သျှမ်းပြည် သိန္နီမြို့ကို စစ်ကောင်စီတပ်က ယမန်နေ့ ( ဇူလိုင် ၁၈) ရက် ညနေပိုင်းတွင် လေယာဉ်ဖြင့် ထပ်မံဗုံးကြဲသောကြောင့် လူ ၃ ဦးထက်မနည်းသေဆုံးသွားခဲ့ကြောင်း ဒေသခံတစ်ဦးက ပြောသည်။
ယမန်နေ့ ညနေပိုင်းတွင် သိန္နီမြို့မဈေးထဲကို စစ်ကောင်စီတပ်က ဗုံးတစ်လုံး ကြဲချသွားသည့်အပြင် ဈေးအရှေ့ လမ်းမဘေးနှင့်ကပ်လျပ် ဆိုင်ခန်းများကို တစ်လုံးနှင့် ရပ်ကွက် ၁ ခန်းမကို တစ်လုံး ဗုံးကြဲချသွားခဲ့ကြောင်း သိန္နီမြို့ ဒေသခံ အသက် ၃၀ ကျော်အမျိုးသားတစ်ဦးက သျှမ်းသံတော်ဆင့်ကိုပြောသည်။
“သိန္နီဈေးထဲကို ၁ လုံးကြဲသွားတယ်။ ပြီးတော့ ဈေးရှေ့လမ်းမ နာရီပြင်ဆိုင်နားက ၁ လုံးနဲ့ ခန်းမဖက်ကို ၁ လုံးကြဲသွားတယ်။ နောင်အွန်ရွာဘက် လူငယ်တစ်ယောက်ရယ်၊ ဈေးထဲက နာရီပြင်ဆိုင် တစ်ယောက်နဲ့ အမျိုးသမီးတစ်ယောက် သေတယ် ” ဟု ၎င်းကပြောသည်။
စစ်ကောင်စီတပ် ဗုံးကြဲမှုအတွင်း အမျိုးသား ၂ ဦးနှင့် အမျိုးသမီး ၁ ဦးသေဆုံးသွားခဲ့ကြောင်း၊ နေအိမ်များနှင့် ဆိုင်ခန်းများ ထိခိုက်ပျက်ဆီးသွားခဲ့ကြောင်း ဆိုသည်။
“ညနေချိန်ဆို ဈေးအရောင်းအဝယ်နဲ့ လူစည်ကားတဲ့အချိန်ပါ။ ဟင်းသီးဟင်းရွက်၊ သစ်သီးဝလံ ဆိုင်တွေလည်းရှိတယ်။ လူတွေမထင်ထားတဲ့အချိန်ပေါ့ လာကြဲချသွားတာ” ဟု သိန္နီမြို့ခံတစ်ဦးက ဆက်ပြောသည်။
လက်ရှိ သိန္နီမြို့ဒေသခံများသည်လည်း ညအချိန်တွင် မြို့ထဲ၊ နေအိမ်ထဲ၌ မနေရဲတော့ကာ လေယာဉ်မပစ်နိုင်ဟု ယူဆရသည့် တောင်ပေါ်၊ ဘုန်းကြီးကျောင်းများတွင် သွားအိပ်နေကြရကြောင်း သိရသည်။
ပြီးခဲ့သည့် ဇူလိုင် ၃ ရက် ညသန်းခေါင်ကျော်တွင်လည်း သိန္နီမြို့ကို စစ်ကောင်စီတပ်မှ ဂျက်လေယာဉ်ဖြင့် ဗုံး ၃ လုံး လာရောက်ကြဲချခဲ့သဖြင့် နေအိမ် ၁၀ လုံးထက်မနည်း ထိခိုက်ပျက်စီးသွားခဲ့ကြောင်း ဒေသခံများက ပြောသည်။
Leave a Comments