သျှမ်းပြည် မိုးမိတ်မြို့နယ်ရှိ စစ်ကောင်စီတပ်၏ နောက်ဆုံးလက်ကျန် ဗျူဟာကုန်း တပ်စခန်းကို TNLA နှင့် PLA ပူးပေါင်းတပ်ဖွဲ့များက ဆက်လက်ထိုးစစ်ဆင် တိုက်ခိုက်နေကြောင်း စုံစမ်းသိရသည်။

ယမန်နေ့ (ဇူလိုင်လ ၂၅ ရက်)တွင် မိုးမိတ်မြို့ရှိ စစ်ကောင်စီ လက်ကျန်တပ်စခန်းဖြစ်သည့် ဗျူဟာကုန်းကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ပြည်သူ့လွတ်မြောက်ရေးတပ်မတော် PLA ပူးပေါင်းတပ်ဖွဲ့တို့က ဆက်လက်ထိုးစစ်ဆင် တိုက်ခိုက်နေပြီး တိုက်ပွဲပြင်းထန်နေကြောင်း မိုးမိတ်ဒေသခံများက ပြောသည်။

“မိုးမိတ်ကတော့ မြို့အဝင်တပ် ကျန်သေးတယ်။ အခုက စစ်တပ်နားက ခုပ်ပင်နဲ့ မန်ကျည်းပင်တို့ ရွာစဉ်တန်းတွေဘက်မှာ နေ့တိုင်းတိုက်ပွဲဖြစ်တယ်၊ အဲ့ဘက်သွားလို့လည်း မရဘူး ပိတ်ထားတယ်။ တခါတလေ အက်တမ်နဲ့ မိုင်တဲယ်ဖုန်းပဲ ရတယ်။ တွင်းငယ် သွားတဲ့ဘက် ရွာတွေတလျောက်မှာ နေ့တိုင်းပြန်ဖြစ်နေတယ်”ဟု မိုးကုတ်မြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဇွန်လ ၂၅ ရက်မှ စတင်ခဲ့သည့် “၁၀၂၇ စစ်ဆင်ရေး” ဒုတိယပိုင်းတွင် သျှမ်း-မန္တလေး နယ်စပ် မိုးမိတ်မြို့နှင့် တွင်းငယ်မြို့အကြားကို ပြည်သူ့လွတ်မြောက်ရေးတပ်မတော် PLA မှ တပ်ရင်း (၆၀၇) မှ လမ်းကြောင်းဖြတ်တောက်ထားပြီး ရွှေကျောက်မောရွာ ရဲစခန်းနှင့် ကင်းချောင်းတံတား ဂိတ်စခန်းတို့ကို TNLA တပ်ဖွဲ့နှင့် ပူးပေါင်းပြီး ထိန်းချုပ်ထားကြောင်း သိရသည်။

ထို့အပြင် မိုးမိတ်မြို့ရှိ လက်ကျန်တပ်စခန်း ဗျူဟာကုန်းအတွင်းကို စစ်ကောင်စီတပ်မှ Y-12 ထောက်ပို့ရဟတ်ယာဉ်ဖြင့် လက်နက်ခဲယမ်းများ လာရောက်ကြဲချခဲ့ကြောင်း TNLA ဘက်မှ ထုတ်ပြန်ထားသည်။

လက်ရှိတွင် မိုးမိတ်မြို့သို့ ဝင်ရောက်နိုင်သည့် လမ်းကြောင်းအားလုံးတွင် တိုက်ပွဲပြင်းထန်နေခြင်းကြောင့် ကုန်တင်ယာဉ်များ ဖြတ်သန်းသွားလာ၍ မရဘဲ စားနပ်ရိက္ခာများ ပြတ်လပ်လုနီးပါး ဖြစ်နေကာ အချို့နေရာများတွင် အဆမတန် ဈေးကြီးပေးဝယ်နေရကြောင်း ဒေသခံများက ပြောသည်။