သျှမ်းမြောက်၊ လားရှိုးမြို့ အခြေစိုက် အရှေ့မြောက်တိုင်း စစ်ဌာနချုပ်-ရမခကို ယနေ့ (ဇူလိုင်လ ၂၅ ရက်) နံနက်ပိုင်းက ဝင်ရောက် သိမ်းပိုက်ခဲ့သည်ဟု နံနက် ၁၁ နာရီတွင် ကိုးကန့်တပ်-MNDAA ကထုတ်ပြန်သည်။
သို့သော် ရမခ အခြေအနေမှာ ရှုပ်ထွေးနေဆဲဖြစ်ပြီး ကိုးကန့်ပူးပေါင်းတပ်များ ထိုးဖောက်ဝင်ရောက်ဆဲဖြစ်ရာ ယနေ့ ညနေ ၄ နာရီ ၂၅ မိနစ်တွင် ရမခ အရှေ့ရှိ မော်တင်ယာဥ်တင်တပ် အတွင်း ရောက်ရှိနေပြီဟု စစ်ရေးသတင်းရင်းမြစ်က ဆိုသည်။
“ခုညနေ ၄ နာရီ၂၅ မိနစ်မှာ ရမခ ရှေ့မှာရှိတဲ့ မော်တော်ယာဥ်တင်တပ်ထဲ ပူးပေါင်းတပ်တွေ ရောက်နေပြီ။ စစ်တပ်ဘက်က လက်နက်ချဖို့ နီးစပ်နေပြီလို့ ပြောလို့ရပါတယ်” ဟု ၎င်းက ဆိုသည်။
ယနေ့ နံနက်ပိုင်း ရမခ ကို ကိုးကန့်တပ် ဝင်ရောက်စဥ် လက်နက်ချသူများရှိသော်လည်း အခြေအနေမှာ ရှုပ်ထွေးနေကြောင်း တခြားသတင်းရင်မြစ် တစ်ဦးက ဆိုသည်။
“အခြေအနေ က ရှုပ်ထွေးနေဆဲပါ။ ဘာဖြစ်နေတယ်ဆိုတာ တိတိကျကျပြောဖို့ မလွယ်သေးဘူး” ဟု ၎င်းက ဆိုသည်။
လားရှိုးမြို့ ဆင်ခြေဖုံးရပ်ကွက်များတွင် တိုက်ပွဲ ဖြစ်ပွားနေဆဲဖြစ်သော်လည်း လားရှိုးမြို့ကို အလုံးစုံ သိမ်းပိုက်ပြီးဖြစ်၍ အုပ်ချုပ်ရေး ကော်မတီ ဖွဲ့စည်းကြောင်း ကိုးကန့်တပ်က ယနေ့ မွန်းလွဲပိုင်းက ထုတ်ပြန်သည်။
စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက လားရှိုး ရမခ ကျဆုံးခြင်းမရှိသေးဟု ပြောဆိုကြောင်း ယနေ့ နံနက် ၁၁ နာရီ ၃၅ မိနစ်တွင် ပြည်တွင်းအခြေစိုက် မီဒီယာ တစ်ခုကို ပြောဆိုထားသည်။
လားရှိုး ရမခ အခြေအနေနှင့် ပတ်သက်၍ ထပ်မံ အတည်ပြုနိုင်ရန် သျှမ်းသံတော်ဆင့် အနေဖြင့် ကြိုးစားနေဆဲ ဖြစ်သည်။
Leave a Comments