သျှမ်းပြည် သီပေါမြို့နယ်၏ လမ်းပန်းဆက်သွယ်ရေးနှင့် တံတားများ ပျက်စီးမှုကြောင့် ဒေသခံများအတွက် စားနပ်ရိက္ခာ ပြတ်လပ်လာနိုင်ကြောင်း စုံစမ်းသိရသည်။

သျှမ်းပြည် သီပေါ နှင့် ကျောက်မဲ ကြားရှိ ကျင်သီတံတားသည် စစ်ကောင်စီနှင့် ညီနောက်မဟာမိတ်တို့သည် “၁၀၂၇ စစ်ဆင်ရေး”တိုက်ပွဲများကြောင့် ပြီးသည့် ၂၀၂၃ နိုဝင်ဘာလ ၁၂ ရက်တွင် ဗုံးခွဲဖျက်ဆီးခဲ့ကြပြီး၊
ဇွန်လ ၂၅ ရက် “၁၀၂၇ စစ်ဆင်ရေး” ဒုတိယလှိုင်းတွင်လည်း သီပေါ-လားရှိုး ကြားရှိ ဆွတ်လန်ရွာရှိ တံတားကို ဆက်လက် ဗုံးခွဲဖျက်ဆီးခဲ့ရသည်။

ထိုကြောင့် ဇွန်လ နောက်ဆုံးပတ်မှ စတင်ပြီး သျှမ်းပြည် သီပေါမြို့ရှိ ဒေသခံများသည် လမ်းပန်းဆက်‌သွယ်ရေး နှင့် တံတားများ ပျက်စီးမှုကြောင့် ကုန်စည်စီးဆင်းမှု ခက်ခဲလာသဖြင့် စားနပ်ရိက္ခာများ မကြာခင် ပြတ်လပ်မှု ရှိလာနိုင်ကြောင်း သီပေါမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ အခု က ဘယ်ဘက်ကိုမှ ထွက်ပြေးလို့မရတဲ့အခြေအနေပါ။ ကျောက်မဲနဲ့ လားရှိုးဘက် တိုက်ပွဲတွေဖြစ်တယ်။ ဘယ်လမ်းမှ သွားလို့မရဘူး။ စားသောက်ကုန်တွေလည်း စျေးတက်နေတယ်။ ရေရှည် ဆိုရင်တော့ စားနပ်ရိက္ခာ အတွက်က အရမ်းခက်ခဲလာမှာကို စိုးရိမ်ရတယ်” ဟု သီပေါမြို့ ဒေသခံအမျိုးသမီး က ပြောသည်။

လက်ရှိတွင် သီပေါမြို့နယ်၌ ခရမ်းချဉ်သီး တစ်ပိဿလျှင် မြန်မာကျပ်ငွေ တစ်သောင်းကျပ်ပေးဆောင်ရကြောင်း၊ ထို့ပြင် လမ်းကြောင်းများ တံတားများဖျက်ဆီးခံရသည့်အတွက် ဒုဌဝတီမြစ်ကြောင်းကို အဓိက အားထားကာ စားသောက်ကုန်များကို သယ်နေရကြောင်း သိရသည်။

“ အခုက ရေကြောင်းကိုပဲ အားကိုးပြီး ဆန်တွေ စားသောက်ကုန်တွေသယ်နေရတာ။ ပြဿနာက လှေနဲ့ဆိုတော့ အများကြီးမသယ်နိုင်ဘူးလေ” ဟု ၎င်းက ဆိုပြန်သည်။

ဇွန်လ နောက်ဆုံးပတ်တွင် စစ်ကောင်စီနှင့်TNLA တို့သည် သီပေါမြို့ ဆွတ်လန်ရွာရှိ တံတားအနီးတွင် တိုက်ပွဲများ ဖြစ်ပွားခဲ့ပြီးနောက် ကျေးရွာရှိ ဒေသခံ နှစ်ထောင်ကျော်သည် သီပေါမြို့အတွင်းရှိ ဖိုးတော်ဘုရားကျောင်းနှင့် ဆွေမျိုးအိမ်တို့တွင် ထွက်ပြေးတိမ်းရှောင်နေကြသည်။

ထိုသီပေါမြို့ရှိ တံတားအနီးတဝိုက်တွင်နေထိုင်သော စစ်ဘေးရှောင်များကိုလည်း ယခုအချိန်ထိ နေရပ်ပြန်ခြင်း ကို တားမြစ်ခံထားပြီး၊ ထပ်မံထွက်ပြေးတိမ်းရှောင်ခဲ့သည့် ဒေသခံများသည် စိုးရိမ်မှုများရှိကြောင်း သီပေါမြို့ ဒေသခံအမျိုးသမီးတစ်ဦးက ပြောသည်။

“တချို့ သီပေါတံတားနဲ့ နီးတဲ့အိမ်က လူတွေကို အခုထိ စားစရာတွေ ယူဖို့ မပြန်ရဘူး။ မြို့ပြင်ကို ထွက်မယ်ဆိုရင် လက်နက်ကိုင်တွေရှိတော့ အန္တရာယ်များတယ်။ လမ်းတွေကလည်းအကုန်ပိတ်ပြီလေ။ အိမ်ကိုထားခဲ့ မယ်ဆိုလည်း သူခိုးတွေကို ကြောက်ရပြန် ရော” ဟု သီပေါမြို့ ဒေသခံအမျိုးသမီးတစ်ဦး ကပြောသည်။

သျှမ်းပြည်မြောက်ပိုင်း သိန္နီမြို့နယ် လားရှိုးမြို့နယ်၊ သီပေါမြို့နယ်၊ ကျောက်မဲမြို့နယ် နောင်ချိုမြို့နယ်တို့တွင် စစ်ကောင်စီနှင့် TNLA၊ ပြည်သူ့ကာကွယ်ရေးတပ်ဖွဲ့ PDF ပူးပေါင်းတပ်ဖွဲ့တို့ စစ်ရေးပြင်းထန်နေဆဲဖြစ်ပြီး၊ စစ်ကောင်စီဘက်မှ လေကြောင်း ဗုံးကြဲမှု ဆက်လက်ပြင်းထန်နေကြောင်း သိရသည်။

ထို့ပြင် သျှမ်းပြည်မြောက်ပိုင်း လားရှိုး၊ ကျောက်မဲ၊ သီပေါ၊ နောင်ချိုနှင့် မိုးမိတ်၊ မိုးကုတ်မြို့နယ်တွင် စစ်ရှောင် ၃သောင်းကျော် ထွက်ပြေးတိမ်းရှောင်နေရပြီး စားနပ်ရိက္ခာ အကူအညီ အရေးပေါ်လိုအပ်နေကြောင်း စစ်ဘေးရှောင်ကူညီသူများထံမှ သိရသည်။