သျှမ်းပြည် မိုင်းရယ်မြို့နယ်၌ ဟိုတိကျေးရွာအတွင်းနေထိုင်သည့် အမျိုးသားတစ်ဦးကို ယနေ့ (ဇူလိုင် ၂၂)ရက် နံနက် ၂နာရီဝန်းကျင်တွင် ကိုးကန့်တပ်ဖွဲ့ (MNDAA) က ပစ်သတ်ခဲ့ကြောင်း စုံစမ်းသိရသည်။
ဖြစ်စဥ်မှာ ယနေ့ (ဇူလိုင် ၂၂) ရက် နံနက် ၂နာရီတွင် စစ်ကောင်စီသည် မိုင်းရယ်မြို့နယ် ဟိုတိကျေးရွာအတွင်း MNDAA တပ် ရှိသည် ဆိုသော သတင်းကြောင့် လက်နက်ကြီးဖြင့် လှမ်းပစ်ခဲ့သည်။
ထို့လက်နက်ကြီးသံကြောင့် အသက် ၂၀ နှစ် အရွယ်ရှိ စိုင်းလင်း တို့မိသားစု ၃ဦးသည် ထိတ်လန့်ကာ ရွာတွင်းသို့ ပြေးဝင်လာစဥ် MNDAA စစ်ဆေးရေးဂိတ်တွင် ပစ်သတ်ခံလိုက်ရကြောင်း မိုင်းရယ်မြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“ စိုင်းလင်းတို့ မိသားစုက ရွာပြင်နားမှာနေကြတာ။ အဲ့မှာ လက်နက်ကြီးသံကြေားတော့ သူတို့ မိသားစု က လန့်ပြီး ရွာထဲကို ပြေးဝင်လာတာ၊ ကိုးကန့်တပ်သားတွေရှိတဲ့ဂိတ်ရောက်တော့ ပစ်သတ်ခံရတာ” မိုင်းရယ်ဒေသခံ အမျိုးသားတစ်ဦးက ပြောသည်။
ထိုထွက်ပြးလာချိန်တွင် စိုင်းလင်းနှင့်အတူ အသက် ၄နှစ်အရွယ်သမီးနှင့် ဇနီးလည်း လိုက်ပါလာသည်။
ယနေ့ (ဇူလိုင် ၂၂)ရက် နံနက် ၂နာရီ တွင် စစ်ကောင်စီ၏ လက်နက်ကြီး ပစ်ခတ်မှုကြောင့် ဟိုတိကျေးရွာအတွင်းရှိ နေအိမ်များကို ထိမှန်ခဲ့သည့်အပြင် ထွက်ပြေးတိမ်းရှောင်နေသူများလည်းရှိနေကြောင်း သိရသည်။
“ကျနော်တို့က စိတ်ပူရတယ် ဆန်စပါးတွေလုပ်ဖို့လည်း ရှိသေးတယ်။နောက်နှစ်တွေအတွက်ပါစိတ်ပူရတာပေါ့ သွားလုပ်ဖို့ကလည်း မသွားရဲဘူး။လူကြီးနဲ့ကလေးတွေကလည်း များတယ်။တချို့တွေကလည်း ပြေးနေကြတယ်။ တချို့တွေကလည်း ကျွဲ၊နွားတွေများတော့ စိတ်ပူပြီး စောင့်နေရသေးတယ်။”ဟု ၎င်းက ပြောသည်။
ဟိုတိကျေးရွာတွင် အိမ်ခြေ ၁၂၀ ခန့်ရှိနေပြီး မိုင်းရယ်မြို့နှင့် ၁၆ မိုင်ခန့်သာ ကွာဝေးကြောင်းသိရသည်။
လက်ရှိ မိုင်းရယ်မြို့နယ်တွင် ကိုးကန့်တပ်ဖွဲ့ MNDAA၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA နှင့် စစ်ကောင်စီတို့သွားလာလုပ်ရှားနေကြောင်း သိရသည်။
အလားတူ ပြီးခဲ့သည့် (ဇူလိုင် ၂၀)ရက်တွင်လည်း မန္တလေးမြို့မှ လားရှိုးမြို့သို့ ပြေးဆွဲနေသည့် ကားသမားအမျိုးသား တစ်ဦး တန့်ယန်းလမ်းခွဲရှိ MNDAA တပ်စွဲထားသည့် ဂိတ်ကို ဖြတ်သန်းရန် ပြုလုပ်နေစဥ် ပစ်သတ်ခံရကြောင် သိရသည်။
Leave a Comments