သျှမ်းပြည် တောင်ပိုင်း ပင်လောင်းမြို့နယ်အတွင်းရှိ စစ်ကောင်စီ၏ စစ်ဆေးရေးဂိတ်တွင် စစ်ဆေးမှုကြမ်းပြီး ငွေကြေးတောင်းခံမှုများ ရှိနေကြောင်း သတင်းရရှိသည်။
ပြီးခဲ့သည့် ဇွန်လ နောက်ဆုံးပတ်မှ စ၍ ပင်လောင်းမြို့နယ်တွင်းရှိ ထန်ငူဂိတ်နှင့် နောင်တီးဂိတ်တို့တွင် ရှိသော စစ်ကောင်စီ စစ်ဆေးရေးဂိတ်များတွင် စစ်ဆေးမှုများ ကြမ်းတမ်းကာ ကားတစ်စီးလျှင် ငွေကျပ် ၄ သောင်းမှ ၁ သိန်းအထိ ငွေကြေးကောက်ခံနေကြောင်း ပင်လောင်းမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“လမ်းခရီးမှာလည်း စစ်ဆေးတာ ကြမ်းတယ်။ ဆိုင်ကယ်နဲ့ သွားတာတောင် စစ်တယ်။ PDF ဆိုပြီး စွပ်စွဲတယ်၊ ရစ်တယ်။ ကားတွေနဲ့ သွားရင်တောင် ပစ္စည်းတွေကို ကြည့်ပြီး ပိုက်ဆံတောင်းတယ်၊ နည်းရင်နည်းသလို များရင်များသလိုကို တောင်းနေတာ”ဟု ၎င်းအမျိုးသားက ပြောသည်။
ထိုစစ်ကောင်စီ စစ်ဆေးရေးဂိတ်တွင် ငွေညှစ်တောင်းခံခြင်း၊ စစ်ဆေးမှု ကြမ်းတမ်းခြင်းကြောင့် အချို့သော ဒေသခံများသည် တောလမ်းကိုသာ အသုံးပြုသွားလာနေကြောင်း သိရသည်။
ပင်လောင်းမြို့နယ်တွင်း တိုက်ပွဲများကြောင့် ညောင်ရွှေမြို့သို့ ထွက်ပြေးလာသော စစ်ဘေးရှောင် တစ်ထောင်ကျော်လည်း အလှူရှင်မရှိသည့်အတွက် စားနပ်ရိက္ခာများ လိုအပ်နေကြောင်း သိရသည်။
ပင်လောင်းမြို့နယ်အတွင်း ပြီးခဲ့သည့် ဇူလိုင်လ ၁၇ ရက်ထိ စစ်ကောင်စီတပ်နှင့် ကရင်နီတော်လှန်ရေး အင်အားစုတပ်ဖွဲ့တို့ တိုက်ပွဲများ ဖြစ်ပွားလျက်ရှိပြီး လက်ရှိအချိန်ထိ ဒေသခံများ နေရပ်မပြန်နိုင်သေးကြောင်း ဒေသခံများက ပြောသည်။
Leave a Comments