သျှမ်းပြည်အရှေ့ပိုင်း မိုင်းဖြတ်ခရိုင် မိုင်းယောင်းမြို့ အနီးတဝိုက်ရှိ ကျေးရွာများကို မိုင်းလားတပ်ဖွဲ့ဖြစ်သည့် အမျိုးသားဒီမိုကရေစီ မဟာမိတ်တပ်မတော်( NDAA) က အင်အားရာချီသုံးပြီး ဝင်ရောက်နေရာယူထားကြောင်း ဒေသခံတစ်ဦးကပြောသည်။

“အခုသူတို့ဘာကြောင့်လာတာလဲတော့ အသေးစိတ်မသိရဘူး။ ဝမ့်တုံ့ဘုန်းကြီးကျောင်းမှာ ရောက်နေတာ။ ရွာသားတွေလည်းကို လက်မှတ်ထိုးခိုင်းတယ်။ ဘာကြောင့်ထိုးခိုင်းတာလဲတော့ မသိဘူး” ဟု၎င်းက ပြောသည်။

လက်ရှိ မိုင်းယောင်းမြို့ ဘေးပတ်ပတ်လည်တွင် မိုင်းလားတပ်ဖွဲ့ NDAA ကရောက်ရှိနေပြီး ရွာသားများကို ခေါ်တွေ့နေကြောင်း သိရသည်။

ထိုကိစ္စနှင့် ပတ်သက်၍ သျှမ်းသံတော်ဆင့်မှ ဆက်လက်မေးမြန်းနေဆဲပါ။

ထို့အပြင် မိုင်းယောင်းမြို့ ဘေးပတ်ပတ်လည်တွင် စစ်ကောင်စီ၏ ခြေမြန်တပ်ရင်းများဖြစ်သည့် ခမရ – ၃၁၁/ ၃၃၄/ ၃၃၅/ ၅၇၃ နှင့် အမြောက်တပ် ၃၉၈ တပ်ရင်းတို့ရှိသကဲ့သို့ မိုင်းယုမြို့တွင် အမှတ် (၁၀၀၈) နယ်ခြား စောင့်တပ် ရှိနေသည်။

ပြီးခဲ့သည့် ဇူလိုင် ၁၀ ရက်တွင်လည်း “ဝ” သွေးစည်းညီညွတ်ရေး တပ်မတော် UWSA မှ တပ်အင်အား ၂,၀၀၀ ကျော်ဖြင့် သံလွင်မြစ် အနောက်ဘက်ခြမ်းကိုကူး၍ တန့်ယန်းမြို့ထဲသို့ အင်အားဖြည့်တင်းလာခဲ့ပြီး မြို့ကိုထိန်းချုပ်ထားခဲ့သည်။