သျှမ်းပြည် ရပ်စောက်မြို့နယ်တွင် ရှမ်းပြည်တိုးတက်ရေးပါတီ (SSPP/SSA )နှင့် သျှမ်းပြည်ပြန်လည်ထူထောင်ရေးကောင်စီ ( RCSS/SSA) တို့အကြား ဖြစ်ပွားခဲ့သည့် တိုက်ပွဲအတွင်း မိခင်နှင့် ကလေး အပါအဝင် အရပ်သား ၄ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။

ယမန်နေ့ (ဇူလိုင်လ ၂၂ ရက်) နံနက် ၂ နာရီခန့်မှ စတင်ပြီး ရပ်စောက်မြို့ မြောက်ဘက်ရှိ မြေနီရွာ (ဝၢၼ်ႈလိၼ်လႅင်)၊ ဝမ်ဟွေး ပန်းကုန်းမ (ဝၢၼ်ႈၵူၺ်ႈ) နှင့် ကုန်းကျောင်း၊ မြစ်ကွေ့ရွာဘက် တကြောတွင် SSPP နှင့် RCSS တပ်ဖွဲ့တို့ နှစ်ရက်အတွင်း တိုက်ပွဲ ၃ နေရာ ဖြစ်ပွားခဲ့ပြီး မိခင်နှင့် ကလေးအပါအဝင် အရပ်သား ၄ ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။

“မြို့အထွက် ဝမ်ဟွေးနဲ့ ဝမ်ကွေ(ဝၢၼ်ႈၵူၺ်ႈ)ရွာကြား တံတားနားမှာ မိုင်းပေါက်ကွဲတယ်။ ဒဏ်ရာရတာက မြို့မြောက်ဘက်က ကုန်းကျောင်းနဲ့ မြစ်ကွေ့ရွာမှာ ဖြစ်တာ။ ရွာသစ်မှာလည်း တိုက်ပွဲဖြစ်တယ်။ နောက်ထပ် မြေနီရွာ (ဝၢၼ်ႈလိၼ်လႅင်) လွယ်စန့်မှာလည်း ဗုံးဆံမှန်ပြီးတော့ ကျောင်းဆရာအိမ်က သူ့မိန်းမနဲ့ ကလေး ဒဏ်ရာရတယ်”ဟု ရပ်စောက်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ရပ်စောက်မြို့နယ် မြေနီရွာမှ ဗုံးဆံထိမှန်ပြီး ထိခိုက်ဒဏ်ရာရရှိခဲ့သည့် မိခင်နှင့် ကလေးတို့ကို ရပ်စောက်မြို့ ပြည်သူ့ဆေးရုံသို့ ဆေးကုသရန် ပို့ဆောင်ထားကြောင်း သိရသည်။

အလားတူ ရပ်စောက်မြို့နယ် ရွာသစ်ကျေးရွာတွင်လည်း SSPP နှင့် RCSS တပ်ဖွဲ့တို့၏ နှစ်ဘက်တိုက်ပွဲအတွင်း ဒရုန်းအသုံးပြု တိုက်ခိုက်ခြင်းကြောင့် ပြည်သူနေအိမ်ပေါ် ဗုံးထိမှန်ကာ အိမ်ထဲရှိ အမျိုးသမီးအပါအဝင် ၂ ဦး ထိခိုက်ဒဏ်ရာ ရရှိခဲ့ပြီး မည်သည့်အဖွဲ့၏ ဒရုန်းဗုံးမှန်း မသိရှိရကြောင်း ဒေသခံများက ပြောသည်။

“မနက် ၂ နာရီကတည်းက ရွာသစ်ဘက်တကြော ပစ်ကြတာ မနက် ၉ နာရီဝန်းကျင်အထိ အနောက်ရွာဘက် ရောက်လာတယ်။ နည်းနည်း တောလိုဖြစ်တဲ့နေရာ သင်္ချိုင်းနဲ့ နတ်စင်တွေမှာ ဒရုန်းနဲ့ လိုက်ချတာ၊ ၁၁ နာရီခွဲ ဝန်းကျင်မှာ အိမ်တစ်လုံးထိတယ်။ အိမ်ထဲက လူနှစ်ဦး အပေါ်ပိုင်း ထိရှဒဏ်ရာ ရတယ်”ဟု ဖြစ်စဉ်သိရှိသူ ရပ်စောက်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

SSPP နှင့် RCSS တိုက်ပွဲအကြား နှစ်ဘက်တပ်ဖွဲ့အချင်းချင်း ဒရုန်းအသုံးပြု တိုက်ခိုက်ခြင်းနှင့် ပတ်သက်ပြီး SSPP ပြောရေးဆိုခွင့်ရှိသူ ဗိုလ်မှူးကြီး စိုင်းဆုနှင့် RCSS ပြောရေးဆိုခွင့်ရှိသူ ဗိုလ်မှူးစိုင်းခမ်းစံတို့ထံ သျှမ်းသံတော်ဆင့်မှ ဖုန်းဖြင့်ဆက်သွယ်ခဲ့သော်လည်း ဖုန်းလက်ခံဖြေကြားခြင်း မရှိသေးပါ။

ပြီးခဲ့သည့် ဇူလိုင်လ ၂၁ ရက်တွင် ရပ်စောက်မြို့နယ် မိုင်းပျဉ်းကျေးရွာအုပ်စုအတွင်း SSPP စစ်ဝတ်စုံ ဝတ်ဆင်ထားသည့် တပ်သား ၅ ဦးနှင့် သေနတ် ၉ လက် အပါအဝင် လက်နက်ခဲယမ်းများ သိမ်းဆည်းရမိခဲ့ကြောင်း RCSS သတင်းများ ဖော်ပြနေသည့် Tai Freedom မီဒီယာမှ ထုတ်ပြန်ထားသည်။