သျှမ်းမြောက်၊ လားရှိုးမြို့ ပြင်းပြင်းထန်ထန် တိုက်ခိုက်ခံနေရစဥ် စစ်ခေါင်းဆောင် မင်းအောင်လှိုင်က စစ်တိုင်းမှူး အပြောင်းအလဲ ပြုလုပ်ခဲ့သည်ဟု စစ်ရေးသတင်းရင်းမြစ်က ယနေ့ (ဇူလိုင်လ ၁၉ ရက်) တွင်ပြောသည်။
လားရှိုးမြို့ အခြေစိုက် အရှေ့မြောက်တိုင်း စစ်ဌာနချုပ် တိုင်းမှူးဖြစ်သူ ဗိုလ်ချုပ်စိုးတင့် (တေဇ-၁၆) နေရာတွင် မိတ္ထီလာမြို့ အခြေစိုက် တပ်မ (၉၉) တပ်မမှူး ဖြစ်သူ ဗိုလ်မှူးချုပ်စိုးလှိုင် အား ယမန်နေ့ (ဇူလိုင်လ ၁၈ ရက်နေ့) က အစားထိုး ခန့်အပ်ခဲ့သည်ဟု ဆိုသည်။
“အခု အစားထိုးလိုက်တဲ့ ဗိုလ်မှူးချုပ်စိုးလှိုင်က မင်းအောင်လှိုင်ရဲ့ ထီးတော်မိုး ဖြစ်ခဲ့ဖူးတယ်။ ဗိုလ်ချုပ်စိုးတင့် ကတော့ ဘယ်ရောက်မလဲ မသိဘူး” ဟု စစ်ရေးသတင်းရင်းမြစ်က ရှင်းပြသည်။
တိုင်းမှူး ဖြစ်လာသူ ဗိုလ်မှူးချုပ်စိုးလှိုင် သည် ပြီးခဲ့သည့် ၂၀၂၃ ခုနှစ်၊ ဒီဇင်ဘာလ ၁၀ ရက်နေ့က တပ်မ (၉၉) တပ်မမှူး ဖြစ်ခဲ့သူ ဖြစ်သည်။
ပြီးခဲ့သည့် “၁၀၂၇” စစ်ဆေးရေး ပထမပိုင်း စစ်ရပ်စဲသည့် ဇန်နဝါရီလ အတွင်းက ရမခ တိုင်းမှူး အဖြစ် ခန့်အပ်ခံခဲ့ရသူ ဗိုလ်ချုပ်စိုးတင့် သည် မင်းအောင်လှိုင် အားကိုးသူ တစ်ဦး ဖြစ်ပြီး မည်သည့် အတွက်ကြောင့် ယခုကဲ့သို့ အပြောင်းအလဲ ပြုလုပ်သည်ကို ရှင်းရှင်းလင်းလင်း မသိရသေးပေ။
လက်ရှိ မိတ္ထီလာ အခြေစိုက် တပ်မ (၉၉) မှ တပ်ရင်းများ မူဆယ်နှင့် မိုးကုတ်တွင် ရှိနေသည်။
လားရှိုးမြို့ ဆင်ခြေဖုံး ဒေသများတွင် ကိုးကန့်တပ်က တိုက်စစ်အရှိန်မြှင့် တိုက်ခိုက်နေသဖြင့် ယနေ့ညပိုင်း တိုက်ပွဲ ပြင်းထန်နေပြီး မြို့တွင်း တိုက်ပွဲများ ဖြစ်လာနိုင်သည်ဟု စစ်ရေးသတင်းရင်းမြစ်က သုံးသပ်ထားသည်။
Leave a Comments