သျှမ်းပြည် တောင်ကြီးမြို့နယ်သို့ စစ်ဘေးရှောင် ၅၀၀ ကျော် ရုတ်တရက် ရောက်ရှိလာသဖြင့် အရေးပေါ် နေရာထိုင်ခင်း ခက်ခဲနေကြောင်း သတင်းရရှိသည်။

ဇူလိုင်လ ပထမပတ်မှ စတင်၍ လားရှိုးမြို့နယ်အတွင်း စစ်ကောင်စီနှင့် ကိုးကန့်တပ် (MNDAA) တို့ တိုက်ပွဲဖြစ်ပွားမှုကြောင့် လားရှိုးမြို့နယ် မှ ဒေသခံထောင်နှင့်ချီသည် သျှမ်းပြည်တောင်ပိုင်းဘက်သို့ ထွက်ပြေးတိမ်းရှောင်နေကြသည်။

ထို့ကြောင့် တောင်ကြီးမြို့ ပိဋကတ်ကျောင်း၊ ဝေဠုဝန်ကျောင်း၊ သျှမ်းစာပေနှင့် ယဉ်ကျေးမှုခန်းမ စသည့်နေရာများသို့ ရောက်ရှိနေသည့် စစ်ဘေးရှာင် (၅၀၀)ဝန်းကျင်သည် နေရာထိုင်ခင်းများ အရေးပေါ် လိုအပ်နေကြောင်း စစ်ဘေးရှောင် ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

“နေဖို့ထိုင်ဖို့ အိပ်ဖို့တွေ အတွက်က အဆင်မပြေဘူး။ ဘုန်းကြီးကျောင်းမှာက သံဃာတော်တွေရှိတယ်။ အဲ့ကြောင့် တချို့ ဘုန်းကြီးကျောင်းတွေက နေဖို့ ခက်ခဲတယ်။ စစ်ရှောင်အချို့က ဆိုင်ကယ်တွေနဲ့ လာကြတော့ အဝတ်တွေ စောင်တွေလည်း မပါလာဘူး။ လိုအပ်ချက်က အများကြီးပါပဲ” ဟု စစ်ဘေးရှောင် ကူညီပေးနေသူ အမျိုးသားက ဆိုသည်။

လားရှိုးမှ ထွက်ပြေးတိမ်းရှောင်လာသည့် စစ်ဘေးရှောင်များသည် တောင်ကြီးမြို့ပေါ်ရှိ ဆွေမျိုးအိမ်များတွင် နေထိုင်ကြသကဲ့သို့ ဆွေမျိုး မရှိသည့် အချို့သည် ဘုန်းကြီးကျောင်းများကိုသာ အားကိုးနေရသဖြင့် အချို့ ဘုန်းကြီးကျောင်းသည် စစ်ဘေးရှောင်များ လက်မခံကြောင်း တောင်ကြီးဒေသခံများက သျှမ်းသံတော်ဆင့်ကိုပြောသည်။

“တချို့ ဘုန်းကြီးကျောင်းတွေမှာ လူတော့မရှိဘူး။ သူတို့တွေ တချို့ဘုန်းကြီးကျောင်းတွေမှာ နားဖို့ တစ်ညအိပ်ဖို့ သွားတောင်းတာတောင်မှ လက်မခံဘူး။ ပြီးတော့ ကျောင်းကပြောတာ အရင်ကတည်းကလည်း လက်မခံဘူးလို့ပဲ ပြောတယ်။ ခုတော့ စစ်ဘေးရှောင်တွေ အတွက်တော့ နေထိုင်ဖို့ ခက်ခဲတာပေါ့”ဟု တောင်ကြီးမြို့ရောက် စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို့ကြောင့် တောင်ကြီးမြို့ပေါ်ရှိ အိမ်ရှင်များအနေဖြင့် စစ်ဘေးရှောင်များအတွက် အခန်းခ၊ အိမ်ငှားရမ်းခများ အဆမတန် မတောင်းခံရန်လည်း စစ်ဘေးရှောင်များက တောင်းဆိုကြသည်။

“ကျမတို့ကတော့ အိမ်ခန်းပဲ ငှားပြီးနေချင်တာ။ ဖြစ်နိုင်ရင်တော့ အိမ်ရှင်တွေ အခန်းခ သက်သာအောင် လုပ်စေချင်တယ်။ ၆ လစာ၊ ၃ လစာ တွေ မတောင်းဖို့ ပြောချင်တယ်။ ကျမတို့မှာက ငွေကြေးပြည့်စုံတာ မဟုတ်ဘူး” ဟု အသက် ၄၀ အရွယ်ရှိ ၎င်းစစ်ဘေးရှောင် အမျိုးသမီးက ဆက်ပြောသည်။

လက်ရှိအချိန်ထိ သျှမ်းပြည် မြောက်ပိုင်းတကြောတွင် စစ်ရေးအရှိန် ဆက်လက်မြင့်တက်နေပြီး စစ်ကောင်စီဘက်မှ လေကြောင်းဗုံးကြဲမှုများ ဆက်တိုက်ရှိနေသေးသဖြင့် စစ်ရှောင်များ နေရပ်ပြန်ရန် ခက်ခဲနေသေးကြောင်း သိရသည်။

ထို့ကြောင့် သျှမ်းပြည်မြောက်ပိုင်းမှ ထွက်ပြေးတိမ်းရှောင်လာသည့် စစ်ဘေးရှောင် ထောင်နှင့်ချီ သည် လက်ရှိမှာ စားနပ်ရိက္ခာများ အရေးပေါ် လိုအပ်နေကြောင်း စစ်ရှောင်ကူညီပေးသူများထံမှ သိရသည်။