သျှမ်းပြည်နယ်တောင်ပိုင်း၊ပင်လောင်းမြို့နယ်တောင်ဘက် လိန်းညာကျေးရွာအုပ်စုရှိ ဒေသခံများကို ပအိုဝ်း ပြည်သူ့စစ် (PNO) က စစ်သင်တန်း ၅ရက် ပေးပြီးနောက် တိုက်ပွဲဖြစ်ပွားရာ ဆောင်းပြောင်းနှင့် ကရင်နီပြည်များသို့ပို့နေကြောင်း သတင်းရရှိသည်။
စစ်သင်တန်း၅ရက်ကို အတင်းအဓမ္မ တက်ခိုင်းပြီးနောက် ပအိုဝ်းပြည်သူ့စစ် PNO ဒုစစ်ဦးစီးချုပ် နေဝင်းထွန်း၏ အမိန့်ဖြင့် တိုက်ပွဲဖြစ်ပွားရာ ရှေ့တန်းသို့ ပို့ဆောင်စေခဲ့ကြောင်း ပြောသည်။
“PNOက ကိုယ်ခံပညာ၃ရက်နဲ့ သေနတ်ပစ်နည်း၂ရက်စုစုပေါင်း၅ရက်သင်ပေးတယ်။သင်ပေးပြီး သင်တန်းဆင်းပွဲမှာ နေဝင်းထွန်ကိုယ်တိုင်လာပြီး သေနတ်တွေလည်း လာပေးတယ်။ပြီးတော့ တစ်ချို့ကို ခေါ်သွားပြီး တိုက်ပွဲဖြစ်နေတဲ့ ဆောင်းပြောင်း၊လွိုင်ကော်မြို့တွေမှာ ပို့တယ်။တစ်ချို့က ရှေ့တန်းမှာ ဖမ်းခံရတာရှိတယ်”ဟု ဒေသခံတစ်ဦးကသျှမ်းသံတော်ဆင့်ကိုပြောသည်။
ဇူလိူင်လ ၁၄ရက်တွင်လည်း လွိုင်ကော်မြို့ဘက်သို့ မောင်းနှင်လာခဲ့သော စစ်ကောင်စီကားကို ကရင်နီတော်လှန်ရေးပူပေါင်းအဖွဲ့များက တိုက်ခိုက်ခဲ့ပြီးနောက် စစ်ကောင်စီတပ်သားများနှင့်အတူ PNOပြည်သူ့စစ်သုံးဦးလည်း ဖမ်းမိခဲ့ကြောင်း သိရသည်။
ကရင်နီတော်လှန်ရေးပူးပေါင်းအဖွဲ့ဖမ်းမိသော PNOတပ်ဖွဲ့ဝင်များသည် ခွန်လှဆွှေ (တပ်စိပ်မှုး)၊ခွန်အောင်ပေါး၊ခွန်လှသန်း တို့ဖြစ်ကြောင်း သိရသည်။
ဖယ်ခုံ-ပင်လောင်း နယ်စပ်ယခုတွင် တိုက်ပွဲပြင်းထန်နေဆဲဖြစ်ပြီး ဒေသခံ၃သောင်းကျော်လည်းစစ်ဘေးတိမ်းရှောင်နေရဆဲဖြစ်ကြောင်းသိရသည်။
Leave a Comments