တောင်ကြီးမြို့ပေါ် အခန်းနှင့်အိမ်ငှားရမ်းခ ဈေးမြှင့်တက်နေ

သျှမ်းပြည် တောင်ပိုင်း တောင်ကြီးမြို့ပေါ်ရှိ အချို့သော အိမ်ရှင်များသည် လားရှိုးမြို့မှ ထွက်ပြေးလာ‌သည့် စစ်ဘေးရှောင်များကို အခန်းခ၊ အိမ်ငှားရမ်းခ ဈေးနှုန်းများ အဆမတန် ပိုမိုတောင်းခံနေကြောင်း စုံစမ်းသိရသည်။

ဇူလိုင်လဆန်းပိုင်းမှ စတင်ပြီး လားရှိုးမြို့နယ်တွင် စစ်ကောင်စီတပ်နှင့် ညီနောင်မဟာမိတ်တပ်တို့ တိုက်ပွဲများကြောင့် ဒေသခံများ တောင်ကြီးမြို့သို့ ထွက်ပြေးတိမ်းရှောင်လာကြပြီး တောင်ကြီးမြို့ပေါ်ရှိ အိမ်ရှင်များသည် အခန်းခ၊ အိမ်ငှားရမ်းခ ဈေးနှုန်းများကို အဆမတန်‌ ဈေးတင်တောင်းနေကြသည့်အတွက် ခက်ခဲနေကြောင်း စစ်ဘေးရှောင်များက ပြောသည်။

“ထွက်ပြေးလာတဲ့လူတွေက တစ်မြို့လုံးနီးပါးလေ။ တောင်ကြီးက ဘုန်းကြီးကျောင်းတွေမှာလည်း အများကြီးပါပဲ။ အိမ်ငှားနေတာတွေ လည်းရှိတယ်၊ အိမ်ငှားခတွေတောင် ဈေးတက်တယ်။ ၆လ စာချုပ် မဟုတ်ရင်လည်း မငှားပေးဘူး။ ၁ လ ၂ လဆိုရင် မငှားပေးဘူး။ အခန်းတွေရော အိမ်တွေရော ဈေးတက်တယ်။ ၃ သိန်းတန်ဆို ၅ သိန်း ၆ သိန်းနီးပါးအထိ တက်သွားတယ်”ဟု တောင်ကြီးမြို့ရောက် လားရှိုးစစ်ဘေးရှောင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

တောင်ကြီးမြို့နယ်အတွင်း ရောက်ရှိနေသော လားရှိုးစစ်ဘေးရှောင်များသည် မြို့ပေါ်ရှိ ဘုန်းကြီးကျောင်း၊ စာသင်တိုက်နှင့် ဆွေမျိုးအိမ်တို့တွင် နေထိုင်နေကြရပြီး အများစုမှာလည်း အိမ်ငှားနေထိုင်ရန် အခက်အခဲများ ရှိနေကြောင်း ၎င်းအမျိုးသမီးက ဆက်ပြောသည်။

လက်ရှိတွင် တောင်ကြီးမြို့အပြင် နမ့်လန်၊ တန့်ယန်း၊ မိုင်းရယ်၊ မိုင်းကိုင်၊ မိုင်းရှူး၊ လဲချား၊ ပင်လုံ၊ နမ့်စန်၊ အောင်ပန်း စသည့် ဘေးလွတ်ကင်းရာ မြို့များသို့ သျှမ်းပြည်မြောက်ပိုင်းမှ စစ်ဘေးရှောင်များ ရောက်ရှိခိုလှုံနေရကြောင်း ဒေသခံများထံမှ သိရသည်။

ညီနောင်မဟာမိတ်တပ်၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့နှင့် စစ်ကောင်စီတပ်တို့သည် သျှမ်းပြည်မြောက်ပိုင်း လားရှိုး၊ ကျောက်မဲ၊ သီပေါ၊ နောင်ချိုနှင့် မိုးမိတ်၊ မိုးကုတ်မြို့နယ်တို့တွင် တိုက်ပွဲပြင်းထန်နေခြင်းကြောင့် အရပ်သားပြည်သူ ၃ သောင်းကျော် ထွက်ပြေးတိမ်းရှောင်နေရပြီး စားနပ်ရိက္ခာ အကူအညီ အရေးပေါ်လိုအပ်နေကြောင်း စစ်ဘေးရှောင်ကူညီသူများထံမှ သိရသည်။