သျှမ်းပြည်မြောက်ပိုင်း ကျောက်မဲမြို့နယ်တွင် စစ်‌ေကာင်စီနှင့် TNLA တိုက်ပွဲများကြောင့် စစ်ဘေးရှောင် ထောင်နှင့်ချီ ထွက်ပြေးတိမ်းရှောင်နေရကြောင်း စုံစမ်းသိရသည်။

ကျောက်မဲမြို့နယ်တွင် ဇွန်လ ၂၅ ရက်မှစ၍ စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) တို့ ဖြစ်ပွားသည့် တိုက်ပွဲများကြောင့် ဒေသခံများ ထောင်နှင့်ချီထွက်ပြေးတိမ်းရှောင်နေရကြောင်း ကျောက်မဲမြို့ ‌ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ဖုန်းလိုင်းတွေက ရလိုက် မရလိုက်ပဲ။ ကျောက်မဲက လူတွေကတော့ နီးစပ်ရာရွာကို ပြေးကြတာပေါ့။ကျမတို့လည်း ပြေးရတာပဲ။ တချို့တွေက အမျိုးအိမ်တွေ၊ဘုန်းကြီးကျောင်‌တွေမှာ ပြေးနေကြတာ။ မနေ့ကလေယာဉ်နဲ့ ဗုံးကြဲလိုက်တော့ ဒီနေ့ ထွက်ပြေးလာတဲ့လူတွေပိုများတယ်။ အခုချိန်ထိတော့ စာရင်း အတိအကျမကောက် ရသေးဘူး”ဟု ၎င်းအမျိုးသမီးက သျှမ်းသံ‌တော်ဆင့်ကို ပြောသည်။

ကျောက်မဲမြို့ရှိ ဒေသခံများသည် နီးစပ်ရာ ကျေးရွာများတွင် ထွက်ပြေး ခိုလှုံနေကြရပြီး မြို့ထဲတွင် ကျန်ရှိသူများလည်း ရှိနေကြောင်း ဒေသခံ အမျိုးသမီးတစ်ဦးက ဆက်ပြောသည်။

“ရွာတွေရဲ့ ဘုန်းကြီးကျောင်းတွေမှာတော့ လူတွေကပြည့်တောင်ပြည့်နေပြီ။ မြို့ထဲမှာလည်း နေလို့အဆင်မပြေတော့ဘူးလေ။ လေယာဉ်နဲ့ ဗုံးလိုက်ကြဲနေတာကို အဲ့တာတောင် မြို့ထဲ မှာကျန်နေတာ တွေရှိတယ်။ကူညီပေးနေတာ အဖွဲ့တွေလည်း ကျန်နေသေးတယ်”ဟု ၎င်းအမျိုးသမီးက သျှမ်းးဆံတော်ဆင့်ကို ဆက်ပြောသည်။

ထိုကျောက်မဲမြို့မှ ထွက်ပြေးလာသော ဒေသခံများသည် ဆွေမျိုးအိမ်များတွင်လည်းကောင်း၊ ‌ဘုန်းကြီးကျောင်းများနှင့် စစ်ဘေးရှောင်စခန်းများ‌တွင် ထွက်ပြေးတိမ်းရှောင်နေကြပြီး စစ်ဘေးးရှောင်ဦးရေ ထောင်နှင့်ချီ ရှိနေကြောင်း သိရသည်။

ယနေ့တွင်လည်း ကျောက်မဲမြို့ပေါ်တွင် စစ်ကောင်စီ၏ လေယာဉ်များ ပျံဝဲပြီး လက်နက်ကြီးများဖြင့်လည်း ပစ်ခတ်နေကြောင်း ဒေသခံများက ပြောသည်။

ကျောက်မဲမြို့ပေါ် ရပ်ကွက်များမှ ပြည်သူများမှာ လေကြောင်းဗုံးကြဲ တိုက်ခိုက်ခံရမည်ကို စိုးရိမ်ထိတ်လန့်နေပြီး နောင်ပိန်လေး၊ နားပြိန်း၊ ခိုမုန်းနှင့် ဟဲကွီကျေးရွာ စသည့် ကျေးရွာများတွင် ထွက်ပြေးတိမ်းရှောင်နေကြောင်း သိရသည်။

ယမန်နေ့ (ဇွန်လ ၂၇ ရက်) ည ၇ ခွဲခန့်တွင် စစ်ကောင်စီတပ်မှ Y-12 ထောက်ပို့လေယာဉ် အမျိုးအစားဖြင့် ကျောက်မဲမြို့ပေါ် လေကြောင်းဖြင့် ထပ်မံဗုံးကြဲတိုက်ခိုက်ခဲ့ရာ ကျောက်တောင်၊ ကျောက်မဲကြီး၊ ပန်ဟက်အပေါ်ဘက်၊ တရုတ်သင်္ချိုင်းဘက်နှင့် မြို့တွင်းထဲသို့ ဗုံး ၂၅ လုံး ကြဲချခဲ့ကြောင်း ကျောက်မဲဒေသခံများက ပြောသည်။