သျှမ်းပြည် တောင်ပိုင်း မိုးဗြဲမြို့တွင် အခြေစိုက်နေသည့် စစ်ကောင်စီတပ် ခြေမြန်တပ်ရင်း-(ခမရ ၄၂၂) သည် မိုးဗြဲ ရေကာတာကို အဆင်အခြင်မဲ့ ဖွင့်ချလိုက်သဖြင့် ရေကြီးမှုဖြစ်ကာ ဒေသခံတစ်ထောင် ရေဘေးသင့် နေကြောင်း သတင်းရရှိသည်။
ထိုမိုးဗြဲဆည် ဖွင့်ချမှုကြောင့် ဘီလူချောင်း၏ ဘေးတစ်လျှောက်ရှိ စပါးခင်းအများစု (ဧက ၁၀၀၀ ခန့်)သည် ရေကြီးရေလျှံဖြစ်ပွားမှုကြောင့် ရေများနှစ်မြုပ်ပြီး ပျက်စီးဆုံရှုံးခြင်းများကြုံတွေ့နေရကာ ဒေသခံ ၁၀၀၀ ခန့် ရေးဘေး ထပ်မံကြုံတွေ့နေရကြောင်း အသက် ၃၀ ဝန်းကျင် ဒေသခံအမျိုးသာတစ်ဦးက သျှမ်းသံတော်ဆင့်ကို ပြောသည်။
“စစ်တပ်က ဆည်ကရေးကို ဖွင့်ချ လိုက်တာ၊ရေတွေတော်တော်တက်သွားတယ် လယ်တော်တော်များများလည်း ရေမြုပ်ကုန်ပြီ၊အိမ်တွေတေ့ ဒီနေ့ထိတော့ လာမှမဖြစ်သေးဘူး။နောက် ၂ ရက်လောက်နေရင်တော့ မပြောတက်ဘူး စိုးရိမ်ရမှာ။”ဟု အသက် ၃၀ ဝန်းကျင် ဒေသခံ အမျိုးသားတစ်ဦးကပြောသည်။
ထိုရေမြင့်တက်မှုကြောင့် မိုးဗြဲအင်း၊ ဖာလိုင်အင်း၊ ဘုရားနီကျေးရွာ၊ ဖောင်းတောကျေးရွာနှင့် ဘုရားဖြူကျေးရွာ တို့တွင် ရေကြီးမှု ဖြစ်ပေါ်လာနိုင်ပြီး လယ်ယာစိုက်ပျိုးရေးလုပ်ကိုင်နေ ကြသော ဒေသခံ တောင်သူလယ် သမားများ နှင့် ပြည်သူများ အတိဒုက္ခရောက်စေရန် လုပ်ဆောင်ခြင်းဖြစ်ကြောင်း ကရင်နီပြည်နယ် ကြားကာလ အုပ်ချုပ်ရေး ကောင်စီ IEC က သုံးသပ်ပြောဆိုသည်။
လက်ရှိမှာ မိုးဗြဲမြို့၊ ဘုရားဖြူကျေးရွာ၊ ဘုရားနီကျေးရွာ နှင့် ဖောင်းတောကျေးရွာတို့ ရေဘေးသင့်ပြီး၊ ဘီလူးချောင်းဘေးရှိ ဒေသခံနေအိမ်များလည်း ရေကြီးမှုကြုံနေရသည်။
“ဘယ်နှရွာလောက် ရေဘေးသင့်လဲ ဆိုတော့ လက်ရှိအထိတော့ မိုးဗြဲ၊ ဘုရားဖြူ၊ ဘုရားနီ၊ ဖောင်းတော နောက်ပြီး လယ်ကွက်တွေ၊ ဘီလူးချောင်းဘေးမှာရှိနေတဲ့ ဒေသခံတွေက လောလောဆယ်တော့ စစ်ဘေးရှောင်နေကြ ရပါတယ်။ အခု ရေကြီးလို့ ရှောင်နေရတာ ၁၀၀၀ နီးပါးရှိတယ် ”ဟု မိုးဗြဲစစ်ဘေးရှောင်ကော်မတီ တာဝန်ရှိသူတစ်ဦးကပြောသည်။
ယမန်နေ့ (ဇူလိုင်လ ၂၅ )ရက်မှ စတင်၍ ၃ ရက်အတွင်း ရေများထပ်မံမြင့်တက် လာနိုင်ပြီး လွိုင်ကော်မြို့ နှင့် အနီးတဝိုက်ရှိ လူနေရပ်ကွက်များ နှင့် ကျေးရွာများတွင်လည်း ရေကြီရေလျှံမှု အရေးပေါ်အခြေနေရှိလာ နိုင်ကြောင်း IEC သတိပေးထားသည်။
Leave a Comments