သျှမ်းပြည် ညောင်ရွှေမြို့နယ် စံကားဒေသတွင် စစ်ကောင်စီတပ်နှင့် ကရင်နီလက်နက်ကိုင် တော်လှန်ရေးအင်းအားစုများအကြား တိုက်ပွဲဖြစ်ပွားကာ ကလေးအပါအဝင် အရပ်သား ၃ ဦးထိခိုက်ဒဏ်ရာ ရရှိခဲ့ကြောင်း ဒေသခံတစ်ဦးက ပြောသည်။
ဖယ်ခုံမြို့နှင့် မိုင် ၅၀ ခန့်သာကွာဝေးသည့် စံကားကျေးရွာအနီးကို နှစ်ဘက်တပ်ဖွဲ့ အပြန်အလှန် စစ်ကြောင်းထိုးလာသောကြောင့် ဇူလိုင် ၁၉ ရက်မှစ၍ ထိတွေ့တိုက်ပွဲဖြစ်ပွားခဲ့ကြောင်း စံကားဒေသခံ တစ်ဦးက သျှမ်းသံတော်ဆင့်ကိုပြောသည်။
“ ကလေး (PDF) တွေကျတော့ ရေပူ၊ ဘုရားတောင်ဘက်မှာရောက်နေတာကြာပြီ။ ဒါပေမဲ့ မနေ့ရှေ့တစ်ရက်က ဒီဘက်ကိုတက်လာတာ။ ဒီဘက်ကိုလည်း စစ်တပ်က စစ်ကြောင်းထိုးဆင်းလာတာ။ မနေ့က စံကားအရှေ့ဘက် တောင်ခြမ်းမှာလာဆုံပြီး ထိတွေ့တိုက်ပွဲဖြစ်ကြတာ” ဟု ၎င်းကရှင်းပြသည်။
ယနေ့ (ဇူလိုင် ၂၀) ရက် နံနက် ၁၀ နာရီဝန်းကျင်မှစပြီး အင်းစံကားကျေးရွာအုပ်စုတွင် တိုက်ပွဲဆက်ဖြစ်နေပြီး ကုန်းသာကျေးရွာ အရှေ့ဘက်တောင်ကြောတွင် လက်နက်ကြီး ၄ လုံးကျသလို စံကားလေဆိပ်၊ မြို့ဟောင်း၊ ဘုရားတောင်၊ ရေပူ၊ နမ်းဗွန် စသည့်ကျေးရွာအသီးသီးတွင် လက်နက်ကြီးကျရောက်ပေါက်ကွဲမှုရှိကြောင်း သိရသည်။
လက်နက်ကြီးကျရောက်ပေါက်ကွဲမှုကြောင့် ထီးကာရွာ ကလေးအပါအဝင် အရပ်သား ၃ ဦးထိခိုက်ပြီး နေအိမ်များလည်း ကျည်စထိမှန်ခဲ့ကြောင်း စံကားဒေသခံတစ်ဦးက ဆက်ပြောသည်။
“ဒီနေ့မြို့ဟောင်းမှာလည်း လက်နက်ကြီး လေးလုံးကျတယ်။ ထီးကာရွာထဲမှာလည်း ဒီနေ့နေ့လည်က လက်နက်ကြီး ၆ လုံးကျတာ လူ ၃ ယောက်ထိတယ်။ ကလေးတစ်ယောက်ပါတယ်။ ပြီးတော့ ဒီဘက်ဆင်းလာရင် လုံကန်ရွာရှိတယ်။ လုံကန်ဈေးမှာလည်း ကျတယ်” ဟု ပြောသည်။
လက်နက်ကြီးသည် ပင်လောင်းမြို့ရှိ စစ်ကောင်စီတပ်အထိုင်ချထားသော အမြှောက်တပ်မှနေ၍ ပစ်ခတ်ခဲ့ခြင်း ဖြစ်သည်။
