မန္တလေး အခြေစိုက် အလယ်ပိုင်းတိုင်း စစ်ဌာနချုပ် စစ်တိုင်းမှူး ဖြစ်သူ ဗိုလ်ချုပ်ကြည်ခိုင် ကို မင်းအောင်လှိုင်၏ နေပြည်တော် အထူးတပ်ဖွဲ့က ဖမ်းဆီးသွားကြောင်း စစ်ရေးသတင်းရင်းမြစ်က ယနေ့ (ဇွန်လ ၂၇ ရက်) တွင် ပြောသည်။
ငါးဇွန်မြို့နယ် မြို့သာရွာနှင့် ပန်းချီကမ္မရွာကြား ဖြစ်ပွားခဲ့သည့် ပဲခူး ဝင်းနိမ္မိတာရုံ ဆရာတော် ပစ်သတ်မှု ဖြစ်စဥ်နှင့် ပတ်သက်၍ ဗိုလ်ချုပ်ကြည်ခိုင် တာဝန်ရှိသည် ဆိုသည့် စွပ်စွဲချက်ဖြင့် ဖမ်းဆီးခဲ့ခြင်း ဖြစ်ကြောင်း သတင်းရင်းမြစ်က ဆိုသည်။
ယင်းသတ်ဖြတ်မှုနှင့် ပတ်သက်၍ စစ်ခေါင်းဆောင် မင်းအောင်လှိုင် ဝန်ခံ တောင်းပန်ခဲ့ရပြီးနောက် ယခုကဲ့သို့ ဖမ်းဆီးခံခဲ့ရခြင်း ဖြစ်သည်။
ပဲခူးဆရာတော် အသတ်ခံရမှု အတွင်း အသက်ရှင် ကျန်ရစ်သည့် ဆရာတော်ကို မန္တလေးနန်းတွင်း ခေါ်ယူ၍ ဗိုလ်ချုပ်ကြည်ခိုင် ကိုယ်တိုင် နာရီပေါင်းများစွာ စစ်ဆေးခဲ့ပြီး လိမ်လည် ထွက်ဆိုရန် ဖိအားပေးခဲ့သော်လည်း ဆရာတော်က အဖြစ်မှန်ကို ဖွင့်ချခဲ့သည်။
သို့သော် ဗိုလ်ချုပ်ကြည်ခိုင် သည် စစ်ခေါင်းဆောင် မင်းအောင်လှိုင်ကို ပုန်ကန်၍ တန်ပြန် အာဏာသိမ်းရန် စစ်အရာရှိဟောင်း တစ်ချို့နှင့် နန်းတွင်း၌ အစည်းအဝေးလုပ်ပြီးနောက် ဖမ်းဆီးခံခဲ့ရခြင်း ဖြစ်သည်ဟု CDM ဗိုလ်ကြီးဇင်ယော်က ပြောသည်။
“ဆရာတော်ကြီး ပစ်သတ်မှု ဖြစ်စဥ်မှာ တာဝန်အရှိဆုံးလူ၊ မန္တလေးနဲ့ ဘယ်လောက်မှ မဝေးတဲ့ မတ္တရာက လေကြောင်းရန် ကာကွယ်ရေးတပ် တိုက်ခိုက် သိမ်းပိုက်ခံထားရတယ်၊ မိုးကုတ်မြို့ကလည်း လှုပ်နေတဲ့ အချိန် ဆိုတော့ သူပြုတ်မှာက သေချာနေပြီ။ အဲတော့ လျှို့ဝှက် အစည်းအဝေးလုပ်ပြီး နေပြည်တော်ကို သိမ်းမယ် ဘာညာလုပ်လို့ အဖမ်းခံရတာ” ဟု ၎င်းက ဆိုသည်။
ယင်းလျှို့ဝှက် အစည်းအဝေး ကျင်းပပြီးနောက် နေပြည်တော်မှ မင်းအောင်လှိုင် ၏ ခါးပိုက်ဆောင် တပ်ဖွဲ့က စောင့်ဆိုင်းဖမ်းဆီးပြီး စစ်အရာရှိဟောင် တစ်ချို့ကိုပါ နေပြည်တော်သို့ ဖမ်းဆီး ခေါ်ဆောင်သွားကြောင်း ၄င်းကရှင်းပြသည်။
ဖမ်းဆီးခံရသူ ဗိုလ်ချုပ်ကြည်ခိုင် သည် မင်းအောင်လှိုင် ၏ လူယုံ တစ်ဦးဖြစ်ပြီး မကြာခဏ အစည်းအဝေးလုပ်သည့် အကျင့်ရှိသူဖြစ်ကြောင်း အငြိမ်းစား စစ်တပ် အရာရှိတစ်ဦးက ပြောသည်။
ယခု ဖမ်းဆီးခံရသည့် ကိစ္စနှင့် ပတ်သက်၍ ထပ်မံ စုံစမ်း မေးမြန်းနေဆဲ ဖြစ်သည်။
ဖမ်းဆီးခံရသည့် ဗိုလ်ချုပ်ကြည်ခိုင်သည် စစ်တ္ကသိုလ် အပတ်စဥ် (၃၇) ဖြစ်ပြီး ပြန်တမ်းဝင် အမှတ် ကြည်း (၂၇၁၄၀) ဖြစ်ကြောင်း သိရသည်။
Leave a Comments