သျှမ်းပြည် မြောက်ပိုင်း တန့်ယန်းမြို့နယ်အတွင်း ယမန်နေ့ ( ဇူလိုင် ၂၀)ရက် နံနက် ၅နာရီဝန်းကျင်တွင် ကားသမားတစ်ဦးကို ကိုးကန့်တပ်ဖွဲ့ (MNDAA) က ပစ်သတ်ခဲ့ကြောင်း စုံစမ်းသိရသည်။

ဖြစ်စဉ်မှာ မန္တလေးမြို့မှ လားရှိုးမြို့သို့ ပြေးဆွဲနေသည့် အသက် ၂၆နှစ်အရွယ်ရှိ ကားသမား ကိုဝေယံထွန်း သည် ယမန်နေ့ (ဇူလိုင် ၂၀)ရက် နံနက်ပိုင်းတွင် တန့်ယန်းလမ်းခွဲရှိ MNDAA တပ်စွဲထားသည့် ဂိတ်ကို ဖြတ်သန်းရန် ပြုလုပ်နေစဥ် ပစ်သတ်ခံရကြောင်း မျက်မြင်တွေ့ရှိသည့် ကားသမားတစ်ဦးက သျှမ်းသံတော်ဆင့်ကိုပြောသည်။

ထိုပစ်သတ်မှုကြောင့် ကိုဝေယံထွန်း ပွဲချင်းပြီး သေဆုံးခဲ့ပြီး၊ ကားသမားနောက်တစ်ဦးမှာ ကျည်စအနည်းငယ် ထိမှန်ခဲ့ကြောင်း ၎င်းက ပြောသည်။

“ ကိုဝေယံထွန်း က တန့်ယန်းလမ်းခွဲ မှာရှိတဲ့ ကိုးကန့်တပ်တွေရဲ့ ဂိတ်ကို ဖြတ်ဖို့ ကြိုးစားနေချိန်မှာ။ ဖြတ်လို့မရတော့ ပြန်လှည့်ဖို့ လုပ်နေချိန် ကိုးကန့်တပ်သား က သေနတ်နဲ့ပစ်လိုက်တာ။ လည်ပင်းကို ထိပြီး ပွဲချင်းပြီးသေသွားတယ်။ နောက်တစ်ယောက်က ကားမှန်စတွေ လွှင့်စင်တာထိတယ်။ အရမ်းမများဘူး” ဟု မျက်မြင်တွေ့ရှိသည့် ကားသမားက ဆိုသည်။

လက်ရှိ ကိုဝေယံထွန်း၏ ရုပ်အလောင်းကို နမ့်ပေါင်ဆေးရုံတွင် ပို့ဆောင်ထားကြောင်းသိရသည်။

လက်နက်ကိုင်တပ်ဖွဲ့များအနေဖြင့် ကားသမားကို မသင်္ကာမှုဖြစ်ပါက ခေါ်ယူစစ်ဆေးနိုင်ကြောင်း၊ ကားသမားများသည် လက်နက်မရှိသည့် အရပ်သားများဖြစ်ကြောင်း ယခုကဲ့သို့ ပြုလုပ်ခြင်းသည် လွန်စွာဆိုးရွားသည့် လုပ်ရပ်ဖြစ်ကြောင်း ကားသမားများက ပြောသည်။

“ အရင်က သူတို့ဂိတ်ကို ဖြတ်ဖို့ကြိုးစားရင် ပြန်ပဲလှည့်ခိုင်းတာ အခုက လှည့်တောင်မခံဘူး သေနတ်နဲ့ ပစ်လိုက်တာ ရုပ်ဆိုးလွန်းတယ်။ မသင်္ကာရင် ခေါ်စစ် မေးမြန်းလို့ရတယ်လေ” ဟု မန္တလေး -လားရှိုး ပြေးဆွဲနေသည့် ကားသမား တစ်ဦးက သျှမ်းသံတော်ဆင့်ကိုပြောသည်။

သျှမ်းပြည်မြောက်ပိုင်းတကြောတွင် လက်ရှိမှာ စစ်ကောင်စီတပ် နှင့် ကိုးကန့်တပ် (MNDAA) ၊ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA)တို့ စစ်ရေး ပြင်းထန်နေသည့် အချိန်ဖြစ်ကြောင်းသိရသည်။

သို့သော် MNDAA တပ်ဖွဲ့သည် တရုတ်အစိုးရ၏ တောင်းဆိုမှုကြောင့် ဇူလိုင် ၃၁ရက်ထိ အပစ်ရပ်မည်ဟု ကြေညာထားသော်လည်း အပစ်ရပ်ကာလအတွင်း စစ်ကောင်စီ၏ တိုက်ခိုက်ခြင်းခံရလျှင် ခုခံကာကွယ်သည့် တန်ပြန် တိုက်ခိုက်မှုများကို သင့်လျော်သလို လုပ်ဆောင်သွားမည်ဟု ဇူလိုင် ၁၉ရက်တွင် ထုတ်ပြန်ခဲ့သည်။

ထို့ကြောင့် MNDAA တပ်ဖွဲ့ တဖက်သက် အပစ်ရပ်ထားသည့်အချိန် အရပ်သားများအနေဖြင့် မိမိနေရပ်ကို အရဲစွန့်ပြီး ပစ္စည်းပြန်မယူရန်၊ ကားသမားများလည်း အရဲစွန့်ပြီးမသွားလာကြရန် မန္တလေး-လားရှိုး ပြေးဆွဲနေသည့် ကားသမားများက ပြောသည်။

“လက်ရှိ အပစ်ရပ်လို့ပြောဆိုပေမယ့်တဖက်မှာလည်း တိုက်နေကြတုန်းပါ။ နောက်ပြီးနယ်မြေစိုးမိုးမှု နေရာယူထားတဲ့ လက်နက်ကိုင်တွေ အနေနဲ့လည်း ပြည်သူတွေကို လက်နက်နဲ့ခြိမ်းခြောက်တာတွေ မပြုလုပ်စေချင်ဘူး။ ” ဟု အထက်ပါ ကားသမားတစ်ဦးက ဆိုသည်။

MNDAA သည် တရုတ်အစိုးရ တောင်းဆိုမှုကြောင့် ဇူလိုင် ၁၉ရက်မှ ဇူလိုင် ၃၁ရက်ထိ ၁၂ရက်သာ အပစ်ခတ်ရပ်စဲထားသော်လည်း ယနေ့ လက်ရှိအချိန်ထိ စစ်ကောင်စီတပ်ဖွဲ့သည့် လားရှိုးမြို့၊ မိုးကုတ်မြို့တွင်း လေကြောင်းဗုံးကြဲတိုက်ခိုက်နေကြောင်း သတင်းရရှိသည်။