“၁၀၂၇ စစ်ဆင်ရေး” ဒုတိယလှိုင်းစတင်လာပြီးနောက် သျှမ်းပြည်မြောက်ပိုင်း မြို့အချို့တွင် ဘဏ်များပိတ်ထားကြပြီး KPay ဖြင့် ငွေသားထုတ်ယူ၍မရသဖြင့် စစ်ဘေးရှောင်များကို ကူညီရန်ခက်ခဲနေကြောင်း စစ်ဘေးရှောင်ကူညီသူများက ပြောသည်။

ဇွန်လ ၂၅ ရက်မှစပြီး နောက်ချို၊ ကျောက်မဲ၊ မိုးကုတ်၊ မိုးမိတ်၊ သိန္နီနှင့် လားရှိုးမြို့တို့တွင် တိုက်ပွဲဖြစ်ပွား လာပြီးနောက် ထိုမြို့ရှိဘဏ်များအားလုံး နီးပါးပိတ်ထားရခြင်းဖြစ်သည်။

“မြို့ထဲမှာလည်းဘာမှမရှိတော့ဘူး။ ငွေထုတ်ပေးမဲ့သူလည်းမရှိတော့ဘူး။ ဘဏ်တွေလည်း ပိတ်ထားတယ်။ တိုက်ပွဲစဖြစ်ကတည်းဘဲ ပိတ်ထားတာ တစ်လကျော်နေပြီ။ Kpay ကလည်း ထုတ်ရခက်တယ်လေ။ ” ဟု စစ်ဘေးရှောင်များကို ကူညီပေးနေသည့် ကျောက်မဲမြို့ဒေသခံ အမျိုးသားတစ်ဦးကပြောသည်။

ထိုသို့ ဘဏ်များပိတ်ထားသောကြောင့် စစ်ဘေးရှောင်များအတွက် အလှူငွေများ လက်မခံနိုင်သဖြင့် စစ်ဘေးရှောင်များကိုလည်း သွားရောက်မလှူဒါန်းနိုင်တော့ကြောင်း ၎င်း ထပ်လောင်းပြောသည်။

“စစ်ဘေးရှောင်များအတွက် အလှူတော်များလက်မခံတော့ဘူး။ ဘာကြောင့်လဲဆိုတော့ ကိုယ်ကိုယ်တိုင်ကလည်း စစ်ဘေးရှောင်နေရပြီ။ KBZ Pay လည်းထုတ်ရခက်၊ သွားလှူပေးဖို့လည်းခက်တော့။ လက်ခံပြီးသားဟာတော့ အားလုံးဆောင်ရွက်ပေးပြီးသွာပါပြီ။ နောက်ထပ်တော့ မသွားလှူပေးနိုင်၊ မဆောင်ရွက်နိုင်လို့ စိတ်တော့မကောင်းဖြစ်မိတယ်” ဟု ထပ်လောင်းပြောသည်။

လက်ရှိ “၁၀၂၇ စစ်ဆင်ရေး” ဒုတိယလှိုင်းကြောင့် လားရှိုး၊ သိန္နီ၊ ကျောက်မဲ၊ နောင်ချို၊ မိုးကုတ်နှင့် မိုးမိတ်မြို့တွင် ထောင်နှင့်ချီရှိ စစ်ဘေးရှောင်များ ထွက်ပြေးတိမ်းရှောင်နေရသည်။

စစ်ဘေးရှောင် အများစုမှာ သျှမ်းပြည်တောင်ပိုင်း တောင်ကြီးမြို့၊ ညောင်ရွှေမြို့သို့ တိမ်းရှောင်သွားနိုင်ကြသော်လည်း တချို့တွင် ငွေရေးကြေးရေးအခက်ခဲကြောင့် မတိမ်းရှောင်နိုင်ကာ တိုက်ပွဲကြား ပိတ်မိနေလျက်ရှိသည်။