သျှမ်းပြည် မြောက်ပိုင်း၊ လားရှိုးမြို့ အခြေစိုက် အရှေ့မြောက်တိုင်း စစ်ဌာနချုပ် လက်အောက်ခံ ခလရ (၂၉၁) တပ်ရင်း သိမ်းပိုက်ခံရပြီးနောက် မြို့အခြေပြု ခံစစ်သေဖြင့် ခုခံရန် ပြင်ဆင်နေ သဖြင့် မြို့တွင်းတိုက်ပွဲများ ပြင်းထန်လာနိုင်ကြောင်း စစ်ရေးသတင်းရင်းမြစ်က ယနေ့ (ဇူလိုင် ၆ ရက်) တွင် ပြောသည်။
စစ်ရေးအရ အလွန်အရေးပါသည့် လားရှိုးမြို့နယ်၊ နမ့်ပေါင်ကျေးရွာ အနီး အခြေစိုက် ခလရ (၂၉၁) တပ်ရင်းဌာနချုပ်ကို ကိုးကန့်တပ် (MNDAA) က ဇူလိုင် ၃ ရက်တွင် စတင် တိုက်ခိုက်ခဲ့ရာ ယမန်နေ့က သိမ်းပိုက်နိုင်ခဲ့သည်။
“ခလရ (၂၉၁) မှာ ခံစစ်ဆင်နေတဲ့ စစ်သည်တွေ လားရှိုးကို ဆုတ်ခွာသွားပြီ ဖြစ်ပါတယ်။ လားရှိုးမြို့ကနေပဲ ခံစစ်သေနဲ့ ခုခံဖို့ ပြင်ဆင်နေတယ်လို့ သိရပါတယ်။ အဲလို ခံစစ်သေနဲ့ ခုခံရင်တော့ လားရှိုးမြို့ ကြေသွားမယ်” ဟု စစ်ရေးသတင်းရင်းမြစ်က ရှင်းပြသည်။
ယနေ့ လားရှိုးမြို့အနီး ချဥ်းကပ်နိုင်ရေး အတွက် ညီနောင်မဟာမိတ်တပ်များ တိုက်စစ်အရှိန်မြှင့်နေသည့် အတွက် မြို့အနီး တိုက်ပွဲ ပြင်းထန်နေပြီး ရပ်ကွက်များ အတွင်း လက်နက်ကြီး ကျရောက်ပေါက်ကွဲရာ ပြည်သူထိခိုက်မှုများ ရှိနေကြောင်း မြို့ခံများက ဆိုသည်။
“ခုမနက်ပိုင်းက ရပ်ကွက် (၇) စိတ္တသုခဘုန်းကြီးကျောင်းထဲ လက်နက်ကြီးကျတာ ကိုရင် ၃ ပါး အစတွေထိတယ်။ ဒဏ်ရာ မစိုးရိမ်ရပေမယ့် လက်နက်ကြီးတွေ ထပ်ကျမှာ ကြောက်ကြတာပေါ့” ဟု မြို့ခံ တစ်ဦးက ရှင်းပြသည်။
ထို့အပြင် ယနေ့ မနက် ရပ်ကွက် (၁၀) အတွင်း လက်နက်ကြီး ၂ လုံး ကျရောက် ပေါက်ကွဲရာ လူထိခိုက်မှုမရှိ သော်လည်း တိုင်းစစ်ဌာနချုပ် အနီး နေထိုင်သူများ တိမ်းရှောင်သင့်ကြောင်း လူမှုကူညီရေးအသင်း တာဝန်ရှိသူ တစ်ဦးက မှတ်ချက်ပြုသည်။
ယနေ့ လားရှိုးမြို့ အနီး လွယ်ပြေတောင် အနောက်ဖက်တွင်လည်း တိုက်ပွဲ ပြင်းထန်နေပြီး ပစ်ခတ်သံများ မြို့တွင်းမှ ကြားနေရသည်ဟု မြို့ခံများက ဆိုသည်။
လားရှိုးမြို့ကို MNDAA ဦးဆောင်သည့် ညီနောင်မဟာမိတ်တပ်များ စစ်မျက်နှာ ၅ ခုဖွင့် ထိုးစစ်ဆင်နေရာ မြို့အနီးရှိ ခလရ (၆၈) နှင့် ခမရ (၅၀၇) ကိုလည်း တိုက်ခိုက်နေကြောင်း စစ်ရေးသတင်းရင်းမြစ်က ပြောဆိုထားသည်။
လားရှိုးမြို့ပေါ်တွင် လက်နက်ကြီးကြောင့် ယမန်နေ့ အထိ အရပ်သား အနည်းဆုံး ၁၃ ဦး သေဆုံးပြီး မြို့ကို စွန့်ခွာ တိမ်းရှောင်ရန် သတိပေးမှုများရှိသည် ဆိုသည့် သတင်းများကြောင့် မြို့ခံများ အလုံးအရင်းဖြင့် ထွက်ပြေးနေကြကြောင်း သိရသည်။
တိုက်ပွဲများ ပြင်းထန်နေစဥ် လားရှိုး စစ်တိုင်းမှူးနှင့် ဒုတိုင်းမှူး တို့၏ မိသားစုများ အပါအဝင် သျှမ်းပြည်နယ် ဝန်ကြီး တစ်ဦး၏ မိသားစုများ ဇူလိုင်လ ၄ ရက်နေ့က လားရှိုးမှ နေပြည်တော်သို့ ရဟတ်ယာဥ်ဖြင့် ထွက်ပြေးသွားသည်ဟု တပ်တွင်းသတင်းရင်းမြစ်က အတည်ပြု ပြောဆိုထားသည်။
Leave a Comments