သျှမ်းပြည် ပင်လောင်းမြို့နယ်ရှိ စစ်‌ကောင်စီ စစ်ဆေးရေးဂိတ်တွင် ထောက်ခံစာမပါသည့် လူသုံးကုန်ပစ္စည်းများ၊ စားသုံးကုန်များကို သိမ်းဆည်းမှု ပြုလုပ်နေကြောင်း စုံစမ်းသိရသည်။

ပြီးခဲ့သည့် ဇွန်လမှ စတင်ပြီး ပင်းလောင်းမြို့နယ် စစ်ကောင်စီ၏ ရင်းမှီး စစ်ဆေးရေးဂိတ် ဖြတ်သန်းသွားလာသည့် ဒေသခံများ တင်ဆောင်လာသည့် လူသုံးကုန်ပစ္စည်းများ၊စားသုံးကုန်ပစ္စည်းများ အတွက် ထောက်ခံစာ မပြနိုင်ပါက သိမ်းဆည်းမှု ပြုလုပ်ကြကြောင်း စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကိုပြောသည်။

“အဓိကတော့ ရွာမှာနေထိုင်ကြောင်း လက်မှတ် ထောက်ခံစာပါ။ အဲ့ထောက်ခံစာမပြနိုင်ရင် ဆန်တွေ၊ ဆီတွေ ပေးမတင်ဘူး။ စက်သုံးဆီဆိုရင်လုံးဝကို ပေးမတင်ဘူး။ စားသောက်ကုန်တွေကိုလည်း ထောက်ခံစာမပြနိုင်ရင် သူတို့သိမ်းတယ်။ ပြန်လိုချင်ရင် သူတို့ သိမ်းတဲ့နေရာမှာ ပိုက်ဆံပေးပြီး ပြန်သွားရွေးရတယ်” ဟု စစ်ဘေးရှောင် အမျိုးသားတစ်ဦးက သျှမ်းသံတော်ဆင့်ကိုပြောသည်။

စစ်ကောင်စီ၏ နည်းမျိုးစုံ ငွေညှစ်တောင်းဆိုမှုနှင့် တဖက်တွင်လည်း ကုန်စျေးနှုန်းမြှင့်တက်နေမှုကြောင့် ပင်လောင်းမြို့နယ် ဝါးလီကျေးရွာ စစ်ဘေးရှောင်များသည် စားဝတ်နေရေး ပိုမိုကြပ်တည်းလာကြောင်း ၎င်းက ဆိုသည်။

ထိုဒေသတွင် ၂၄ပြည့်ဆံ့ ဆန်တစ်အိတ်လျှင် မြန်မာကျပ်ငွေ တစ်သိန်း ၃သောင်း (၁၃,၀၀၀၀) ပေးဆောင်ရပြီး၊ စစ်ဘေးရှောင်များအတွက် အလှူရှင် ရှားပါးမှုကြောင့် ဆန်တစ်အိတ်ကို ဝယ်ယူနိုင်မှုမရှိသဖြင့် မကြာမီ စားနပ်ရိက္ခာ ပြတ်လပ်နိုင်ကြောင်း စစ်ဘေးရှောင် အမျိုးသားက ပြောသည်။

“ အခု အလုပ်က နေ့စားပဲလုပ်နေရတာ။ တစ်ရက်ကို တစ်သောင်းကျပ်ရပေမယ့် နေ့တိုင်း အလုပ်မရှိဘူးလေ။ လူတိုင်းကလည်း နေ့စားလိုက်နေရတာမဟုတ်ဘူး။ အလှူရှင်ကလည်းမရှိ ကုန်စျေးနှုန်းလည်း မြင့်တက်တော့ စားဝတ်နေရေး ပိုခက်ခဲလာမယ်” ဟု စစ်ဘေးရှောင် အမျိုးသားက ထပ်လောင်းပြောသည်။

ထိုစစ်ဘေးရှောင်များသည် ပြီးခဲ့သည့် ၂၀၂၃ နိုဝင်ဘာ ၁၁ ရက်ဖြစ်သည့် “၁၁.၁၁စစ်ဆေးရေး”ကြောင့် စစ်ကောင်စီနှင့် ကရင်နီတော်လှန်ရေး တပ်ပေါင်းစု တို့တိုက်ပွဲများကြောင့် ပင်လောင်းမြို့နယ် ဆောင်းပြောင်းရွာနှင့် ကရင်နီနယ်စပ်တကြော မှ ထွက်ပြေးတိမ်းရှောင်လာကြကြောင်း သိရသည်။

လက်ရှိ ပင်လောင်းမြို့နယ် ဝါးလီကျေးရွာတွင် ယခင် အိမ်‌ထောင်စုစာရင်း ၈၀၀ ခန့် နှင့် တိုက်ပွဲကြောင့် ရောက်ရှိလာသည့် စစ်ဘေးရှောင် လူဦးရေ ၅ထောင်ကျော်ရှိသည်။

ထိုနေရာသည် ပင်လောင်းမြို့နှင့် ၁၄ မိုင်ဝန်းကျင်သာကွာဝေးသော်လည်း လမ်းပန်းဆက်သွယ်ရေး၊ စစ်ကောင်စီ၏ စစ်ဆေးရေးဂိတ် တင်းကြပ်မှုကြောင့် သွားလာရ ခက်ခဲသည့် နေရာဖြစ်သည်။

သျှမ်းပြည်အတွင်း ရောက်ရှိနေသော ကရင်နီစစ်ဘေးရှောင်များသည် ပြီးခဲ့သည့် ဇူလိုင်လမှစတင်ပြီး နေရပ်ပြန်နေကြကြောင်း စစ်ဘေးရှောင်များက ပြောသည်။