သျှမ်းပြည် တောင်ကြီးမြို့နယ် လယ်ယာမြေပေါ်တွင် ခွင့်ပြုချက်မရှိဘဲ နေအိမ်များဆောက်လုပ်ထားသည် ဟုဆိုကာ စစ်ကောင်စီ လက်အောက်ခံ မြို့နယ်သစ်တောဦးစီးဌာန၊ မြို့နယ်စည်ပင်သာယာရေးဌာနက ဖယ်ရှားခိုင်းနေကြောင်း ဒေသခံများကပြောသည်။
တောင်ကြီးမြို့၊ ညောင်ဖြူစခန်း ရပ်ကွက်၊ နယ်မြေ (၇) အတွင်းရှိ နေအိမ်တစ်လုံးကို အခွင့်အမိန့်မရရှိဘဲ တရားမဝင်လူနေအိမ် ဆောက်လုပ်ထားသည်ဟုဆိုကာ မြို့နယ်သစ်တောဦးစီးဌာန၊ မြို့နယ်စည်ပင်သာယာရေး ဌာနာက ဇူလိုင် ၁၃ ရက်၌ ဆင့်ခေါ်စာပို့ပြီး ဖယ်ရှားခိုင်းသည်ဟု တောင်ကြီးမြို့ ဒေသခံတစ်ဦး သျှမ်းသံတော်ဆင့်ကို ပြောသည်။
“လောလောဆယ် ညောင်ဖြူစခန်း၊ နယ်မြေ (၇) ဘက်ကကော၊ နောက်ပြီး ဒီဘက်စဝ်စံထွန်းတချို့လည်း ပါတယ်။ အဲ့နယ်မြေ (၇) ဘက်ကတော့ တချို့ဟာအိမ်နံပါတ်နဲ့ထွက်ထားတာရှိတယ်” ဟု ၎င်းကပြောသည်။
အဆိုပါ နေအိမ်များကို ၁၅ ရက်အတွင်း ရွှေ့ပြောင်းဖယ်ရှားပေးရမည်ဖြစ်ပြီး အကယ်၍ မဖယ်ရှားပေးပါက မြေနှင့်အခွန်စည်းမျဉ်းဥပဒေ၊ ပုဒ်မ ၂၅ (ဃ) နှင့် နည်းဥပဒေ ၆၉ (၂) တို့ဖြင့် အရေးယူမည်ဟု ခြိမ်းခြောက်ထားသည်။
လက်ရှိ တောင်ကြီးမြို့၏ အစွန်းအဖျားကျသည့် ရပ်ကွက်နယ်မြေအများအပြားကို ကျူးကျော်နယ်မြေအဖြစ် ဧက ၂,၀၀၀ ကျော်ကို သတ်မှတ်ပြီး စစ်ကောင်စီတပ်က သိမ်းဆည်းသွားမည်ဖြစ်ကြောင်း တောင်ကြီးမြို့ခံတစ်ဦးက ပြောသည်။
ထိုကိန်းဂဏန်းနှင့် ပတ်သက်ပြီး သျှမ်းသံတော်ဆင့်မှ သီခြားအတည်ပြုနိုင်ခြင်း မရှိသေးပေ။
ကျူးကျော်နယ်မြေအဖြစ် သတ်မှတ်ခံရသည့်နယ်မြေများမှာ ကရင်မရေထွက်နှင့် တောင်ကမ်းပါးအနီး ကပ်လျက်တည်ရှိသည့် ဝစ်စံထွန်း၊ ညောင်ဖြူစခန်း၊ ရတနာသီရိ၊ ချမ်းမြေ၊ ရွှေတောင်၊ စိန်ပန်း၊ ကံသာနှင့် ကျောင်းကြီးစု ရပ်ကွက်ထဲမှ တချို့ပါဝင်ကြောင်း သိရသည်။
“အခုကျမလည်း ကျောင်းကြီးစု၊ နယ်မြေ ၁၂ မှာ ဝယ်ထားတာ ပါသွားပြီလားမသိဘူး။ ကျမကတော့ နောက်နောင်နေလို့ ရအောင်ဆိုတဲ့စိတ်နဲ့ ဝယ်ထားတာ။ ဝယ်တုန်းကတော့ ပွဲစားတွေနဲ့ ဝယ်ထားတာ ၂ ကွက်ကို ကျပ်သိန်း ၉၀ လောက်ဘဲ ပေးရတာ။ ၁ ကွက်ကို ပေ ၁၀၀ ကျယ်တယ်” ဟု တောင်ကြီးမြို့ လယ်ယာမြေဝယ်ထားသူ အမျိုးသမီးတစ်ဦးက ပြောသည်။
အလားတူ မြို့ခံများနှင့် စစ်ဘေးရှောင်များအနေဖြင့် တောင်ကြီးမြို့ လယ်ယာမြေများ ဝယ်ပါက အထူးဂရုစိုက်ရန်လိုကြောင်း၊ အထူးသဖြင့် ပွဲစားများမှ ဈေးပေါပေါဖြင့် ရောင်းချသည့် လယ်ယာမြေများကို သစ်တောမြေ ဟုတ်၊ မဟုတ် စီစစ်ရန်လိုအပ်ကြောင်း ဆိုသည်။
အတည်မပြုနိုင်သေးသည့် သတင်းအချက်အလက်အရ တောင်ကြီးမြို့ရှိ Mount Pleasant guest house နှင့် လက်ရှိ ဖယ်ရှားခိုင်းထားသော နယ်မြေကုန်းများကို စစ်ကောင်စီတပ်က အထိုင်ချပြီး ဗျူဟာကုန်း နှစ်ဆင့်ဆောက်လုပ်သွားမည်ဟု သိရသည်။
ပြီးခဲ့သည့် ယမန်နှစ်တွင်လည်း တောင်ကြီးမြို့နယ် ဖာမွန်းကျေးရွာအုပ်စု ကံကြီးရပ်ကွက်အနီးရှိ မြေပွေးတောင်ကုန်းပေါ် နေအိမ်များကိုလည်း ခွင့်ပြုချက်မရှိဘဲ ဆောက်လုပ်ထားသည်ဟု စစ်ကောင်စီတပ်က ဖယ်ရှားခိုင်းခြင်း၊ နေအိမ်များကို သတိပေးစာများကပ်ခြင်း ပြုလုပ်ခဲ့ဖူးသည်။
Leave a Comments