သျှမ်းပြည် လားရှိုးမြို့ပေါ်ရှိ တိုင်းရုံးနှင့် တက္ကသိုလ်ကြားရှိ ပြည်သူနေအိမ်တွင် ရှော့တိုက်ဒုံး ကျရောက်ပေါက်ကွဲခဲ့ရာ မိသားစုဝင် (၆) ဦး ပွဲချင်းပြီး သေဆုံးသွားကြောင်း စုံစမ်းသိရသည်။
ယနေ့ (ဇူလိုင်လ ၃ ရက်) နံနက် ၇ နာရီကျော်တွင် လားရှိုးမြို့ ရပ်ကွက် (၁) သာယာလမ်းရှိ ပြည်သူနေအိမ်တစ်လုံးသို့ ရှော့တိုက်ဒုံး ကျရောက်ပေါက်ကွဲခဲ့ရာ နံနက်စာ စားနေသည့် မိသားစုဝင် (၆) ဦးစလုံး ပွဲချင်းပြီး သေဆုံးသွားခဲ့ကြောင်း လားရှိုးဒေသခံများက ပြောသည်။
“အသံက ညကတည်းက ခုထိ ဆက်တိုက်ဆိုတော့ ဘယ်အသံက အဲ့အိမ်ထိတာလဲတော့ မသိဘူး။ တစ်မိသားစုလုံး တစ်အိမ်ထဲ ထမင်းစားနေကြတာ လက်နက်ကြီးလား ရှော့တိုက်ဒုံးလား ကျပြီးတော့ ၆ ယောက်ဆုံးတယ်၊ ပွဲချင်းပြီးတဲ့။ ဘယ်ဘက်က ပစ်တဲ့ဟာလည်းဆိုတာ မသေချာသေးဘူး”ဟု လားရှိုးမြို့မှ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့အခြေစိုက် အရှေ့မြောက်တိုင်း စစ်ဌာနချုပ် (ရမခ)နှင့် မြို့ပတ်လည်ရှိ စစ်ကောင်စီ တပ်စခန်းများမှ ယမန်နေ့ (ဇူလိုင် ၂ ရက်) ညသန်းခေါင် မတိုင်ခင် အချိန်မှ စတင်၍ မြို့ပြင်သို့ လက်နက်ကြီး၊ ရှော့တိုက်ဒုံးများဖြင့် လက်ရှိသတင်းရေးသားချိန်အထိ အဆက်မပြတ် ပစ်ခတ်နေကြောင်း သိရသည်။
အလားတူ လားရှိုးမြို့နယ် နမ့်ပေါင်ကျေးရွာဘက်သို့ စစ်ကောင်စီတပ်မှ ပစ်ခတ်လိုက်သည့် လက်နက်ကြီး ကျရောက်ပေါက်ကွဲခဲ့ရာ လင်မယားနှစ်ဦးကို ထိမှန်ခဲ့ပြီး အမျိုးသမီးမှာ ပွဲချင်းပြီး သေဆုံးသွား၍ အမျိုးသားမှာ ဒဏ်ရာပြင်းထန်ကြောင်း လားရှိုးဒေသခံများက ပြောသည်။
လက်ရှိတွင် လားရှိုးမြို့ အဝင်အထွက်လမ်းများကို စစ်ကောင်စီတပ်က ပိတ်ထားလိုက်ပြီး မြို့ပတ်ပတ်လည်ရှိ အီနိုင်း၊ မိုင်းတင်၊ မန်အိုင်၊ ကုန်းညောင်၊ ရှန်ခိုက် စသည့် ကျေးရွာများတွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ တိုက်ပွဲပြင်းထန်နေကြောင်း ဒေသခံများထံမှ သိရသည်
Leave a Comments