သျှမ်းပြည် သီပေါမြို့နယ်ရှိ နမ့်လန်မြို့သို့ လားရှိုးမြို့နယ်မှ ထွက်ပြေးတိမ်းရှောင်လာသည့် စစ်ဘေးရှောင် ထောင်နှင့်ချီ ရောက်ရှိနေကြောင်း သတင်းရရှိသည်။

ပြီးခဲ့သည့် ဇူလိုင်လ ပထမပတ်မှစ၍ လားရှိုးမြို့တွင် ဖြစ်ပွားသည့် စစ်ကောင်စီတပ်နှင့် ညီနောင်မဟာမိတ်တပ်တို့ တိုက်ပွဲများကြောင့် သီပေါမြို့နယ် နမ့်လန်မြို့သို့ ထွက်ပြေးတိမ်းရှောင်လာသူ ထောင်နှင့်ချီ ရှိနေပြီး လက်ရှိတွင် ဘုန်းကြီးကျောင်း ၇ ကျောင်း၌ အိမ်ထောင်စု ၆၂၀ ခန့် လာရောက်ခိုလှုံနေကြကြောင်း နမ့်လမ်ဒေသခံများက ပြောသည်။

၎င်းစစ်ဘေးရှောင်များ ရေရှည်အတွက် စားနပ်ရိက္ခာ အကူအညီများ စိုးရိမ်ရကြောင်း စစ်ရှောင်ကူညီသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

“နမ့်လန်မှာက စစ်ဘေးရှောင်တွေ ပိုများလာတယ်။ ရောက်နေတာက အိမ်ခြေ ၆၂၀ လောက် ရှိတယ်။ စာရင်းသေချာ မကောက်ထားရသေးဘူး။ ဘုန်းကြီးကျောင်း ၇ ကျောင်းမှာ ၅ ကျောင်းကတော့ လူအပြည့်ပဲ။ စိုးရိမ်ရတာတော့ နောက် ၂ ပတ်လောက် ကြာရင်တော့ စားနပ်ရိက္ခာတွေအတွက် လိုအပ်မှာပေါ့။ တိုက်ပွဲတွေ ရေရှည်ဆိုရင်လည်း စိတ်ပူရတာပေါ့”ဟု နမ့်လန်မြို့မှ စစ်ဘေးရှောင်ကူညီသူ အမျိုးသားက သျှမ်းသံတော်ဆင့်ကို ပြောသည်။

နမ့်လန်မြို့ပေါ်သို့ စစ်ဘေးရှောင်များ ထောင်နှင့်ချီ ရောက်ရှိနေခြင်းကြောင့် မြို့တွင်းတွင်လည်း လူစည်ကားနေပြီး အချို့ဒေသခံ နေအိမ်များတွင် စစ်ဘေးရှောင်များ လာရောက်နားခိုနေကြကာ ဒေသခံများမှ စားနပ်ရိက္ခာ ကူညီမှုများ ရှိနေကြောင်း စစ်ဘေးရှောင်ကူညီသူ အမျိုးသားတစ်ဦးက ဆက်ပြောသည်။

လက်ရှိနမ့်လန်မြို့သို့ စစ်ဘေးရှောင်လာသူများသည် ကျောက်မဲမြို့နယ်၊ လားရှိုးမြို့နယ်တို့မှ လာရောက်တိမ်းရှောင်နေသူများ ဖြစ်ကြပြီး အမျိုးသမီးနှင့် ကလေးဦးရေ ပိုများနေကြောင်း စစ်ဘေးရှောင်ကူညီသူများထံမှ သိရသည်။

“ဒီခု နေနေတဲ့ ဘုန်းကြီးကျောင်းကတော့ လူတွေ အများကြီး၊ ကျောက်မဲကကော လားရှိုးကကော၊ ခုထိတော့ မပြန်ရဲကြသေးလို့လေ။ မီးဖွားမိခင်၊ ကလေးငယ်နဲ့ သက်ကြီးရွယ်အို ပိုများနေပြီး ကျန်းမာရေးအတွက်ပါ စိုးရိမ်ရတယ်။ တချို့ကလည်း ခနလာနားပြီး တခြားမြို့ကို ဆက်သွားတာတွေ ရှိပါတယ်”ဟု နမ့်လန်မြို့ရောက် စစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် နမ့်လန်မြို့အပြင် တန့်ယန်း၊ မိုင်းရယ်၊ မိုင်းကိုင်၊ မိုင်းရှူး၊ လဲချား၊ ပင်လုံ၊ နမ့်စန်၊ အောင်ပန်း၊ တောင်ကြီး စသည့် ဘေးလွတ်ကင်းရာ မြို့များသို့ သျှမ်းပြည်မြောက်ပိုင်းမှ စစ်ဘေးရှောင်များ ရောက်ရှိခိုလှုံနေရကြောင်း ဒေသခံများထံမှ သိရသည်။

သျှမ်းပြည် တောင်ပိုင်း တောင်ကြီးမြို့ပေါ်ရှိ အချို့သော အိမ်ရှင်များသည် လားရှိုးမြို့မှ ထွက်ပြေးလာ‌သည့် စစ်ဘေးရှောင်များကို အခန်းခ၊ အိမ်ငှားရမ်းခ ဈေးနှုန်းများ အဆမတန် ပိုမိုတောင်းခံနေကြောင်း စစ်ဘေးရှောင်များက ပြောသည်။

ညီနောင်မဟာမိတ်တပ်၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့နှင့် စစ်ကောင်စီတပ်တို့သည် သျှမ်းပြည်မြောက်ပိုင်း လားရှိုး၊ ကျောက်မဲ၊ သီပေါ၊ နောင်ချိုနှင့် မိုးမိတ်၊ မိုးကုတ်မြို့နယ်တို့တွင် တိုက်ပွဲပြင်းထန်နေခြင်းကြောင့် အရပ်သားပြည်သူ ၃ သောင်းကျော် ထွက်ပြေးတိမ်းရှောင်နေရပြီး စားနပ်ရိက္ခာ အကူအညီ အရေးပေါ်လိုအပ်နေကြောင်း စစ်ဘေးရှောင်ကူညီသူများထံမှ သိရသည်။