သျှမ်းပြည် ညောင်ရွှေမြို့နယ်သို့ တစ်လခန့်အကြာ ရောက်ရှိနေသည့် စစ်ဘေးရှောင် ၁ ထောင်ကျော်သည် အလှူရှင် မရှိသည့်အတွက် စားနပ်ရိက္ခာများ ပြတ်လပ်ကာ အကူအညီ အရေးပေါ် လိုအပ်နေကြောင်း သတင်းရရှိသည်။

အဆိုပါ စစ်ဘေးရှောင်များသည့် ပြီးခဲ့သည့် ဇွန်လ ၁၈ ရက်မှ စတင်ခဲ့သည့် စစ်ကောင်စီတပ်နှင့် ကရင်နီတော်လှန်ရေး အင်အားစုတပ်ဖွဲ့များကြောင့် ပင်လောင်းမြို့မှ ထွက်ပြေး တိမ်းရှောင်လာသူများ ဖြစ်သည်။

လက်ရှိတွင် ၎င်းစစ်ဘေးရှောင်များသည် ညောင်ရွှေမြို့နယ်အတွင်းရှိ ဆန်းရေကြည်ကျေးရွာ၊ သရက်အုပ်ကျေးရွာ၊ လုံကန်ကျေးရွာ၊ နန်းဟူးကျေးရွာ၊ တက်ဦးမုတ်ကျေးရွာ၊ တောင်ပါကျေးရွာ၊ နှင့် ကီးကာကျေးရွာများတွင် ရောက်ရှိနေကြပြီး အလုပ်အကိုင် ရှားပါးမှုကြောင့် စားနပ်ရိက္ခာများ အရေးပေါ် လိုအပ်နေကြောင်း စစ်ဘေးရှောင် ကူညီနေသည့် အမျိုးသားတစ်ဦး သျှမ်းသံတော်ဆင့်ကို ပြောသည်။

“စစ်ဘေးရှောင်တွေကတော့ အရင်ကထက် ပိုဆိုးသွားပြီ၊ အရင်ကလည်း စားနပ်ရိက္ခာတွေ လိုနေပါတယ်ဆိုမှ အခု တစ်လ‌‌လောက် စစ်ထပ်ရှောင်နေရတော့ အရမ်းခက်ခဲနေတယ်။ အကူအညီလည်း လိုနေပြီ၊ အလုပ်ကလည်း မရှိတော့ စားစရာတွေ ကုန်နေကြပြီ။ အလှူရှင်မရှိတော့ ပြန်မကူညီနိုင်ဘူး”ဟု စစ်ဘေးရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပင်လောင်းမြို့နယ်မှ ထွက်ပြေးလာသော စစ်ဘေး‌ရှောင်များသည် ကျေးရွာရှိ ဆွေမျိုးနေအိမ်များ၊ ဘုန်းကြီးကျောင်းများတွင် နေထိုင်နေကြကြောင်း၊ စစ်ဘေးရှောင်စခန်း ဟု သီးသန့် ဖွင့်လှစ်ထားခြင်း မရှိကြောင်းလည်း ၎င်းက ထပ်လောင်းပြောကြားသည်။

“အခုက နေ့စားအလုပ်လည်း တစ်ရက် ၁သောင်း လောက်ပဲ ရတာ။ မိန်းကလေးဆို ၈ ထောင်ပဲ ပေးတာ။ အဲ့လောက် ပေးတာတောင် အလုပ်က မရှိဘူး။ ဆန်တွေကလည်း ဒီဘက်မှာ ပိဿာနဲ့ ရောင်းတော့ တစ်ပိဿာကို ၄ ထောင်နဲ့ ၅ ထောင်နီးပါး ရှိတယ်။ မိသားစုများရင် တကယ်ခက်ခဲတယ်”ဟု ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

ညောင်ရွှေမြို့ရောက် စစ်ဘေးရှောင်များသည် အလုပ်အကိုင် ရှားပါးမှုနှင့် အလှူရှင်များ မရှိသည့် အတွက်ကြောင့် ရေရှည်ဆက်ပြီး တိုက်ပွဲများဖြစ်လျှင် ရိက္ခာပြတ်လပ်နိုင်သည့် အခြေအနေ ရှိကြောင်းလည်း စစ်ဘေးရှောင်ကူညီနေသူများက ပြောသည်။

“ဒီတစ်လ‌လောက် ထွက်ပြေးနေရတဲ့ လူတွေက စစ်ဘေးရှောင်တွေက စားသောက်ဖို့အတွက် အရေးပေါ် လိုအပ်နေတာ တော်တော်ကြာနေပါပြီ။ သူတို့အတွက်ကို ကူညီစေချင်တယ်။ တချို့တွေကလည်း ရှိတဲ့လူတွေဆီကနေ ချေးငှားပြီး ဝမ်းရေးဖြေရှင်းနေရတာတွေ ရှိတယ်”ဟု အသက် ၄၀အရွယ်ရှိ စစ်ဘေးရှောင် ကူညီသည့် အမျိုးသားက ဆက်ပြောသည်။

ပင်‌လောင်းမြို့နယ်အတွင်းတွင် စစ်ကောင်စီတပ်နှင့် ကရင်နီတော်လှန်ရေး အင်အားစုတပ်ဖွဲ့ တို့သည် စစ်ရေး ဆက်လက် တင်းမာနေပြီး လက်ရှိအချိန်ထိ ဖုန်းလိုင်းနှင့် အင်တာနက်လိုင်း ဖြတ်တောက်ခံထားရကြောင်း သိရသည်။