သျှမ်းပြည်မြောက်ပိုင်း အရှေ့မြောက်တိုင်း စစ်ဌာနချုပ်အခြေစိုက် လားရှိုးမြို့ကို ထိုးစစ်ဆင် တိုက်ခိုက်နေသည့် ကိုးကန့်တပ်ဖွဲ့ MNDAA ထံ စစ်ကောင်စီလက်အောက်ခံ ဗိုလ်ကြီး ၅ ဦးနှင့် တပ်သား ၃၀၀ ကျော် လက်နက်ချ အလင်းဝင်ရောက်ခဲ့ကြောင်း The Kokang မီဒီယာမှ ရုပ်သံနှင့်တကွ ထုတ်ပြန်လာသည်။

ဇူလိုင်လ ၂၁ ရက် နံနက် ၁၀ နာရီတွင် စစ်ကောင်စီတပ်မှ ဒုဗိုလ်မှူးကြီး တစ်ဦးက ဗိုလ်မှူး ၂ ဦးကို ခေါ်ဆောင်၍ ဗိုလ်ကြီး ၅ ဦးနှင့် တပ်သား ၃၁၇ ဦးတို့ သေနတ်နှင့် လက်နက်ခဲယမ်း အများအပြားဖြင့် ကိုးကန့်တပ်ဖွဲ့ MNDAA ထံ လက်နက်ချ အလင်းဝင်ခဲ့ပြီး MNDAA နိုင်ငံရေးဌာန၏ ရှေ့တန်းလုပ်ငန်းအဖွဲ့မှ လက်ခံခဲ့ကြောင်း ထုတ်ပြန်ချက်အရ သိရသည်။

၎င်းနောက် MNDAA နိုင်ငံရေးနှင့် စည်းရုံးရေးဌာနမှ လက်ထောက်ညွှန်ကြားရေးမှူးက စစ်သုံ့ပန်းများအတွက် ဦးစားပေးဆက်ဆံမှုနှင့် ဆုကြေးမူဝါဒကို ရှင်းပြပေးပြီး ထိခိုက်ဒဏ်ရာရရှိသူနှင့် ဖျားနာသူများကို ဆေးကုသပေးခဲ့ကြောင်း ဆိုထားသည်။

စစ်ကောင်စီတပ်ကို စွန့်ခွာ၍ လက်နက်ချ အလင်းဝင်ရောက်ပါက ဆုကြေးငွေ ပေးအပ်မည်ဖြစ်ပြီး တပ်သားအဆင့် ကျပ် ဆယ်သိန်း၊ ဒုဗိုလ်နဲ့ ဗိုလ်ကြီးအဆင့် ကျပ်သိန်း ၂၀၊ ဗိုလ်မှူးနှင့် ဗိုလ်မှူးကြီးအဆင့် သိန်း ၃၀ ပေးအပ်သွားမည်ဖြစ်ပြီး လက်နက်နှင့်တကွ အညံ့ခံပါက ငါးသိန်း ထပ်တိုးပေးမည်ဟု ကိုးကန့်တပ်ဖွဲ့ MNDAA ဇူလိုင်လ ၁၂ ရက်တွင် ထုတ်ပြန်ခဲ့ပြီးနောက် ယခုကဲ့သို့ စစ်ကောင်စီတပ်သား အစုအပြုံလိုက် လက်နက်ချအလင်းဝင်ရောက်လာခြင်း ဖြစ်သည်။