သျှမ်းပြည်မြောက်ပိုင်း သီပေါမြို့နယ် နောင်ကော်ကြီးကျေးရွာ အတွင်း စစ်ကောင်စီနှင့် ကိုးကန့်တပ် (MNDAA) တို့ သည် ယနေ့ (ဇူလိုင် ၂၆)ရက် နေ့လည်ပိုင်းမှစတင်ကာ တိုက်ပွဲဖြစ်ပွားနေကြောင်း သတင်းရရှိသည်။
အဆိုပါ သီပေါမြို့နယ် နောင်ကော်ကြီးကျေးရွာအတွင်း အရှေ့မြောက်ပိုင်းတိုင်စစ်ဌာနချုပ် လက်အောက်ခံ စစ်ကောင်စီ၏ အမှတ် (၁၄၇) ခြေလျင်တပ်ရင်းသည် တည်ရှိသည့်နေရာဖြစ်သည်။
“ အခု တိုက်ပွဲက ပြင်းနေတယ်။ အသံကအရမ်းကျယ်တယ်။ ဖြစ်တာက နေ့လည်ကတည်းကပါ။ ပြည်သူတွေကတော့ ကိုးကန့်တပ် တွေ ဆောင်ကြဲကျေးရွာကို လာပြီး စခန်းချနေထိုင်ကတည်းကစိုးရိမ်ပြီးတော့ ရှောင်နေပြီးသားပါ” ဟု သီပေါမြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
အဆိုပါ နောင်ကော်ကြီးကျေးရွာသည် သီပေါမြို့ နှင့် နမ့်လန် ကားလမ်းပေါ်တွင်တည်ရှိသည်။
MNDAA သည်ဇူလိုင် ၂၀ရက်တွင် သီပေါမြို့နယ် ဆောင်ကြဲကျေးရွာ အတွင်း စစ်ကောင်စီနှင့် ကိုးကန့် တပ်ဖွဲ့ (MNDAA) တို့တိုက်ပွဲဖြစ်ပွားခဲ့ပြီး၊ ဆောင်ကြဲကျေးရွာအတွင်းသို့ MNDAA ထိန်းချုပ်နေရာယူထားခဲ့ကြောင်းသိရသည်။
ထို့နောက် နောင်ကော်ကျးရွာဒေသခံများသည် နာကန်ကျေးရွာ၊ ပန်ညိုကျေးရွာ၊ ခုတ်နမ့်ကျေးရွာ၊ ကုန်မုံကျေးရွာနှင့် ကောင်ဟိုင်းကျေးရွာသို့ ထွက်ပြေးတိမ်းရှောင်သွားကြောင်းသိရသည်။
Leave a Comments