တရုတ်နိုင်ငံ၏ တောင်ဆိုမှုကြောင့် ကိုးကန့်တပ်ဖွဲ့ (MNDAA)သည် ဇူလိုင်လ ၃၁ရက်ထိ ယာယီ အပစ်ရပ်ထားမည် ဖြစ်ကြောင်း ယနေ့ (ဇူလိုင် ၁၉)ရက်စွဲဖြင့် ထုတ်ပြန်ကြေညာလိုက်သည်။ 

အဆိုပါထုတ်ပြန်ချက်တွင် MNDAA မှ တရုတ် အာဏာပိုင်၏ တောင်းဆိုချက်ကြောင့်  ဇူလိုင် ၁၉ရက်မှ ဇူလိုင် ၃၁ရက်ထိ ၁၂ရက်ကြာ အပစ်ခတ်ရပ်စဲမည်ဟု ဖော်ပြထားသည်။ 

သို့သော် MNDAA ဘက်မှ စတင်ထိုးစစ်ဆင်ခြင်းများ ရပ်တန့်နှင့်  လေကြောင်းရန် ကာကွယ်ရေး အစီအမံများကို ဆောင်ရွက်သွားကြမည်ဖြစ်ပြီး၊ အပစ်ရပ်ကာလအတွင်း စစ်ကောင်စီ၏ တိုက်ခိုက်ခြင်း ခံရပါက ခုခံကာကွယ်သည့် တန်ပြန် တိုက်ခိုက်မှုများကို သင့်လျော်သလို လုပ်ဆောင်သွားမည်ဖြစ်ကြောင်း ထုတ်ပြန်ချက်တွင် ရေးသားထားသည်။

MNDAA ၏ ဇူလိုင် ၃၁ရက်ထိ အပစ်ရပ်သည့် ကိစ္စထုတ်ပြန်လာပြီးနောက် လားရှိုးမြို့ ဒေသခံအမျိုးသား တစ်ဦး က “ သူတို့ အပစ်ရပ်တုန်း တခြားကို ပြောင်းရမယ်ထင်တယ်။ တဖက်က အပစ်ရပ် တဖက်က လေကြောင်းနဲ့ ဗုံးကြဲ၊ အခု တိုက်ပွဲက ဘယ်ကို ဦးတည်နေလဲမသိတော့ဘူး။ ကျနော်တို့ ပြည်သူတွေ အိုးအိမ်တွေ သေကြေ ပျက်စီးနေပြီ၊ စစ်အာဏာကို အမြစ်ဖြတ်ဖို့ထက် နယ်မြေအပြိုင်ချဲ့နေတယ် လို့ပဲမြင်တယ်” ဟု သျှမ်းသံတော်ဆင့်ကိုပြောသည်။

စစ်အာဏာအမြစ်ဖြတ်ဖို့ တော်လှန်ရေးပြုလုပ်သည့် အဖွဲ့တိုင်းသည် အရပ်သားထိခိုက်မှု သေကြေမှု အနည်းဆုံးကို ကြည့်ကြမည်ဖြစ်ကြောင်း၊ လက်ရှိ အပစ်ရပ်စဲကိစ္စများကို ကြည့်မည်ဆိုလျှင်လည်း တရုတ်အစိုးရ၏ တောင်းဆိုမှုများကြောင့်သာဖြစ်နေသည်ကိုတွေ့ရကြောင်း လားရှိုးမြို့ ဒေသခံ အမျိုးသားတစ်ဦးက ထောက်ပြပြောသည်။

ပြီးခဲ့သည့် ဇူလိုင်လ ၁၅ ရက်နေ့မှ ၁၈ ရက်နေ့အထိ အရှေ့မြောက် တိုင်းစစ်ဌာနချုပ် ရမခ အခြေစိုက်ရာ လားရှိုးမြို့ကို ထိုးစစ်ဆင်တိုက်ခိုက်ရန် MNDAA က လေးရက်ကြာ အပစ်ရပ်ကြေညာခဲ့သည်။ 

ထိုကြေညာချက်ထုတ်ပြီးနောက် MNDAA ထိန်းချုပ်သည့် သိန္နီမြို့ပေါ်သို့ စစ်ကောင်စီ တပ်မှ လေကြောင်းဖြင့် ဇူလိုင် (၁၈)ရက်တွင် ဗုံးကြဲတိုက်ခိုက်ခဲ့ပြီး အရပ်သား (၁၀)ဦးထက်မနည်း သေဆုံးခဲ့ရပြီး၊ ဒဏ်ရာရရှိသူ (၂၀)ကျော်ရှိကြောင်း သိရသည်။

လွန်ခဲ့သည့် ဇူလိုင် ၁၄ရက်မှ ၁၈ရက်ထိ သျှမ်းပြည် မြောက်ပိုင်း တွင် တဖက်သက် အပစ်ခရပ်ရန် ညွှန်ကြားထားရာ စစ်ကောင်စီ၏ လေကြောင်းနှင့် လက်နက်ကြီးပစ်ခတ်မှုကြောင့် အရပ်သား ၁၈ ဦးသေဆုံးပြီး ၁၉ ဦးထိခိုက်ဒဏ်ရာရရှိခဲ့ကြောင်း ပလောင် (တအာင်း) အမျိုးသား လွတ်မြောက်ရေး တပ်မတော် (TNLA)က ထုတ်ပြန်ခဲ့သည်။