သျှမ်းပြည် လားရှိုးနှင့် မိုင်းရယ်မြို့ ကြားတွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ စစ်ရေးတင်းမာနေပြီး တိုက်ပွဲဖြစ်ပွားမည်ကို ဒေသခံများ စိုးရိမ်နေရကြောင်း စုံစမ်းသိရသည်။
ယနေ့ (ဇူလိုင်လ ၁၂ ရက်) နံနက် ၁၀ နာရီခန့်မှ စတင်ပြီး လားရှိုးမြို့နှင့် မိုင်းရယ်မြို့ ကြားရှိ မန်စန့်ကျေးရွာတွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ စစ်ရေးတင်းမာခဲ့ပြီး မန့်စန့်ကျေးရွာရှိ ဒေသခံများကို စစ်ကောင်စီတပ်က ရွာပြင်သို့ ပြောင်းရွှေ့ခိုင်းနေကြောင်း မိုင်းရယ်မြို့ ဒေသခံများက ပြောသည်။
“ဒီနေ့ သေနက်သံတော့ မထွက်သေးဘူး၊ နှစ်ဘက် စစ်ရေးတင်းမာနေကြတာ။ သူတို့ ပြန်ပြီးညှိနှိုင်းရင်ညှိ၊ ညှိမရရင်တော့ သေနက်သံပေါက်မယ်လို့တော့ ထင်တယ်။ ဘာမှ မဖြစ်သေးလည်း စိတ်ပူရတယ်။ မန်စန့်ရွာက လူတွေကိုလည်း ရှောင်ခိုင်းနေတယ် ရွာပြင်ကိုထွက်ခိုင်းတာ။ အဲ့ဘက်ကို ရောက်လာတဲ့ စစ်ဘေးရှောင်တွေလည်း ထပ်ပြေးရတာပေါ့”ဟု မိုင်းရယ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် လားရှိုးမြို့နှင့် မိုင်းရယ်မြို့ ကြားရှိ လမ်းများကို ကိုးကန့်တပ်ဖွဲ့ MNDAA က သွားလာခွင့် မပေးဘဲ ပိတ်ပင်ထားပြီး တိုက်ပွဲများ ထပ်မံဖြစ်ပွားမည်ကိုလည်း ဒေသခံများက စိုးရိမ်နေကြရကြောင်း မိုင်းရယ်မြို့ ဒေသခံအမျိုးသားတစ်ဦးက ဆက်ပြောသည်။
“မန်စန့်ကနေ မိုင်းရယ်သွားလည်းမရဘူး။ မိုင်းရယ်ကနေ မန့်စန့်ဘက်ကိုလည်း သွားလို့မရဘူး။ လမ်းတွေကို ကိုးကန့်ဘက်က ပိတ်ထားတာ။ သူတို့ ညှိလို့ မရရင်တော့ ပြေးရမှာပဲလေ။ တချို့တွေကြတော့ ကားကမရှိ ကလေးငယ်တွေနဲ့ အထုတ်အပိုးတွေ သယ်ပြီး သွားလာဖို့ ခက်တယ် စိုးရိမ်ရတယ်။ လက်နက်ကြီးတွေကို ပစ်ချင်သလို ပစ်နေကြတော့ ကြောက်ရတယ်”ဟု မိုင်းရယ်မြို့မှ ၎င်းဒေသခံအမျိုးသားက သျှမ်းသံတော်ဆင့်ကို ပြောသည်။
မိုင်းရယ်မြို့နှင့် မန်စန့်ကျေးရွာသည် အကွာအဝေး ၈ မိုင် ခန့်သာ ကွာဝေးကြောင်း ၎င်းအမျိုးသားက ဆက်ပြောသည်။
ပြီးခဲ့သည့် ဇူလိုင်လ ၁၀ ရက်နေ့တွင် သျှမ်းပြည် မြောက်ပိုင်းရှိ စစ်ရေးနယ်မြေမဟုတ်သည့် တန့်ယန်းမြို့သို့ ‘ဝ’ တပ်ဖွဲ့ UWSA တပ်အင်အား ထောင်နှင့်ချီ ရောက်ရှိလာပြီး မိုင်းရယ်မြို့နယ် နှင့် လားရှိုးမြို့နယ်ဘက်သို့ ဆက်လက်ချီတက်သွားခဲ့ကြောင်း စစ်ရေးသတင်းရင်းမြစ်က ပြောသည်။
အလားတူ ဇူလိုင်လ ၇ ရက်တွင် မိုင်းရယ်မြို့နယ် ဟိုယကျေးရွာအုပ်စုအတွင်း လွယ်ဟိုတုံး တောင်ပေါ် တွင် စခန်းချ တပ်စွဲထားသည့် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ လေးနာရီကျော်ကြာ တိုက်ပွဲ အပြင်းအထန် ဖြစ်ပွားခဲ့ပြီး စစ်ကောင်စီ လက်နက်ကြီးကြောင့် ဟိုယ၊ ဝမ်လုံရွာရှိ ပြည်သူနေအိမ်များ ထိခိုက်ပျက်စီးမှုရှိကြောင်း ဒေသခံများထံမှ သိရသည်။
Leave a Comments