သျှမ်းပြည် မြောက်ပိုင်း၏ မြို့တော် လားရှိုးမြို့နယ်တွင် ယနေ့ (ဇွန်လ ၂၉ ရက်) နံနက် ၁၁ နာရီ ဝန်းကျင်က စပြီး တိုက်ပွဲ စတင်ဖြစ်ပွားနေသည်ဟု ဒေသခံများက အတည်ပြု ပြောသည်။
လားရှိုးမြို့နယ်၊ နမ့်ဟူးကျေးရွာအနီး ညီနောင်မဟာမိတ်တပ်နှင့် စစ်ကောင်စီတပ် တိုက်ပွဲ ဖြစ်ပွားနေပြီး လားရှိမြို့ရှိ စစ်ကောင်စီ တပ်များက လက်နက်ကြီးပစ်ကူ ပေးနေသဖြင့် စိုးရိမ်ထိတ်လန့်နေရကြောင်း မြို့ခံများက ဆိုသည်။
“လားရှိုးနဲ့ ၁၃ မိုင်လောက်တော့ ဝေးအုံးမယ်။ နမ့်ဟူးကျေးရွာနားလို့ ကြားတယ် တိုက်ပွဲဖြစ်တာ။ အခု မြို့ပေါ် တပ်တွေက လက်နက်ကြီး တောက်လျှောက် ပစ်နေတော့ မြို့ခံတွေ ကြောက်တာပေါ့” ဟု လားရှိုးမြို့ခံ တစ်ဦးက ပြောသည်။
အဆိုပါ တိုက်ပွဲဖြစ်ပွားရာ နမ့်ဟူယားကျေးရွာသည် စစ်ကောင်စီ ထိန်းချုပ်ထားသည့် လားရှိုးနှင့် ညီနောင်မဟာမိတ်တပ်များ သိမ်းပိုက်ထားသည့် သိန္နီမြို့ကြားတွင် တည်ရှိပြီး စစ်ရေးအရ အရေးပါသည့် ဒေသဖြစ်သည်။
“ဗုံးသံတွေ အရမ်းနီးလာတယ်” ဟု ယနေ့ မွန်းလွဲ ၂ နာရီခွဲတွင် မြို့ခံ တစ်ဦးက ပြောသည်။
လက်ရှိ တိုက်ပွဲသည် MNDAA တပ်နှင့် ဖြစ်ပွားနေဖြင်းဖြစ်ကြောင်း ဒေသခံများက ပြောဆိုသော်လည်း တိုက်ပွဲ အခြေအနေ အသေးစိတ်ကို ထပ်မံ မေးမြန်းစုံစမ်းနေဆဲ ဖြစ်သည်။
လားရှိုးမြို့တွင် စစ်ကောင်စီ အရှေ့မြောက်တိုင်းစစ်ဌာနချုပ်(ရမခ) အခြေစိုက်ပြီး လားရှိုးမြို့ အဝင်လမ်းများစွာကို စစ်ကောင်စီတပ်က ဖျက်ဆီး ဖြတ်တောက်ထားသည်။
ပြီးခဲ့သည့် ဇွန် ၂၇ ရက်နေ့ကလည်း မန်ပွဲ- လားရှိုး လမ်းပေါ်ရှိ မန်စံရေကျ ကြိုးတံတားနှင့် ခိုလိတ်ရထားလမ်း တံတားတို့ကို စစ်ကောင်စီတပ်က ဖျက်ဆီးခဲ့သေးသည်။
“၁၀၂၇” စစ်ဆင်ရေး ဒုတိယအပိုင်း အဖြစ် ဇွန်လ ၂၅ရက် မှစ၍ TNLA က ကျောက်မဲ၊ နောင်ချို၊ မိုးမိတ်၊ မိုးကုတ်၊ သီပေါရှိ စစ်ကောင်စီတပ်များကို တိုက်ခိုက်နေရာ ၄ ရက်အတွင်း တပ်စခန်းနှင့် ရဲစခန်း စုစုပေါင်း ၃၀ ခန့် သိမ်းပိုက်ထားသည်။
