သျှမ်းပြည် ကျောက်မဲမြို့နယ်အတွင်း ထွက်ပြေးတိမ်းရှောင်နေရသည့် စစ်ဘေးရှောင် ၁၂,၀၀၀ ကျော်အတွက် စားနပ်ရိက္ခာ အကူအညီ အရေးပေါ် လိုအပ်နေကြောင်း စုံစမ်းသိရသည်။
ဇွန်လ ၂၅ ရက်နေ့က ကျောက်မဲမြို့နယ်တွင် စတင်ခဲ့သည့် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့၏ နှစ်ဘက်တိုက်ပွဲ တစ်ပတ်အတွင်း မြို့ပေါ်ရပ်ကွက်များသို့ လက်နက်ကြီးကျည် ကျရောက်ပေါက်ကွဲခြင်းနှင့် လေကြောင်းဗုံးကြဲ ခံရခြင်းတို့ကြောင့် အရပ်သားပြည်သူ ၁၂,၀၀၀ ကျော် ထွက်ပြေးတိမ်းရှောင်နေရသည်။
နောင်ချိုမြို့နယ်မှ စတင်ပြီး တိုက်ပွဲများ ဆက်လက်ပြင်းထန်နေခြင်းကြောင့် လမ်းပန်းဆက်သွယ်ရေး ပြတ်တောက်ပြီး စားနပ်ရိက္ခာ အကူအညီ အရေးပေါ်လိုအပ်နေကြောင်း ကျောက်မဲဒေသခံများက ပြောသည်။
“အခုထိလည်း မြို့ထဲကနေ အလျှိုလျှို ထွက်နေကြတုန်းပဲ။ အဓိက လိုအပ်တာက ဆန်ပေါ့၊ အခုက မီးလည်း မလာတော့ ဆန်စက်လည်း မကြိတ်နိုင်ဘူး။ တစ်ခါဝယ်ရင် ၅ ပိုင်း ၁၀ ပိုင်း အဲ့လိုပဲရတယ်။ ကြက်ဥနဲ့ စားသုံးဆီတော့ ဝယ်လို့ရပေမယ့် ဈေးတက်ကုန်တယ်။ ဟင်းရွက်ကတော့ ဘယ်လိုမှ ဝယ်မရဘူး၊ စားနပ်ရိက္ခာကတော့ အရေးပေါ်လိုတယ်”ဟု ကျောက်မဲမြို့မှ စစ်ဘေးရှောင်ကူညီနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ကျောက်မဲမြို့နယ်အတွင်း စစ်ဘေးရှောင်များမှာ နားပြိန်းကျောင်းတွင် ၃၀၀၀ ခန့်၊ ပုံဝိုးကျောင်းတွင် ၁၇၀၀ ကျော်၊ ချောင်းချောက်ရွာတွင် ၁၅၀၀ ခန့်၊ နားထွမ်၊ နောင်ပိန်၊ ခဲမွန်၊ ခိုအုံ၊ ခိုမုန်း၊ နောင်ပိန်လေးရှိ ဘုန်းကြီးကျောင်းနှင့် ရွာထဲတွင် ၁၀၀၀ စီ ထွက်ပြေးတိမ်းရှောင်နေပြီး စုစုပေါင်း ၁၂,၀၀၀ ကျော် ရှိကြောင်း စစ်ဘေးရှောင်ကူညီသူများထံမှ သိရသည်။
ကျောက်မဲမြို့နယ်ရှိ စစ်ဘေးရှောင်များအတွက် ငွေသားဖြင့် အကူအညီ လက်ခံရရှိသော်လည်း စားနပ်ရိက္ခာများ ပြန်လည်ဝယ်ယူရန် အခက်အခဲရှိနေပြီး ကိုယ်တိုင်လာလှူသည့် အလှူရှင်များ နည်းပါးနေသေးကြောင်း စစ်ဘေးရှောင်များက ပြောသည်။
“မြို့ထဲကတော့ ၁၀ ပုံ ၁ ပုံလောက်ပဲ ကျန်တော့မယ်။ အိပ်စောင်နဲ့ ခြင်ထောင်တွေလည်း လိုတယ်။ မြို့ပေါ်မှာလည်း တိုက်ပွဲဖြစ်နေတော့ အရင်လို ဆေးသွားဝယ်ပြီး လာကုပေးလို့လည်း မရဘူး။ ရှိထားတဲ့ တိုင်းရင်းဆေးနဲ့ပဲ အချင်းချင်း ပေးရတာပေါ့။ ရောဂါအခံရှိတဲ့လူ၊ ကျောက်ကပ်ရောဂါ ဖြစ်တဲ့လူနဲ့ မတော်တဆ ဖြစ်တာဆိုရင် နမ့်လန်ဆေးရုံပဲ ပို့ရတယ်”ဟု ကျောက်မဲမြို့မှ ၎င်းစစ်ဘေးရှောင်ကူညီသူက သျှမ်းသံတော်ဆင့်ကို ဆက်ပြောသည်။
စစ်ဘေးတိမ်းရှောင်ရသူများထဲတွင် အဓိကအားဖြင့် အမျိုးသမီးများနှင့် ကလေးငယ် အများစုဖြစ်ရာ အိပ်စောင်၊ ခြင်ထောင်၊ တစ်ကိုယ်ရေသုံးပစ္စည်းနှင့် အမျိုးသမီး လစဉ်သုံးပစ္စည်းများလည်း လိုအပ်လျက်ရှိကြောင်း စစ်ဘေးရှောင်များထံမှ သိရသည်။
ကျောက်မဲမြို့ပေါ်တွင် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့၏ နှစ်ဘက်တိုက်ပွဲ တစ်ပတ်အတွင်း လက်နက်ကြီးနှင့် လေကြောင်းဗုံးကြဲ တိုက်ခိုက်မှုများကြောင့် မိသားစုလိုက် ထိမှန်သေဆုံးမှု မြှင့်တက်နေပြီး ယနေ့ (ဇူလိုင်လ ၂ ရက်)အထိ အရပ်သား ၃၀ ဦးထက်မနည်း သေဆုံးခဲ့ရကြောင်း လူမှုကူညီရေးအသင်းများ၏ ပြောဆိုချက်အရ သိရသည်။
Leave a Comments