သျှမ်းပြည် မိုင်းရယ်မြို့နယ်တွင် ဖြစ်ပွားသည့် တိုက်ပွဲများကြောင့် ဒေသခံအများအပြား ကျေးသီးမြို့နယ်ဘက်သို့ ထွက်ပြေးတိမ်းရှောင် နေကြကြောင်း စုံစမ်းသိရသည်။

ဇူလိုင်လ ပထမပတ်မှ စ၍ မိုင်းရယ်မြို့နယ်တွင် စစ်ကောင်စီတပ်နှင့် ကိုးကန့်တပ်ဖွဲ့ (MNDAA) တို့ ဖြစ်ပွားခဲ့သည့် တိုက်ပွဲများအကြား လုံခြုံရေးစိုးရိမ်မှုကြောင့် ဒေသခံပြည်သူများ အလုံးအရင်း ကျေးသီးမြို့နယ်သို့ ‌ထွက်ပြေးတိမ်းရှောင်လာကြသည်။

အဆိုပါ စစ်ဘေးရှောင်များသည် ကျေးသီးမြို့ရှိ ကျောင်းခမ်းဘုန်းကြီးကျောင်း၊ ကမ္မဌာန်းကျောင်းတို့တွင် တည်းခိုနေကြသကဲ့သို့ အချို့စစ်ဘေးရှောင်များသည် အိမ်ငှားရမ်းပြီး နေထိုင်ကြကြောင်း စစ်ဘေးရှောင်ကူညီသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဘုန်းကြီးကျောင်းတွေမှာ ရောက်နေတာကတော့ တစ်ရာကျော်ရှိမယ်။ အိမ်ငှားတဲ့သူ ဆွေမျိုးတွေ အိမ်မှာ နေတဲ့သူတွေ ရှိမယ်။ အချို့ကျတော့ ကျေးသီးမှာ ခဏနေပြီး တခြားမြို့နယ် ကို ဆက်သွားကြတယ်။ ရေရှည်ဆိုရင် စားသောက်ဖို့က ခက်ခဲမယ်”ဟု ကျေးသီးမြို့မှ စစ်ဘေးရှောင် ကူညီသူ အမျိုးသားတစ်ဦးက ဆိုသည်။

လက်ရှိအချိန်သည် မိုးတွင်းကာလ ဖြစ်သည့်အတွက် ကျေးသီးမြို့ပေါ် ဘုန်းကြီးကျောင်းများတွင် ရောက်ရှိနေသည့် စစ်ဘေးရှောင်များမှာ ခြင်ထောင်နှင့် အိပ်စောင်များ အရေးပေါ် လိုအပ်နေကြောင်း စစ်ဘေးရှောင် ကူညီသူများထံမှ သိရသည်။

“မိုးတွင်းဆိုတော့ တချို့တွေကလည်း စောင်တွေ၊ ခြင်ထောင်တွေ မပါလာတဲ့အတွက် ကျန်းမာရေး စိုးရိမ်ရတာယ်။ အခုစစ်ရှောင်တွေမှာ သက်ကြီးရွယ်အိုနဲ့ ကလေးတွေက ပိုများတယ်”ဟု ၎င်းစစ်ဘေးရှောင် ကူညီသူက သျှမ်းသံတော်ဆင့်ကို ဆက်ပြောသည်။

အရှေ့မြောက်ပိုင်း တိုင်းစစ်ဌာနချုပ် ရမခ အခြေစိုက်ရာ လားရှိုးမြို့ကို ထိုးစစ်ဆင်တိုက်ခိုက်နေသည့် တအာင်း(ပလောင်)တပ်ဖွဲ့ TNLA နှင့် ကိုးကန့်တပ်ဖွဲ့ MNDAA တို့မှ လေးရက်ကြာ တစ်ဖက်သက် အပစ်ရပ်ဆဲထားကြောင်း ကြေညာထားသော်လည်း သျှမ်းပြည်မြောက်ပိုင်း တခွင်တွင် စစ်ရေးတင်းမာမှုများ ဆက်လက်ပြင်းထန်နေသေးပြီး စစ်ဘေးရှောင်များလည်း ဘေးလွတ်ရာသို့ ဆက်လက်ထွက်ပြေး တိမ်းရှောင်နေကြသည်။