သျှမ်းပြည် ပင်လောင်းမြို့နယ် ဆောင်းပြောင်းကျေးရွာတွင် ဖြစ်ပွားခဲ့သော တိုက်ပွဲအတွင်း စစ်ကောင်စီ လက်အောက်ခံ ပြည်သူ့စစ်တပ်ဖွဲ့ဝင်များ သေဆုံးခဲ့သည်ဟု PNDF-KK က ယမန်နေ့ (ဇူလိုင် ၁၇ )ရက်တွင် ဓာတ်ပုံနှင့်အတူထုတ်ပြန်ထားသည်။

ဇွန်လ ဒုတိယအပတ်မှစပြီး စစ်ကောင်စီတပ်နှင့် ပြည်သူ့စစ် PNO တို့သည် ဖယ်ခုံမြို့ရှိ စစ်ကောင်စီတပ်များကို စစ်ကူပေးရန် စစ်ကြောင်းထိုးလာခြင်းဖြစ်ပြီး ယခုအခါ မြို့အနောက်မြောက်ဘက် ၁၁ မိုင်ကျော်အကွာရှိ ဆောင်းပြောင်းရွာတွင် ရောက်ရှိကာ လက်နက်ကိုင်တော်လှန်ရေးအင်အားစုက ဟန့်တားတိုက်ခိုက်နေခြင်း ဖြစ်သည်။

တိုက်ပွဲအတွင်း သေဆုံးသွားသော စစ်ကောင်စီ၏ ပြည်သူ့စစ်တပ်ဖွဲ့ဝင် တစ်ဦးထံမှ စိတ်ကြွဆေးပြားများ အလောင်းပေါ်တွင် လက်ဝယ်တွေ့ရှိရကြောင်း၊ ဟိုပုံးကိုရင်လေးနာမည်ပါ ကတ်ပြားတစ်ခုနှင့်အတူ သေဆုံးသူ ပြည်သူ့စစ်တပ်ဖွဲ့ဝင် အလောင်းလေးလောင်းရှိကြောင်း ထုတ်ပြန်ထားသောဓာတ်ပုံများအရ သိရသည်။

ထိုတိုက်ပွဲအခြေအနေနှင့် ပတ်သက်၍ သျှမ်းသံတော်ဆင့်မှ ပအိုဝ်းအမျိုးသား ကာကွယ်ရေးတပ်ဖွဲ့-ခမ်းကောင် (PNDF-KK)ထံသို့ ဖုန်းဖြင့်ကြိုးစားဆက်သွယ်ခဲ့သော်လည်း မြေပြင်ဖုန်းလိုင်းကြောင့် ဆက်သွယ်၍မရသေးပေ။

ထို့အပြင် ကရင်နီအမျိုးသားများ ကာကွယ်ရေးတပ် KNDF ၏ပြန်ကြားရေးထံ စာပို့ပြီးမေးမြန်းခဲ့သော်လည်း လက်တလောတွင် အကြောင်းမပြန်သေးပေ။

ဇူလိုင် ဒုတိယအပတ်တွင်လည်း လွိုင်ကော်မြို့သို့ မောင်းနှင်းလာသည့် ပြည်သူ့စစ် PNO ၃ ဦးနှင့် နမ်းဖာမူတိုက်ပွဲတွင် ပြည်သူ့စစ် PNO ၄ ဦးကို KNDF ကအရှင်ဖမ်းမိထားသည်ဟု လက်နက်ကိုင်တော်လှန်ရေးတပ်ဖွဲ့ ဝင်တစ်ဦးက ပြောသည်။

ဆောင်းပြောင်းတိုက်ပွဲတွင် ပအိုဝ်းပြည်သူ့စစ် PNO မှ ဗိုလ်ကြီးအဆင့်ရှိ ခွန်မောင်မွေးလည်း သေဆုံးခဲ့ပြီး၊ စစ်ကြောင်းထိုးလာသည့် စစ်ကောင်စီတပ်ဖွဲ့ကို လက်နက်ကိုင် တော်လှန်ရေးအင်အားစုများက ဟန့်တားတိုက်ခိုက်သဖြင့် ဇူလိုင် ၂၉ ရက်က တပ်ဖွဲ့ဝင် ၁၀ ဦးသေဆုံးကာ လက်နက်ငယ်တချို့လည်း သိမ်းဆည်းရမိ ကြောင်း သိရသည်။

လက်ရှိ ပင်လောင်းမြို့နယ်အတွင်း တိုက်ပွဲကြောင့် စစ်ဘေးရှောင်များ ထွက်ပြေးတိမ်းရှောင်နေရဆဲဖြစ်ပြီး ၊စစ်ဘေးရှောင်အရေအတွက် သောင်းဂဏန်းအထိရှိကြောင်း စစ်ဘေးရှောင်ကူညီသူများကပြောသည်။