ့က လားရှိုးမြို့ သိမ်းပိုက်မှု အခြေအနေကို ကိုးကန့်တပ်က ရုပ်သံနှင့်တကွ ထုတ်ပြန်ရာတွင် လက်နက် ထိမှန် ထားသဖြင့် မြို့တော်ခန်းမ ခေါင်မိုးများ ပွင့်ထွက်နေသည်ကို တွေ့ရသည်။

လက်ရှိ လားရှိုးခံစစ်ကို ရမခ တိုင်း စစ်ဦးစီးအရာရှိချုပ်က ဦးစီးကွက်ကဲ နေသည်ဟု သိရသည်။

ယနေ့ မနက်ပိုင်း ဖုန်းနှင့် အင်တာနက်လိုင်းများ ပြတ်တောက်နေပြီး လားရှိုးမြို့တွင်း လူသူကင်းမဲ့နေကာ တိုက်ပွဲသံများ ကြားနေရဆဲ ဖြစ်သည်ဟု မြို့ခံ တစ်ဦးက ပြောသည်။

“ဖုန်းက စစ်တပ် MEC ဖုန်းလိုင်းရသေးတယ်။ တချို့ အမြင့်ပိုင်းတွေမှာတော့ MPT ရတယ်။ MPT တာဝါတိုင် ထပ်ကျိုးတယ်လည်း ကြားတယ်။ ထောင်ဘက် တိုက်ပွဲပြင်းနေတယ်လည်း ကြားတယ်” ဟု ၎င်းကရှင်းပြသည်။

ယမန်နေ့က လားရှိုးထောင် ဆရာဝန်များနှင့် ထောင်အာဏာပိုင် တချို့ လားရှိုးမှ တောင်ကြီးသို့ ကားဖြင့် ထွက်ပြေးသွားသဖြင့် စစ်တပ် အသုံးပြုနေသည့် သျှမ်းမြောက်-သျှမ်းတောင် လမ်းမ ကောင်းမွန်နေဆဲဟု သုံးသပ်နိုင်ကြောင်း CDM ဗိုလ်ကြီးဇင်ယော်က ဆိုသည်။

မြို့ကို အလုံးစုံ ထိန်းချုပ်ထားပြီဟု ကိုးကန့်တပ်က ကြေညာထားသော်လည်း လားရှိုး ရမခ စစ်တိုင်းဌာနချုပ်၊ AT ဝန်တင်တပ်၊ အမှတ် (၆၀၀၇) တင့်ကားတပ်၊ အမှတ် (၇) အဆင့်မြင့် ဆက်သွဘ်ရေးတပ်၊ လျှပ်စစစ်နှင့် အင်ဂျင်နီယာတပ်၊ အမှတ် (၃၄၆) အမြောက်တပ်၊ အမှတ် (၆၂၆) ထောက်ပို့တပ်၊ လားရှိုးလေတပ်ဆွယ်တို့ ကျန်ရှိနေသေး သဖြင့် တိုက်ပွဲများ ဆက်လက် ပြင်းထန်နိုင်ကြောင်း သိရသည်။