သျှမ်းပြည် နောင်ချိုမြို့နယ်တွင် နောက်ဆုံးကျန်ရှိသည့် စစ်ကောင်စီ အမြောက်တပ်-၆၀၆ ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA က တိုက်ခိုက်နေစဉ် စစ်ကောင်စီတပ်မှ အဆိပ်ငွေ့ဗုံး အသုံးပြုတိုက်ခိုက်ခဲ့ကြောင်း သတင်းသိရသည်။

ယမန်နေ့ (ဇူလိုင် ၄ ရက်) နေ့လယ် ၂ နာရီခန့်တွင် နောင်ချိုမြို့နယ်အတွင်း နောက်ဆုံးကျန်ရှိသည့် အမြောက်တပ်-၆၀၆ ကို TNLA နှင့် PDF ပူးပေါင်းတပ်များက တိုက်ခိုက်နေစဉ် စစ်ကောင်စီတပ်မှ အဆိပ်ငွေ့ဗုံး (၃) လုံး အသုံးပြုတိုက်ခိုက်ခဲ့ကြောင်း TNLA သတင်းနှင့်ပြန်ကြားရေးဌာနက ထုတ်ပြန်သည်။

ဇူလိုင်လ ၁ ရက်နေ့တွင်လည်း အမြောက်တပ်-၆၀၆ ကို တိုက်ခိုက်နေစဉ် အဆိပ်ငွေ့ဗုံး (၁) လုံးနှင့် ဇူလိုင်လ ၄ ရက်တွင် အဆိပ်ငွေ့ဗုံး (၃) လုံး စုစုပေါင်း(၄) လုံး အသုံးပြုတိုက်ခိုက်ခဲ့ရာ TNLA တပ်ဖွဲ့ဝင် (၈) ဦး အဆိပ်ငွေ့သင့်ပြီး အသက်ရှူမြန်ခြင်း၊ စိတ်လှုပ်ရှားမှုမြန်ခြင်း၊ မောပန်းခြင်း၊ အောက်စီဂျင်ကျခြင်းနှင့် မအီမသာဖြစ်ခြင်းတို့ ခံစားရပြီး ဆေးကုသမှု ခံယူနေရကြောင်း သိရသည်။

အလားတူ ယမန်နေ့ (ဇူလိုင်လ ၄ ရက်)တွင် နောင်ချိုမြို့နယ် ဘန့်ဘွေးရွာတွင် တပ်စွဲထားသည့် စစ်ကောင်စီတပ်မှ တိုက်ပွဲဖြစ်ပွားလျက်ရှိသည့် အမြောက်တပ် (ဒုံးတပ်)ဘက်သို့ ဟောင်ဝစ်ဇာ လက်နက်ကြီး (၁၂) လုံး ပစ်ခတ်ခဲ့ကြောင်း ထုတ်ပြန်ချက်တွင် ဆိုထားသည်။

ထို့အပြင် သျှမ်းပြည်မြောက်ပိုင်းရှိ စစ်ဖြစ်ပွားရာ ဒေသများအား စစ်ကောင်စီတပ်မှ လေကြောင်းတိုက်ခိုက်မှု (၁၅) ကြိမ် ပြုလုပ်ခဲ့ကြောင်း သိရသည်။

လက်ရှိတွင် နောင်ချိုမြို့အခြေစိုက် စစ်ကောင်စီလက်အောက်ခံ ခမရ-၁၁၄/၁၁၅ တပ်ရင်းနှင့် အထင်ကရ ဌာနဆိုင်ရာရုံး၊ ရဲစခန်းတို့ကို TNLA နှင့် PDF ပူးပေါင်းတပ်ဖွဲ့များက ဇွန်လ နောက်ဆုံးပတ်ကတည်းက ထိန်းချုပ်ထားနိုင်ကြောင်း TNLA ဘက်က ထုတ်ပြန်ထားသည်။

နောင်ချိုမြို့နယ်အတွင်း နောက်ဆုံးကျန်ရှိသည့် စစ်ကောင်စီလက်အောက်ခံ အမြောက်တပ်(ဒုံးတပ်) ၆၀၆ ကို TNLA တပ်ဖွဲ့နှင့် မန္တလေး-PDF တပ်ဖွဲ့၊ ဓနုပြည်သူ့လွတ်မြောက်ရေးတပ်မတော် DPLA ပူးပေါင်းတပ်ဖွဲ့တို့က ဆက်လက်ထိုးစစ်ဆင် တိုက်ခိုက်လျက်ရှိပြီး တိုက်ပွဲပြင်းထန်စွာ ဖြစ်ပွားလျက် ရှိသည်။

ပြီးခဲ့သည့် ၂၀၂၃ နိုဝင်ဘာလအတွင်းကလည်း “၁၀၂၇ စစ်ဆင်ရေး” ဖြင့် နမ့်ခမ်းမြို့နယ်ရှိ စစ်ကောင်စီစခန်းသစ်ကုန်းနှင့် လားရှိုးမြို့နယ်ရှိ မိုင်းကျက်တပ်စခန်းတို့ကို TNLA တပ်ဖွဲ့ တိုက်ခိုက်နေစဉ် စစ်ကောင်စီတပ်က အဆိပ်ငွေ့ဗုံး အသုံးပြု၍ တိုက်ခိုက်ခဲ့ဖူးကြောင်း သိရသည်။