သျှမ်းပြည် လားရှိုးမြို့တွင် တိုက်ပွဲများဖြစ်ပွားလာပြီးနောက် ဒေသခံများ စစ်ဘေးတိမ်းရှောင်နေကြပြီး စဉ့်အင်ဖောင်ဆိပ်တွင်ကားများ ရာနှင့်ချီ ပိတ်မိနေကြောင်း သတင်းရရှိသည်။
ဇူလိုင်လ ၃ ရက်နေ့မှ စတင်ပြီး လားရှိုးမြို့နယ်တွင် စစ်ကောင်စီတပ်နှင့် ညီနောင်မဟာမိတ်တပ်များ တိုက်ပွဲဖြစ်ပွားလာပြီးနောက် မြို့နေပြည်သူများမှာ ယမန်နေ့ (ဇူလိုင် ၄ ရက်) တွင် စတင်ထွက်ခွာ တိမ်းရှောင်နေကြပြီး စစ်ဘေးရှောင် ကားများ အလံဖြူထောင်ကာ ဘေးလွတ်ရာ အခြားဒေသသို့ ကားများ ရာနှင့်ချီ ထွက်ခွာနေကြောင်း လားရှိုးဒေသခံများက ပြောသည်။
ယနေ့ (ဇူလိုင်လ ၅ ရက်)တွင်လည်း လားရှိုးမြို့မှ ဆက်လက်ထွက်ခွာလာကြပြီး မိုးသည်းထန်စွာ ရွာသွန်းခြင်းကြောင့် စစ်ဘေးရှောင်ကားများ ရာနှင့်ချီ စဉ့်အင်ဖောင်ဆိပ်တွင် ပိတ်မိနေပြီး ဖြတ်သန်းသွားလာရန် ခက်ခဲနေကြောင်း လားရှိုးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“လားရှိုးကနေ ထွက်လာတာ။ သီပေါဘက်ကိုလာတာ စဉ့်အင်မှာ မနေ့က အကြာကြီးစောင့်ရတာ၊ ဒီနေ့လည်း အများကြီးပဲ။ ဒီနေ့ အသိတွေ လာတာတောင် ပိတ်မိနေပြီး ဖုန်းဆက်လို့မရဘူး ဖြစ်နေတာ။ စဉ့်အင်ဖောင်ဆိပ်ကို ဖြတ်လာတုန်းက စက်လှေနဲ့ကမ်းကူးခ ၁ သိန်းခွဲ ပေးရတယ်”ဟု ၎င်းအမျိုးသမီးက သျှမ်းသံတော်ဆင့်ကို ပြောသည်။
လားရှိုးမြို့မှ ဘေးလွတ်ကင်းရာသို့ ထွက်ပြေးတိမ်းရှောင်သူများသည် ကားခ တစ်ဦးလျှင် ၃ သိန်းခန့် ပေးရပြီး၊ ယနေ့ စဉ်အင်ဖောင်ဆိပ်တွင် VIP ခေါင်းစဉ်ဖြင့် ကားတစ်စီးလျှင် ၅ သိန်းပေးသူကို ဦးစားပေး၍ စက်လှေဖြင့် ကူးပေးကြောင်း သိရသည်။
လက်ရှိလားရှိုးမြို့ အနီးတစ်ဝိုက်တွင် တိုက်ပွဲများဖြစ်ပွားနေပြီး လမ်းများပိတ်ကာ ဒေသခံလူဦးရေ သုံးပုံ နှစ်ပုံခန့်သည် တန့်ယန်း၊ မိုင်းရယ်မြို့နှင့် အခြားဒေသသို့ ဦးတည်၍ ထွက်ပြေးတိမ်ရှောင်နေကြကြောင်း လားရှိုးမြို့ဒေသခံ အမျိုးသမီးတစ်ဦးက ဆက်ပြောသည်။
လားရှိုးမြို့ပေါ် လူနေရပ်ကွက်များသို့ လက်နက်ကြီး၊ ရှော့တိုက်ဒုံး ကျရောက်ပေါက်ကွဲခြင်းကြောင့် အရပ်သား ထိခိုက်သေဆုံးမှု ၁၄ ဦးအထိ ရှိနေပြီး ထိခိုက်ဒဏ်ရာရရှိသူ ၃၀ ကျော် ရှိနေကြောင်း ဒေသခံများထံမှ သိရသည်။
Leave a Comments