သျှမ်းပြည် ကျောက်မဲမြို့နှင့် နောင်ချိုမြို့တို့ကို တအာင်း(ပလောင်) အမျိုးသားလွတ်မြောက်ရေး တပ်မတော် TNLA က မြို့သိမ်းတိုက်ပွဲ ဆင်နွှဲလျက်ရှိရာ ယမန်နေ့ (ဇွန်လ ၂၆ ရက်) ညပိုင်းတွင် ထိန်းချုပ်လိုက်နိုင်ကြောင်း စုံစမ်းသိရသည်။
ယမန်နေ့ (ဇွန်လ ၂၆ ရက်) နေ့လယ်ပိုင်းမှ စတင်ပြီး ကျောက်မဲမြို့အဝင်ရှိ စစ်ကောင်စီလက်အောက်ခံ ပြည်သူ့ဆေးရုံနှင့် အမြောက်တပ်-၃၅၂ တို့ကို TNLA တပ်ဖွဲ့က ထိန်းချုပ်လိုက်ပြီးနောက် မြို့ပေါ်ရှိ မြို့နယ်/ခရိုင် ရဲစခန်း၊ ထွေအုပ်ရုံး၊ မီးသတ်စခန်းနှင့် အခြားသော ဌာနဆိုင်ရာရုံးများကို ညနေ (၄) နာရီကျော်ခန့်တွင် ထပ်မံသိမ်းပိုက်လိုက်ကြောင်း ကျောက်မဲဒေသခံများက ပြောသည်။
“မနေ့က နေ့လယ်လောက်မှာ အမြောက်တပ်နဲ့ ဆေးရုံကို ရပြီးတော့ မြို့မရဲစခန်းကို ဆက်တိုက်ကြတာ။ ညနေ (၄) နာရီလောက်မှာ ရဲစခန်းလည်း ကျသွားပြီးတော့ ထွေအုပ်ရုံးတို့၊ ခရိုင်စုပေါင်းရုံးတို့ နောက်ပြီး မီးသတ်စခန်းတို့ အကုန်ရသွားတာပေါ့။ ဒီမနက် လွယ်ခွင်တောင်ဘက်က ၅၀၁/၅၀၂ တပ်နဲ့ နောင်ပိန်ဂုတ်တွင်းမှာ ထပ်ဆော်နေကြပြီ”ဟု ကျောက်မဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အလားတူ ယမန်နေ့ (ဇွန်လ ၂၆ ရက်) မွန်းလွဲ ၂ နာရီခန့်က ကျောက်မဲမြို့နယ်အတွင်း နောင်ပိန်ကျေးရွာရှိ တိုက်နယ်ဆေးရုံ၊ အထက်တန်းကျောင်းနှင့် ကျေးလက်ဆေးပေးခန်းတို့ကို TNLA တပ်သားများမှ သော့ခတ်ချိတ်ပိတ်သွားခဲ့ကြောင်း ဒေသခံများထံမှ သိရသည်။
ကျောက်မဲနှင့် နောင်ချိုမြို့ကြားရှိ နောင်ပိန်ဂုတ်တွင်း အနီးရှိ စစ်ကောင်စီတပ် စခန်းချနေရာများကို ယနေ့ (ဇွန်လ ၂၇ ရက်) နံနက် ၅ နာရီခန့်မှ စ၍ TNLA နှင့် PDF ပူးပေါင်းတပ်ဖွဲ့များက ထိုးစစ်ဆင် တိုက်ခိုက်နေပြီး လက်ရှိသတင်းရေးသားချိန်အထိ တိုက်ပွဲပြင်းထန်လျက်ရှိကြောင်း ကျောက်မဲဒေသခံများက ပြောသည်။
ထို့အပြင် နောင်ချိုမြို့ရှိ စစ်ကောင်စီလက်အောက်ခံ ခမရ-၁၁၅ တပ်ရင်း၊ ရဲစခန်း၊ ဆေးရုံနှင့် တိုးဂိတ်တို့ကို အပြည့်အဝ သိမ်းပိုက်ထိန်းချုပ်ထားနိုင်ပြီး လက်ကျန်တပ်စခန်းများ ဖြစ်သည့် ခမရ-၁၁၄ နှင့် အမြောက်တပ်-၆၀၆ တို့ကို ဆက်လက်ထိုးစစ်ဆင်နေကြောင်း TNLA နှင့်အတူ စစ်ဆင်ရေး ဖော်ဆောင်နေသည့် မန္တလေး-PDF တပ်ဖွဲ့က ယမန်နေ့ (ဇွန်လ ၂၆ ရက်)တွင် သတင်းထုတ်ပြန်သည်။
ကျောက်မဲ၊ နောင်ချို၊ မိုးမိတ်၊ မိုးကုတ်၊ သီပေါမြို့နယ်များ၌ တိုက်ပွဲဖော်ဆောင်ရာတွင် (၂) ရက်တာအတွင်း စစ်ကောင်စီတပ်စခန်း (၂၄) ခု သိမ်းပိုက်နိုင်ပြီး လက်နက်ခဲယမ်း အများအပြားနှင့် စစ်သုံ့ပန်း (၁၇) ဦး ဖမ်းဆီးရမိခဲ့ကြောင်းလည်း TNLA သတင်းနှင့် ပြန်ကြားရေးဌာန ထုတ်ပြန်ချက်တွင် ရေးသားထားသည်။
ကျောက်မဲနှင့် နောင်ချိုမြို့သိမ်းတိုက်ပွဲ (၂) ရက်တာအတွင်း စစ်ကောင်စီတပ်မှ လက်နက်ကြီး ပစ်ခတ်မှုနှင့် လေကြောင်းဗုံးကြဲ တိုက်ခိုက်မှုများကြောင့် မြို့ပေါ်ရပ်ကွက်များတွင် ကျရောက်ပေါက်ကွဲပြီး အရပ်သား (၁၀) ဦးထက်မနည်း သေဆုံးပြီး (၂၀) ဦးခန့် ထိခိုက်ဒဏ်ရာ ရရှိကြောင်း ကနဦး သတင်းရရှိထားပြီး သျှမ်းသံတော်ဆင့်မှ အသေးစိတ် ဆက်လက်စုံစမ်းနေသည်။
Leave a Comments