ထိုတိုက်ပွဲကြောင့် ဟူးရန်း၊ ထီဟန်းတား၊ နမ်းဗွန်၊ အောင်ချမ်းသာနှင့် ဆည်ခေါင်း စသည့် ကျေးရွာများမှ ဒေသခံနှင့် စစ်ဘေးရှောင်များ ထောင်နှင့်ချီ ထပ်မံထွက်ပြေးတိမ်းရှောင်နေရကြောင်း သိရသည်။
“အခုကအကုန်လုံးရှောင်ကုန်ပြီ။ အရင်တုန်းက ကရင်နီပြည်က စစ်ဘေးရှောင်တွေ ကျနော်တို့ဘက်မှာ လာနေကြတာကြာပြီ။ အခုကျတော့ အဲ့ဒီစစ်ဘေးရှောင်အပြင် ရွာခံတွေပါ အကုန်လုံးရှောင်နေရတယ်။ တချို့ အနောက်ကမ်းက မိသားစု၊ ဆွေမျိုးဆီကိုပြေးကြတာပေါ့။ အကုန်လုံး အကုန်လုံး ရွာလုံးကျွတ်ဘဲ ပြေးကြတာ” ဟု အင်းစံကား စစ်ဘေးရှောင်အမျိုးသားတစ်ဦးက ပြောသည်။
လက်ရှိ တိုက်ပွဲအတွင်း စစ်ကောင်စီတပ်ဘက်က ဦးတည်ရာမဲ့ လက်နက်ကြီးဖြင့် ရမ်းသမ်းပစ်ခတ်မှုများ ပြုလုပ်သောကြောင့် နေရပ်ပြန်ပြီး ပစ္စည်းသယ်ယူခြင်း၊ အင်းထဲ လှေစီးပြီး ဖြတ်ကူးခြင်း မပြုလုပ်ကြရန် စံကားကျေးရွာဒေသခံ အမျိုးသားတစ်ဦးက သတိပေးထားသည်။
“စစ်ကောင်စီကတော့ တစ်နေ့တစ်နေကုန် လက်နက်ကြီးပစ်ပြီး၊ ဒီညထပ်ပစ်မှာလည်း ကြောက်နေတယ်။ ရွာထဲကျမှာကိုကြောက်နေရတာပေါ့။ ပြီးတော့ လေယာဉ်နဲ့ ထင်ရာကြဲချမှာကိုလည်း ကြောက်နေရတယ်။ ဒါကြောင့် အခုဒေသခံတွေ၊ စစ်ဘေးရှောင်တွေနဲ့ ရွာကိုပြန်တာမလုပ်ကြဖို့” ၎င်းက ထပ်လောင်းပြောသည်။
လက်ရှိမှာ စံကားအင်း၏ အရှေ့ဘက်ကမ်း၊အနောက်ဘက်ကမ်းကို လှေဖြင့်သွားရပြီး၊ ညဘက်တွင် ရှောင်ကာ နံနက်အချိန်မှ ရွာပြန်မည်ဖြစ်ကြောင်း ၊စစ်ကောင်စီတပ်ကိုလည်း ထီရိရွာမှ လှမ်းမြင်နေတွေ့နေရကြောင်း ဒေသခံများကပြောသည်။
“ပင်လောင်းဘက်တောင်ပေါ်နေလည်း စစ်ကောင်စီကို လှမ်းမြင်နေရတယ်။ လှေအသွားအလာမြင်ရင် အကုန်လုံးလိုက်ပစ်တယ်။ ဒါကြောင့်အခုရှောင်နေတဲ့နေရာမှာ ငြိမ်ငြိမ်နေကြဖို့ ပြောချင်တယ်” ဟု ယင်းအမျိုးသားက ဆိုပြန်သည်။
ထို့အပြင် လက်နက်ကိုင်တော်လှန်ရေးအင်းအားစုဘက်ကလည်း လှေစီးပြီး ကျေးရွာအနီး လှေဆိုက်ကပ်ခြင်း မပြုလုပ်ကြရန်၊ ကျေးရွာနှင့်ဝေးရာကမ်းတွင် လှေဆိုက်ကပ်ကြရန် ၎င်းကတောင်းဆိုထားသည်။
Leave a Comments