သျှမ်းပြည် ကျောက်မဲမြို့ ပန်ပေါင်းရပ်ကွက်အတွင်း ယနေ့ (ဇူလိုင် ၁၅) နေ့လည် ၂ နာရီဝန်းကျင်တွင် လက်နက်ကြီးကျရောက်ပေါက်ကွဲမှုကြောင့် အရပ်သား တစ်ဦးသေဆုံးပြီး နှစ်ဦး ထိခိုက်ဒဏ်ရာရရှိခဲ့ကြောင်း စုံစမ်းသိရှိရသည်။
ထိုသေဆုံးသွားသူ နှင့် ထိခိုက်သွားသည့်သူသည် အမျိုးသားများဖြစ်သည်။

ကျောက်မဲမြို့အတွင်းမှာ စစ်ကောင်စီ နဲ့ TNLA တို့ တိုက်ပွဲပြန်ဖြစ်ပွားနေပြီ မြို့အတွင်း လက်နက်ကြီးများနှင့် ပစ်ခတ်ခြင်းကြောင့် အရပ်သားသေဆုံးမှုရှိလာခဲ့ကြောင်း ဒေသခံတစ်ဦးက ပြောသည်။

“ ဒီနေ့ နေ့လယ်လောက် ပန်ပေါင်းရပ်ကွက်ထဲကို လက်နက်ကြီးကျတာ။ ၁ ယောက်သေသွားတယ်။ ၂ ယောက်ထိခိုက်ဒဏ်ရာရရှိသွားတယ်။ ၃ ယောက်လုံးကတော့ အမျိုးသားတွေဖြစ်တယ်။ အခုရက်ပိုင်းတွေ ပစ်ခတ်သံတွေ ဆက်တိုက်ကြားနေရတယ်။ မြို့အတွင်းထဲလည်း လက်နက်ကြီးတွေပြန်ကျလာခဲ့တယ်။ ထိခိုက်တာသေဆုံးတာတွေလည်း ရှိလာခဲ့တယ်” ဟု ကျောက်မဲမြို့ ဒေသခံတစ်ဦးက ပြောသည်။

အလားတူ ပြီးခဲ့သည့် ဇူလိုင် ၁၃ ရက်တွင် လက်နက်ကြီးကျရောက်ပေါက်ကွဲမှုကြောင့် အမျိုးသမီးတစ်ဦး သေဆုံးသွားခဲ့ပြီး ဇူလိုင် ၁၄ ရက်နေ့တွင်လည်း အမျိုးသားတစ်ဦး နှင့် အမျိုးသမီး ၁ ဦး တို့ကလည်း လက်နက်ကြီး ထိမှန်ပြီ ပြင်းထန်သည့် ဒဏ်ရာရရှိသွားခဲ့သည်။

လက်ရှိကျောက်မဲမြို့အတွင်းကို လက်နက်ကြီးတွေ ဆက်တိုက်ပစ်ခတ်မှုများရှိနေခြင်းကြောင့် ဒေသခံများ စိုးရိမ်နေကြသည်။

“ အခုတော့ အားလုံးက စိုးရိမ်းနေကြတာပေါ့။ လက်နက်ကြီးလည်း မြို့ထဲအထိပြန်ကျလာခဲ့တယ်။ အခုလည်း ပြည်သူတွေကတော့ ဘုန်းကြီးကျောင်းမှာသွားနေကြတယ်။ ဖြစ်နိုင်ရင်တော့ တိုက်ပွဲကို ရပ်ခိုင်းစေချင်တာပေါ့။ အခုလည်း တိုက်ပွဲဖြစ်နေတာ ၁ လလောက်ရှိတော့မယ်။ ပြည်သူတွေလည်း စားဝတ်နေရေးခက်ခဲလာခဲ့ကြတယ်” ဟု အထက်ပါ ဒေသခံတစ်ဦးက ပြောသည်။

ထိုအပြင် ကျောက်မဲမြို့တွင်းရှိ စစ်ဘေးရှောင်များ ရေရည် စားဝတ်နေရေးအတွက် ခက်ခဲလာနိုင်ကြောင်း စစ်ဘေးရှောင်တွေကို ကူညီပေးနေသည့် သူက ပြောသည်။

“ အခုလောဆယ်တော့ ကျနော်တို့ ပိုက်ဆံရှိနေသေးတော့ စစ်ဘေးရှောင်တွေကူညီနိုင်သေးတယ်။ လက်ရှိကတော့ ပိုက်ဆံကလည်း သိန်း ၈၀ လောက်ပဲကျန်တယ်။ တကယ်လို့ ဒီပိုက်ဆံကုန်သွားရင် ကျနော်တို့လည်း စားဝတ်နေရေးအတွက် ကူညီတာကိုရပ်လိုက်တော့မယ်။ ဒီနေ့ပဲ စစ်ရှောင် ၄၀၀ ကျော်အတွက် ဆန် ၊ကြက်ဥ သွားဝယ်ပေးတာ သိန်း ၄၀ လောက်ကုန်သွားတယ်။ ပြည်တွင်းအလှူရှင်တွေကလည်း သိပ်မရှိဘူး။ ပြည်ပ အလှူရှင်တွေလှူလာရင်တော့လည်း ဆက်ပြီး ကူညီနိုင်မှာပေါ့” ဟု စစ်ဘေးရှောင်ကူညီပေးနေသည့်သူက ပြောသည်။

ကျောက်မဲမြို့တွင် ငွေကြေးသက်နိုင်သူများက တစ်ခြားအရပ်သို့ ထွက်ပြေးတိမ်းရှောင်သွားကြသည်။

သျှမ်းပြည်မြောက်ပိုင်းမှာ ၁၀၂၇ စစ်ဆင်ရေး ဒုတိယလှိုင်အတွင်းမှာ အရပ်သားသေဆုံးမှု ၇၀ ဦးအထက်ရှိနေကြောင်း သိရသည်။