သျှမ်းပြည်မြောက်ပိုင်း သိန္နီမြို့တွင် ယနေ့ (ဇူလိုင် ၂၈)ရက် နံနက် ၂နာရီခွဲဝန်းကျင်တွင် စစ်ကောင်စီ က လေကြောင်းဖြင့် ဗုံးကြဲသဖြင့် မြေးအဖွား (၂)ဦး သေဆုံးခဲ့ကြောင်း သတင်းရရှိသည်။
ယနေ့ (ဇူလိုင် ၂၈)ရက် နံနက် ၂နာရီခွဲဝန်းကျင်တွင် သိန္နီမြို့ ကွမ်လုံလမ်းခွဲ အနီးတွင် စစ်ကောင်စီမှ လေကြောင်းဖြင့် ဗုံးကြဲသဖြင့် အသက် ၆၀အရွယ် အမျိုးသမီးနှင့် အသက် ၄နှစ်အရွယ်ရှိ ယောက်ျားလေး တစ်ဦး ပွဲချင်းပြီးသေဆုံးခဲ့ပြီး၊ ၎င်းမိသားစုဝင်များလည်း ထိခိုက်ဒဏ်ရာရရှိကာ ကွတ်ခိုင်မြို့ရှိ ပြည်သူ့ဆေးရုံသို့ ပို့ဆောင်ထားကြောင်း ဒေသခံ အမျိုးသမီး တစ်ဦးက သျှမ်းသံတော်ဆင့်ကိုပြောသည်။
“ ဒီမနက် ၂နာရီလောက်မှာ လေယာဥ်နဲ့လာဝဲတယ်။ ၂နာရီခွဲ လောက်မှာ ဗုံး ၂လုံးချသွားတာပဲ။ သူတို့က ချချင်တဲ့နေရာချနေကြတာ။ အိမ်ကတော့ ရစရာမရှိတော့ဘူး။ အရင်ရက်တွေက မြို့တွင်းထဲချတော့၊ မြို့တွင်းအိပ်ရမှာ စိတ်မချလို့ဆိုပြီး မြို့ပြင်သွားအိပ်မှပဲ မြို့ပြင်မှာ ချပြန်တာပေါ့” ဟု သိန္နီမြို့တွင် ကျန်ရှိနေသည့် ဒေသခံအမျိုးသမီးက ဆိုသည်။
လက်ရှိ စစ်ကောင်စီ ၏ လေကြောင်းဗုံးကြဲမှုသည့် ခန့်မှန်းရခက်ကြောင်း၊ အချိန်မတော် ပြုလုပ်မှုကြောင့် ပြည်သူများထိခိုက်မှုများကြောင်း လည်း ၎င်းကဆိုသည်။
“ ခုက ခန့်မှန်းမရပါဘူး၊ ပစ်ချင်တဲ့အချိန်၊ ပစ်ချင်တဲ့နေရာ ပစ်နေကြတော့ ရှောင်လည်းထိကြတာပဲ၊ ကံတရားပေါ့။ ပြေးဖို့ကြတော့ တာချီလိတ်ကို ကားခ ၇သိန်းလောက်ဆိုတော့ ပိုက်ဆံရှိတဲ့သူတွေပဲ သွားတာများတယ်” ဟု ၎င်းအမျိုးသမီးက ဆိုပြန်သည်။
လွန်ခဲ့သည့် ဇူလိုင် ၂၅ရက် ညနေ ၅နာရီခွဲတွင်လည်း ကိုးကန့်တပ်ဖွဲ့ (MNDAA) သိမ်းပိုက်ထားသည့် သိန္နီမြို့ကို စစ်ကောင်စီ က လေကြောင်းဖြင့် ဗုံးကြဲခြင်း၊စက်သေနတ်ဖြင့် ပစ်ခတ်ခြင်းတို့ကို ပြုလုပ်ခဲ့ကြောင်း သိရသည်။
ဇူလိုင် ၁၈ရက် ည ၄နာရီတွင်လည်း သိန္နီမြို့ရှိ မြို့မစျေးကို စစ်ကောင်စီ က လေကြောင်းဖြင့် ဗုံးကြဲခဲ့ပြီး လူအသေအပျောက် (၁၀)ဦးခန့်ရှိပြီး ဒဏ်ရာရရှိသူ (၂၀)ဦး ဝန်းကျင်ရှိကြောင်းသိရသည်။
ထို လေကြောင်းဗုံးကြဲမှုကြောင့် ပြည်သူများလည်း စျေးထွက်ရောင်းချခြင်း မလုပ်ရဲတော့သကဲ့သို့ သိန္နီမြို့တွင်း ကျန်ရှိသူများသည် စားဝတ်နေရေးအတွက် ပိုပြီး ကြပ်တည်းလာကြောင်း ဒေသခံများပြောပြချက်အရသိရသည်။
Leave a Comments