သျှမ်းပြည် တောင်ပိုင်းဘက်သို့ ရောက်ရှိလာသည့် စစ်ဘေးရှောင် မိဘမဲ့ကလေးငယ် ၂၀၀ ကျော်အတွက်
စားနပ်ရိက္ခာ နှင့် အဝတ်အထည်များ အကူညီလိုအပ်နေကြောင်း စုံစမ်းသိရသည်။
အဆိုပါ စစ်ဘေးရှောင်များသည် သျှမ်းပြည်မြောက်ပိုင်း လားရှိုးမြို့နယ်အတွင်း စစ်ကောင်စီနှင့် ကိုးကန့်တပ်ဖွဲ့ (MNDAA) တို့ တိုက်ပွဲဖြစ်ပွားမှုကြောင့် ဇူလိုင်လ ဒုတိယအပတ်တွင် ကျေးသီးမြို့နယ် ဝမ်စိမ်းကျေးရွာသို့ ရောက်ရှိလာကြောင်း စစ်ဘေးရှောင် ကူညီနေသည့် အမျိုးသမီးတစ်ဦးက သျှမ်းသံတော်ဆင့်ကိုပြောသည်။
ထိုစစ်ဘေးရှောင်များသည် လက်ရှိမှာ ရုတ်တရက် ရောက်ရှိလာသည့်အတွက် နေရာထိုင်ခင်းများ၊ စားနပ်ရိက္ခာများ၊ အဝတ်အစားများ လိုအပ်နေကြောင်း သိရသည်။
“အဝတ်တွေလည်းလိုတယ်။ကလေးတွေက တောင်ဆိုနေတာ အဝတ်တွေကို အလှူခံပေးပါ။ ဝတ်ပြီးသားတွေ လည်း လျှော်ပြီး ပြန်ဝတ်နိုင်ပါတယ်လို့ သူတို့ကတောင်းဆိုကြတယ်။စားဖို့သောက်ဖို့လည်း အရမ်းလိုအပ်နေ တော့ အဲ့ဒါကို အဓိကထား ကူညီဖို့လိုအပ်နေတယ်” ဟု စစ်ဘေးရှောင်ကူညီသူ အမျိုးသမီးတစ်ဦးက ပြောသည်။
ထိုကလေးများသည် လက်ရှိတွင် ဝမ်စိမ်းကျေးရွာ အဝင်လမ်းရှိ ပြောင်းဖူးသိုလှောင်တဲ့နေရာ နှင့် ကွန်ဟိန်းသို့ အထွက်လမ်းရှိ ပြောင်းဖူးသိုလှောင်တဲ့နေရာတွင် နေထိုင်ကြသဖြင့် အိပ်ရန် အတွက် အခင်းများ လိုအပ်နေကြောင်း ၎င်းအမျိုးသမီးကဆိုသည်။
“သူတို့အိပ်ရတာလည်း မြေကြီးပေါ် မိုးကာလေးခင်းပြီး အိပ်ရတယ်။လူတွေကများတော့ မျှပြီးခွဲပြီးဖြစ်သလို အိပ်နေကြရတာ။ သူတို့ထွက်လာတုန်းကလည်း အဝတ်တစ်ထည် ကိုယ်တစ်ခုနဲ့ထွက်လာကြတော့ စောင်တွေ အခင်းတွေ ခြင်ထောင်တွေ အဝတ်တွေကလည်း မပါတော့လိုတယ်” ဟု သူက ဆက်ပြောသည်။
ထို့အပြင် ကလေးငယ်များ ကျောင်းတက်ရန် အတွက် လက်ရှိတွင် လွယ်အိတ်နှင့် ကျောင်းဝတ်စုံ တစ်စုံ ပေးထားကြောင်း သိရသည်။
ထိုကလေးများသည် လားရှိုးမြို့ မိဘမဲ့ဂေဟာ ၃ ခုမှ လာရောက် စစ်ဘေးရှောင်နေကြပြီး၊ ကလေးများသည် အသက် ၃ နှစ်မှ အသက် ၂၀ ဝန်းကျင်များဖြစ်ကြသည်။
“ အပျိုဖော်ဝင်စ မိန်းကလေးတွေအတွက် လစဉ်သုံး ပစ္စည်းတွေလည်း လိုအပ်နေတယ်။ ကျန်းမာရေး အကူအညီတွေလည်း လိုအပ်တယ်” ဟု စစ်ဘေးရှောင် ကူညီနေသူက ထပ်လောင်းပြောသည်။
အလားတူ ပြီးခဲ့သည့် ဇူလိုင်လ ၂၂ ရက်တွင်လည်း လားရှိုးမြို့တိုက်ပွဲကြားမှ ထွက်ပြေးလာသည့် စစ်ဘေးရှောင် မိဘမဲ့ ကလေးငယ် ၄၀ကျော်သည် သျှမ်းပြည်တောင်ပိုင်း တောင်ကြီးမြို့နယ် ဖာမွန်းပန်းခြံသို့ရောက်ရှိနေသဖြင့် စားဝတ်နေရေး အကူအညီလိုအပ်နေကြောင်း စစ်ဘေးရှောင် ကူညီနေသည့် တာဝန်ရှိသူ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
ထိုမိဘမဲ့ ကလေး ၄၀သည် အသက် ၂ နှစ် မှအသက် ၂၀ ဝန်းကျင်အရွယ် ကြောင်းသိရသည်။
“ သူတို့ ဒီကို ရောက်နေတာ ၄ရက် ပဲရှိသေးတယ်။ ကလေးတွေကို ကျောင်းထားရမယ်။ ကိုယ့်နေရာဒေသလည်း မဟုတ်တဲ့ အတွက်ကြောင့်မလို့ စားဝတ်နေရေးက အဆင်မပြေဘူး။ စိုးရိမ်နေရတယ်။အခက်တွေ့ တာပေါ့။ အလှူရှင်တွေရှိ ပါ့မလားဆိုပြီးလည်း စိုးရိမ်ရတာပေ့ါ။ခုက စားသောက်ဖို့ကလည်းအကူညီတွေလိုအပ်နေတာ”ဟု တာဝန်ရှိသူ အမျိုးသမီးတစ်ဦးက ပြောသည်။
ထို ကလေးငယ်များသည် လက်ရှိတွင် ဖာမွန်းပန်းခြံအတွင်းရှိ ခန်းမတစ်ခုတွင်နေထိုင်းပြီး နေရာထိုင်ခင်း အခက်အခဲကြောင့် ကျား၊မအဆောင်ခွဲရန်အတွက် သွပ်၊ပျဉ်သားတို့ဖြင့် ပြန်လည်းတည်ဆောက်နေရကြောင်း ၎င်းက ဆိုပြန်သည်။
လက်ရှိအချိန်ထိ သျှမ်းပြည် မြောက်ပိုင်းတကြောတွင် စစ်ရေးအရှိန် ဆက်လက်မြင့်တက်နေပြီး စစ်ကောင်စီဘက်မှ လေကြောင်းဗုံးကြဲမှုများ ဆက်တိုက်ရှိနေသေးသဖြင့် စစ်ရှောင်များ သောင်းနှင့်ချီ ထွက်ပြေးတိမ်းရှောင် နေကြရကြောင်း သိရသည်။
Leave a Comments