သျှမ်းပြည် လောက်ကိုင်မြို့ရှိ တုံချိန်ရပ်ကွက်တွင် ပြည်သူများ အိပ်မောကျနေစဉ် စစ်ကောင်စီတပ်က လေကြောင်းဖြင့် ထပ်မံဗုံးကြဲတိုက်ခိုက်ခဲ့ရာ အဆောက်အဦးအများအပြား မီးလောင်ပျက်စီးခဲ့ကြောင်း စုံစမ်းသိရသည်။

ယနေ့ (ဇူလိုင်လ ၂၃ ရက်) နံနက် ၁ နာရီခွဲကျော်တွင် လောက်ကိုင်မြို့ တုံချိန်ရပ်ကွက်သို့ စစ်ကောင်စီတပ်မှ လေကြောင်းဖြင့် ထပ်မံဗုံးကြဲတိုက်ခိုက်ခဲ့ရာ အနီးရှိ ဟိုတယ်နှင့် ဆိုင်ခန်း အများအပြား ထိခိုက်ပျက်စီးခဲ့ကြောင်း လောက်ကိုင်ဒေသခံများက ပြောသည်။

“ဒီမနက် ၁ နာရီခွဲလောက်မှာ လေယာဉ်လာဝဲပြီးတော့ ဗုံးကြဲသွားတာ၊ ဗုံးဘယ်နှလုံးတောင်မှလဲ မသိဘူး။ စီကေစီ ဟိုတယ်နဲ့ အဲ့နားက ဆိုင်ခန်း တော်တော်များများ ထိကုန်တယ်၊ လူထိခိုက်တာတော့ မသိရသေးဘူး”ဟု လောက်ကိုင်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လောက်ကိုင်မြို့သို့ ယခုလေကြောင်းဗုံးကြဲမှု မတိုင်ခင် ဇူလိုင်လ ၁၈ ရက်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ရှိ မြို့မဈေးပေါ်သို့ လူစည်ကားချိန်တွင် စစ်‌ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ရာ သိန္နီမြို့နယ် SNLD ပါတီ တွဲဘက်အတွင်းရေးမှူး အပါအဝင် အရပ်သား (၁၀) ဦးထက်မနည်း သေဆုံးခဲ့ပြီး (၃၀) ကျော် ထိခိုက်ဒဏ်ရာရရှိခဲ့ကြောင်း သိန္နီဒေသခံများထံမှ သိရသည်။

အလားတူ ဇူလိုင်လ ၁၄ ရက်တွင်လည်း လူအများ အိပ်မောကျချိန် နံနက် ၂ နာရီခန့်တွင် စစ်ကောင်စီတပ်မှ လောက်ကိုင်မြို့ တုံချိန်ရပ်ကွက်သို့ လေကြောင်းဖြင့် နှစ်ကြိမ် ဗုံးကြဲတိုက်ခိုက်ခဲ့ရာ အရပ်သားတစ်ဦး သေဆုံး၍ တစ်ဦး ထိခိုက်ဒဏ်ရာရရှိခဲ့ကြောင်း The Kokang မီဒီယာတွင် သတင်းဖော်ပြထားသည်။

ထို့အပြင် ထို့အပြင် လောက်ကိုင်မြို့ တုံချိန်ရပ်ကွက် Rainbow တံတားဘေးရှိ Royal Lover Hotel နှင့် Dongcheng International Hotel များအပြင် ဖူလီလိုက်နှင့် ဟွမ်ကျားလိဟွာ ဟိုတယ်များလည်း ထိခိုက်ခဲ့ပြီး ပေါက်ကွဲမှု ပြင်းထန်သောကြောင့် အနီးဝန်းကျင်ရှိ အဆောက်အဦးများလည်း ပျက်စီးခဲ့သည်။

လက်ရှိတွင် လားရှိုးမြို့ကို ထိုးစစ်ဆင် တိုက်ခိုက်နေသည့် ကိုးကန့်တပ်ဖွဲ့ MNDAA သည် တရုတ်နိုင်ငံ၏ တောင်းဆိုမှုကြောင့်ဟုဆိုကာ ဇူလိုင်လ ၁၉ ရက်မှ ၃၁ ရက်အထိ ထပ်မံအပစ်ရပ်မည်ဟု ကြေညာထားသော်လည်း မြေပြင်တွင် အမှန်တကယ် တိုက်ပွဲရပ်တန့်ခြင်း မရှိဘဲ လားရှိုးမြို့ဒေသခံများမှာ မြို့ကို ဆက်လက်စွန့်ခွာ ထွက်ပြေးနေရကြောင်း ဒေသခံများက ပြောသည်။