သျှမ်းပြည် မြောက်ပိုင်း၊ အရှေ့မြောက်တိုင်း စစ်ဌာနချုပ် အခြေစိုက်ရာ လားရှိုးမြို့အနီး ယနေ့ (ဇူလိုင်လ ရ ရက်) နေ့တွင် တိုက်ပွဲ ဆက်လက် ပြင်းထန်နေပြီး စစ်ကောင်စီတပ်က မြို့ကို အလုံးစုံ ပိတ်ဆို့လိုက်သဖြင့် ပြည်သူ ထောင်ပေါင်းများစွာ ပိတ်မိနေကြောင်း မြို့ခံများက ပြောသည်။
ယနေ့ မွန်းလွဲပိုင်းမှ စတင်ပြီး မြို့အနီးရှိ ခမရ (၅၀၇) ၊ ဆင်တောင်၊ ကြာကန် မြို့ရှောင်လမ်းနှင့် မိုင်းတင်းရွာ စသည့် နေရာများတွင် တိုက်ပွဲပြင်းထန်နေပြီး တိုက်ပွဲသည် မြို့နှင့် ဖြေးဖြေးနီးကပ်လာသည်ဟု မြို့ခံတစ်ဦးက ပြောသည်။
“မြို့အဝင်အထွက်ကို စစ်တပ်က ဒီနေ့ ပိတ်လိုက်ပြီ။ ထွက်ဖို့သွားတဲ့လူတွေ ပြန်လှည့်လာရတာ အများကြီးပဲ။ မြို့ထဲမှာက လူသောင်းနဲ့ချီ ကျန်သေးတယ်။ ဘယ်လောက်ကျန်နေသေးလဲ ဆိုတာတော့ ခန့်မှန်းဖို့ခက်တယ်။ လုံခြုံတဲ့ နေရာမှာ နေကြပါ။ ထွက်လို့ မရသေးပါဘူးဆိုတာ သိစေချင်ပါတယ်” ဟု မြို့ခံက ပြောဆိုသည်။
ယနေ့ မွန်းလွဲ ၃ နာရီကျော်အထိ လားရှိုးမြို့တွင် ဖုန်းလိုင်းနှင့် အင်တာနက်လိုင်းများ ပြတ်တောက်မှု မရှိသေးသော်လည်း လိုင်းမကောင်းကြောင်း၊ ရပ်ကွက်များ အတွင်းဆိုင် တစ်ချို့ ဖွင့်လှစ်နေဆဲဖြစ်ပြီး ဝယ်ယူသူများလည်း ရှိနေဆဲဖြစ်ကြောင်း မြို့ခံများက ဆိုသည်။
“မနက်ကတော့ ရပ်ကွက် ၅ နဲ့ ၇ ဖက် ရှော့တိုက်ဒုံးကျတာရှိတယ်။ ဖုန်းနဲ့ အင်တာနက်လိုင်းက မပြတ်သေးပေမဲ့ လိုင်းမကောင်းဘူး။ မြို့တွင်း တိုက်ပွဲတွေ ဖြစ်ကြမယ် ဆိုရင်လည်း ပြည်သူတွေကို ထွက်ခွင့်ပေးဖို့ တောင်းဆိုချင်တယ်” ဟု မြို့ခံ နောက်တဦးက ပြောဆိုသည်။
ပြီးခဲ့သည့် ဇူလိုင်လ ၅ ရက်နေ့က စစ်ရေးအရ အလွန်အရေးပါသည့် လားရှိုးမြို့နယ်၊ နမ့်ပေါင်ကျေးရွာ အနီး အခြေစိုက် ခလရ (၂၉၁) တပ်ရင်းဌာနချုပ်ကို ကိုးကန့်တပ် (MNDAA) က သိမ်းပိုက်ခဲ့ပြီးနောက် လားရှိုးမြို့ပေါ်မှ ခံစစ်သေဖြင့် ခုခံရန် စစ်ကောင်စီက ပြင်ဆင်နေပြီးနောက် မြို့ကို ပိတ်ဆို့လိုက်ခြင်း ဖြစ်သည်။
လားရှိုးမြို့ တိုက်ပွဲများကို ဒုစစ်တိုင်းမှူးက ကွက်ကဲနေခြင်းဖြစ်ကြောင်း စစ်ရေးသတင်းရင်းမြစ်က ပြောဆိုထားသည်။
ယမန်နေ့က လားရှိုးမြို့ အနီး တိုက်ပွဲ ပြင်းထန်နေပြီး ရပ်ကွက်များ အတွင်း လက်နက်ကြီး ကျရောက် ပေါက်ကွဲရာ ပြည်သူ ထိခိုက်မှုများ ရှိနေကြောင်း မြို့ခံများက ဆိုသည်။
လားရှိုးမြို့ပေါ်တွင် လက်နက်ကြီးကြောင့် ယနေ့ အထိ အရပ်သား အနည်းဆုံး ၁၅ ဦး သေဆုံးခဲ့ပြီး လက်ရှိ တိုက်ပွဲများ ဆက်လက်ပြင်းနေဆဲ ဖြစ်သည်
Leave a Comments