အာဏာသိမ်း စစ်ကောင်စီတပ်ဖွဲ့အပါအဝင် ပဋိပက္ခအတွင်း ပါဝင်နေကြသည့် အဖွဲ့များအားလုံး စာသင်ကျောင်းများကို မတိုက်ခိုက်ရန် ရန်ကုန်ဗြိတိန်သံရုံးက တောင်းဆိုလိုက်သည်။

မြန်မာနိုင်ငံတွင် စာသင်ကျောင်းများ အဖျက်ဆီးခံနေရပြီး အရပ်သားများလည်း စိုးရိမ်ရအောင် ထိခိုက်မှုရှိနေရုံသာမက ပညာရေးအခွင့်အလမ်းများလည်း ဆုံးရှုံးနေသည်ကိုတွေ့နေရကြောင်း ရန်ကုန်ရှိ ဗြိတိသျှသံရုံးဆက်သွယ်ရေးဆိုင်ရာ တာဝန်ခံ မစ္စ Lisa Gill က ဇူလိုင် ၂၁ရက် တနင်္ဂနွေနေ့တွင် ကြေညာချက်ထုတ်ပြန်ကာ ပြောဆိုခဲ့သည်။

စာသင်ကျောင်းများသည် လုံခြုံစိတ်ချရပြီး အခွင့်အလမ်းများအတွက် လမ်းဖွင့်ပေးရမည့်နေရာတစ်ခုဖြစ်သည့် အတွက် ပဋိပက္ခအတွင်း ဖျက်ဆီးခြင်းကို ရှောင်ကြရန် မစ္စ Lisa Gill ကပြောသည်။

လေကြောင်းတိုက်ခိုက်မှုကိုရှောင်ပြီး အရပ်သားများ ဘေးကင်းလုံခြုံအောင် ဆောင်ရွက်ပေးရန်၊ စာသင်ကျောင်းများအပါအဝင် အရပ်ဘက်အခြေခံ အဆောက်အုံများကို အကာအကွယ်ပေးရန် အထူးသဖြင့် စစ်တပ်အပါအဝင် ပဋိပက္ခအတွင်း ပါဝင်နေကြသည့် အဖွဲ့အားလုံးကို ရန်ကန်ရှိဗြိတိသျှသံရုံးက ထပ်မံတောင်းဆိုလိုက်ခြင်းဖြစ်သည်။

၂၀၂၁ ဖေဖော်ဝါရီလ စစ်တပ်အာဏာသိမ်းပြီးနောက်ပိုင်း မြန်မာနိုင်ငံမှာ စာသင်ကျောင်းများနှင့် ပတ်သက်ပြီး အကြမ်းဖက်မှုဖြစ်ရပ် ၁၇၄ ခုရှိကြောင်း မြန်မာ့အရေးနှင့် မြန်မာ့ပညာရေးဆိုင်ရာ စောင့်ကြည့်လေလာနေသည့် Myanmar Witness က ဇူလိုင် ၂၀ ရက်တွင် အစီရင်ခံစာထုတ်ပြန်ထားသည်။

စာသင်ကျောင်းများသည် လေကြောင်းတိုက်ခိုက်ခံရခြင်း၊ လက်နက်ကြီးနှင့် ပစ်ခတ်တိုက်ခိုက်ခြင်းအပြင် မီးလောင်းကျွမ်းခံရခြင်းများကြောင့် ပျက်စီးဆုံးရှုံးခဲ့ကြရသည်ကိုတွေ့ရပြီး တချို့တွင် အကြိမ်းပေါင်းများစွာ အဖျက်ဆီးခံရသည်ဟု Myanmar Witness ၏အစီရင်ခံစာတွင် ဖော်ပြထားသည်။

ထိုကဲ့သို့ အဖျက်ဆီးခံခဲ့ရသောကြောင့် မြန်မာနိုင်ငံမှ ကလေးများ၏ ပညာရေးအပေါ်တွင် လက်ရှိမှာရော ရေရှည်အတွက်ပါ ထိခိုက်ခဲ့သည်ဟု အစီရင်ခံစာက ဖော်ပြထားသည်။