သျှမ်းပြည် ကျောက်မဲမြို့ပေါ်သို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်နေခြင်းကြောင့် ဒေသခံပြည်သူ ထောင်နှင့်ချီ ဘေးလွတ်ကင်းရာသို့ ထွက်ပြေးတိမ်းရှောင်နေရကြောင်း စုံစမ်းသိရသည်။
ဇွန်လ ၂၅ ရက်နေ့မှ စတင်ပြီး ကျောက်မဲမြို့အနီးရှိ စစ်ကောင်စီတပ်စခန်းများကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ ထိုးစစ်ဆင် တိုက်ခိုက်လျက်ရှိရာ စစ်ကောင်စီတပ်မှ မြို့ပေါ်သို့ နေ့ရောညပါ လေကြောင်းဗုံးကြဲ တိုက်ခိုက်လာခြင်းကြောင့် ပြည်သူထောင်နှင့်ချီ ဘေးလွတ်ကင်းရာသို့ ထွက်ပြေးတိမ်းရှောင်နေရကြောင်း ကျောက်မဲဒေသခံများက ပြောသည်။
“မြို့ပေါ်ကို လေယာဉ်က ၂ နာရီခြားတစ်ခါလောက် လာဝဲနေတာ။ ၂ ညဆက်တိုက် လေယာဉ်နဲ့ ဗုံးလာကြဲတော့ မြို့ထဲတွေပါ ဗုံးသီးကျတာ လူထိတာကော၊ အိမ်ထိတာကော တော်တော်များလာတယ်။ အခြေအနေက ပိုဆိုးတဲ့ဘက်ကို ဖြစ်မှာလို့ပဲ တွေးကြတော့ ကိုယ့်နည်းကိုယ့်ဟန်နဲ့ ရရာလမ်းက ဘေးရွာတွေကို ထွက်နေကြပြီ”ဟု ကျောက်မဲမြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ကျောက်မဲမြို့နယ်အတွင်း ဖုန်းလိုင်းများ ပြတ်တောက်နေပြီး မြို့ပေါ်ရှိ ရပ်ကွက် (၉) ခုမှ ပြည်သူများသည် စစ်ကောင်စီမှ လေကြောင်းဖြင့် ထပ်မံဗုံးကြဲတိုက်ခိုက်မည်ကို စိုးရိမ်ထိတ်လန့်ခြင်းကြောင့် မြို့ပြင်သို့ ဆက်လက်ထွက်ခွာနေကြောင်း ဒေသခံများက ပြောသည်။
ကျောက်မဲမြို့နယ်အတွင်းရှိ စစ်ဘေးရှောင်များမှာ နားပြိန်းဘုန်းကြီးကျောင်းတွင် ၁၀၀၀ ကျော်၊ နောင်ပိန်လေးတွင် ၆၀၀ ကျော်နှင့် ခိုအုံ၊ ခိုမုန်းတွင် ၂၀၀ ကျော် စသည်ဖြင့် ဘုန်းကြီးကျောင်းနှင့် ဆွေမျိုးများထံ အသီးသီး ထွက်ပြေးတိမ်းရှောင်နေရကြောင်း သိရသည်။
“အခုက အခက်အခဲ ရှိတာကတော့ စားဖို့သောက်ဖို့ပေါ့။ ဆန်၊ ဆီ၊ ခေါက်ဆွဲ၊ ကြာဇံ အခြောက်အခြမ်း စတဲ့ဟာတွေက အများကြီး မကျန်တော့ဘူး။ မြို့ပေါ်မှာကော၊ နောင်ပိန်မှာကော ပြတ်ရင်တော့ ဘယ်မှာမှ ဝယ်လို့ မရတော့ဘူ။ နောင်ချိုကနေ လမ်းတွေ စပိတ်နေတော့ ရေရှည်ဆိုရင် ရိက္ခာထောက်ပံ့နိုင်ဖို့ စိတ်ပူရတယ်”ဟု ကျောက်မဲမြို့မှ စစ်ဘေးရှောင် ကူညီပေးနေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို့အပြင် ကျောက်မဲမြို့နယ် နောင်ပိန်ကျေးရွာရှိ အောင်ဓမ္မာရုံနှင့် ရှမ်းစာပေယဉ်ကျေးမှု ခန်းမတို့တွင် စစ်ဘေးရှောင် ၄၀၀ ခန့်၊ ပုံဝိုးကျေးရွာ ဘုန်းကြီးကျောင်းတွင် စစ်ဘေးရှောင် ၅၀၀ နီးပါး ထွက်ပြေးတိမ်းရှောင်နေရပြီး စားနပ်ရိက္ခာများ လိုအပ်နေကြောင်း ဒေသခံများထံမှ သိရသည်။
TNLA တပ်ဖွဲ့၏ ကျောက်မဲမြို့သိမ်းတိုက်ပွဲ (၅) ရက်အတွင်း စစ်ကောင်စီတပ်မှ လေကြောင်းဖြင့် မြို့ပေါ် ဗုံးကြဲတိုက်ခိုက်ခြင်းကြောင့် အရပ်သားပြည်သူ သေဆုံးဒဏ်ရာရမှု အများအပြား ရှိလာပြီး ယနေ့ (ဇွန်လ ၂၉ ရက်)အထိ လက်နက်ကြီးနှင့် လေကြောင်းဗုံး ထိမှန်မှုကြောင့် အရပ်သား စုစုပေါင်း (၃၀) ဦးထက်မနည်း သေဆုံးခဲ့ကြောင်း လူမှုကူညီရေးအသင်းများထံမှ သိရသည်။
ကျောက်မဲမြို့ရှိ စစ်ကောင်စီတပ်၏ လက်ကျန်တပ်စခန်းဖြစ်သည့် စကခ-၁၊ ခမရ-၅၀၁/၅၀၂ တပ်ရင်းတို့ကို TNLA တပ်ဖွဲ့က ဆက်လက်ထိုးစစ်ဆင် တိုက်ခိုက်နေပြီး တိုက်ပွဲပြင်းထန်နေကြောင်း ကျောက်မဲဒေသခံများက ပြောသည်။
