“စစ်ပညာရပ်ကို တတ်မြောက်ထားမှ ပအိုဝ်းဒေသကို ဖျက်သည့်အဖျက်သမားများကို တိုက်ထုတ်နိုင်မည်” ဟု PNO ပြော

သျှမ်းပြည်တောင်ပိုင်း တိုက်ပွဲများတွင် စစ်ကောင်စီတပ်နှင့်အတူ ပူးပေါင်းပါဝင်တိုက်ခိုက်ပေးနေသည့် ပြည်သူ့စစ် PNO က ရပ်ရွာဒေသလုံခြုံရေးခေါင်းစဉ်ဖြင့် တပ်သားစုဆောင်းပြီး ရာနှင့်ချီရှိသော ဒေသခံများကိုစစ်သင်တန်းပေးခဲ့ကြောင်း သိရသည်။

အသက် ၁၈ နှစ်အထက်မှ အသက် ၄၀ နှစ်အောက် လူငယ်လူရွယ်များကို အခြေခံစစ်ပညာသင်တန်းပေးပြီး၊ ပြီးခဲ့သည့် ဇွန်လ ၂၅ ရက်တွင် ပအိုဝ်းပြည်သူ့စစ် PNO အဖွဲ့ နာယက ခွန်နေဝင်းထွန်းက သင်တန်းသားများကို လာရောက်မိန့်ခွန်းပြောကြားခဲ့ကြောင်း PNO က ပအိုဝ်းဘာသာဖြင့် ထုတ်ပြန်ထားသည်။

ထုတ်ပြန်ထားသော ဓာတ်ပုံများထဲတွင် စစ်ကောင်စီတပ်သား စစ်ဝတ်စုံအချို့နှင့် ပအိုဝ်းပြည်သူ့စစ် PNO တပ်သား စစ်ဝတ်စုံကို ဝတ်ဆင်ထားကြသူ ရာနှင့်ချီတွေ့ရသည်။

ထိုအခြေခံစစ်ပညာသင်တန်းကို အမှတ်စဉ် (၁) အဖြစ် ဇွန် ၁၃ ရက်မှ ဇွန်လိူင် ၁၃ ရက်အထိ တစ်လတိတိ ပြုလုပ်သွားမည်ဖြစ်ကြောင်း သိရသည်။

သင်တန်းအတွင်း စစ်ကောင်စီနှင့် ပြည်သူ့စစ် PNO တို့ ပူးပေါင်းသင်တန်ပေးနေပြီး၊ ပအိုဝ်းဒေသကို ယခင်လို တည်ငြိမ်အေးချမ်းလာအောင် တပ်မတော်အဖွဲ့ကလည်း အကောင်းဆုံး ကြိုးစားဆောင်ရွက်ပေး လျက်ရှိသည်ဟု အမှတ် (၇) စစ်ဆင်ရေးကွပ်ကဲမှု ဌာနာချုပ်ဗိုလ်မှူးချုပ်ကျော်သူရက ပြောဆိုထားသည်။

အလားတူ စစ်ပညာရပ်ကို တတ်မြောက်ထားမှ ပအိုဝ်းဒေသကို ဖျက်သည့်အဖျက်သမားများကို တိုက်ထုတ်နိုင်မည်ဟု PNO စစ်ဒေသမှုး (ဒု) ဗိုလ်မှူးကြီး ခွန်ကျော်သူက ပြောဆိုထားသည်။

ထို့အပြင် ယမန်နေ့ ဇွန်လ ၂၆ ရက်တွင်လည်း ကျောက်တလုံးမြို့နယ်ရှိ ပြည်သူ့စစ် PNO ၏ဥက္ကာ ဦးအောင်ခမ်းထီထံ စစ်ကောင်စီ၏ ဒုတိယဗိုလ်ချုပ်ကြီးရာပြည့်က လာရောက်တွေ့ဆုံ အကြံညဏ်တောင်းယူခဲ့သည်ဟု PNO ကထုတ်ပြန်ထားသည်။

အဆိုပါ တွေ့ဆုံမှုနှင့်ပတ်သက်၍ အသေးစိတ်ကိုတော့ မသိရပေ။

ဦးအောင်ခမ်းထီး ဦးဆောင်သည့် ပအိုဝ်းအမျိုးသားတပ်မတော် PNA အဖွဲ့သည် ၁၉၉၁ ခုနှစ်တွင် စစ်တပ်နှင့် ငြိမ်းချမ်းရေးယူခဲ့ပြီး ပြည်သူ့စစ် PNO အဖြစ်အသွင်ပြောင်းခဲ့သည်။

စစ်တပ်ကအာဏာသိမ်းပြီးနောက်ပိုင်း ပအိုဝ်းပြည်သူ့စစ် PNO ထိန်းချုပ်ထားသည့် နေရာများတွင် ဒေသခံများကို စစ်သင်တန်းအကြိမ်ကြိမ်ပေးပြီး၊ သျှမ်း-ကယားနယ်စပ်ဒေ တိုက်ပွဲများတွင် စစ်ကောင်စီနှင့်အတူ ပူးပေါင်းတိုက်ခိုက်ပေးနေလျက်ရှိသည်။