မန္တလေးတိုင်း၊ မတ္တရာမြို့နယ် အရှေ့ပိုင်း၊ အင်ကြင်းမြိုင်ရွာ အနီးရှိ စစ်ကောင်စီ၏ အမှတ် (၁၀၁၄) လေကြောင်းရန် ကာကွယ်ရေးတပ်ကို PDF ပူးပေါင်းတပ်ဖွဲ့များ တိုက်ခိုက် သိမ်းပိုက်နိုင်ခဲ့ကြောင်း စစ်ရေးသတင်းရင်းမြစ်က ယနေ့ (ဇွန်လ ၂၇ ရက်) တွင် အတည်ပြုသည်။

အင်အား ၈၀ ဝန်းကျင်ရှိ အဆိုပါ စစ်စခန်းကို ဇွန်လ ၂၅ ရက်နေ့က ထိန်းချုပ်နိုင်ခဲ့ပြီးနောက် အပြီးသတ် သိမ်းပိုက်နိုင်ခဲ့ပြီး လေကြောင်းရန် ကာကွယ်ရေး အတွက် အသုံးပြုသည့် အရေးကြီး စစ်လက်နက် ခဲယမ်းများ ရှိနေသဖြင့် စစ်ကောင်စီက လေကြောင်း အသုံးပြု၍ အစွမ်းကုန် ခုခံကာကွယ်ခဲ့ကြောင်း သတင်းရင်းမြစ်က ဆိုသည်။

ယင်းတပ်စခန်းတွင် SA- 16 SAM ပခုံးထမ်း လေယာဉ်ပစ် ဒုံးကျည် (ပြည်တွင်းထုတ်) ၄၈ လက်၊ 25mm နှင့် 35 mm Anti Aircraft Cannon (လေယာဉ်ပစ်) ၁၀ လက်နှင့် ကျည် ၅,၀၀၀ ကျော်၊ TWS-312 Smart Com နှင့် 1L-117 ရေဒါ၊ Pechora လက်နက်စနစ် စသည်ဖြင့် ဖွဲ့စည်းပုံ အပြည့်ရှိသည်ဟု စစ်ရေးသတင်းရင်းမြစ်က အတည်ပြုသည်။

တပ်စခန်းအား PDF ပူးပေါင်းတပ် စတင် ထိန်းချုပ်စဉ်က လေယာဉ်ပစ် အမြောက် ဓာတ်ပုံအချို့ လူမှုကွန်ယက်တွင် ပျံ့နှံ့ခဲ့သော်လည်း ဓာတ်ပုံ အဟောင်းများသာ ဖြစ်နေသည်။

“SA-16 SAM ပခုံးထမ်းကော ကျန်တာတွေကော ဖွဲ့စည်းပုံ အပြည့်ရှိတယ်လို့ သိရပါတယ်။ အခု ဒါတွေ စစ်တပ်ကပဲ ရဟတ်ယာဉ်နဲ့ သယ်ထုတ်သွားလား။ PDF ကပဲ ရသွားလား ဆိုတာ မသိရသေးပါဘူး။ ပခုံးထမ်း ၁၀ လက်လောက် ရရင်ကို လေကြောင်း တိုက်ခိုက်တာ တားဖို့ တော်တော်ကြီး ထိရောက်မှာဗျ” ဟု စစ်ရေးသတင်းရင်းမြစ်က ရှင်းပြသည်။

ယင်းကိစ္စနှင့် ပတ်သက်၍ စခန်းသိမ်းပိုက်စဉ် သုံ့ပန်းများ ဖမ်းဆီးရမိပြီး လက်နက်အချို့ ရရှိခဲ့ကြောင်း အသေးစိတ် မသိရသေးကြောင်း နောက်ထပ် သတင်းရင်းမြစ် တစ်ဦးက ဆိုသည်။

“အရာရှိ ၂ ဦး အသေမိတယ်။ မိသားစုတွေ အရှင် ဖမ်းဆီးရမိတာတွေ ရှိတယ်။ တပ်ရင်းမှူးကတော့ ပြေးတယ်ထင်တယ်” ဟု ၄င်းက ရှင်းပြသည်။

စစ်လော်ဘီ ချန်နယ်များတွင်မူ ဇွန်လ ၂၅ ရက်နေ့ တိုက်ပွဲ ပြင်းထန်နေစဉ် ရဟတ်ယာဉ်ဖြင့် တပ်မိသားစုများ ကယ်ထုတ်ခဲ့ကြောင်း ဖော်ပြထားရာ လက်နက်များ သယ်ထုတ်သွားသည်လား ဆိုသည်မှာ ရှင်းရှင်းလင်းလင်း မသိရသေးပေ။

အဆိုပါ ကိစ္စနှင့် ပတ်သက်၍ သက်ဆိုင်သူများကို ဆက်လက်မေးမြန်းနိုင်ရန် ကြိုးစားနေဆဲ ဖြစ်သည်။

မတ္တရာမြို့နယ် အရှေ့ခြမ်း၊ ဆည်တော်ကြီးအနီး ဇွန် ၂၅ နေ့ လေကြောင်းရန် ကာကွယ်ရေးတပ် တိုက်ပွဲ အတွင်း စစ်တပ်က လေကြောင်းတိုက်ခိုက်မှုများ ညနေပိုင်းအထိ ဆက်တိုက် ပြုလုပ်ခဲ့ပြီး လက်နက်ကြီး ပစ်ခတ်မှုများကြောင့် အနီးအနား ကျေးရွာနေ ပြည်သူများ ယနေ့အထိ ထွက်ပြေးနေရကြောင်း သိရသည်။