သျှမ်း-ကရင်နီ (ကယား) ပြည်နယ်စပ်ဒေသ ဆီဆိုင်မြို့နယ်တွင် စစ်ကောင်စီက စစ်သားနှင့် ပြည်သူ့စစ် အင်အားရာနှင့်ချီသုံးပြီး စစ်ကြောင်းထပ်ထိုးပြီးနောက် ရက်သတ္တပတ်ကြာသည့်အထိ တိုက်ပွဲဆက်ဖြစ်နေ ကြောင်း စုံစမ်းသိရသည်။

ဇွန်လ ၂၄ ရက်တွင် ဆီဆိုင်မြို့နယ် အရှေ့ဘက်ထီဆုံကျေးရွာဘက်ကို စစ်ကောင်စီက စစ်သားနှင့် ပြည်သူ့စစ်အင်အားသုံးပြီး စစ်ကြောင်းထိုးလာသဖြင့် ရွာ၏အမြောက်ဘက်အရပ်တွင် ၅ နာရီကြာ ထိတွေ့တိုက်ပွဲထပ်မံဖြစ်ပွားခဲ့သည်ဟု PNLA က ယနေ့ ဇွန်လ ၂၆ ရက်မှာ ထုတ်ပြန်ထားသည်။

“ဆီဆိုင်အခြေအနေကတော့ တိုက်ပွဲတွေဆက်လက်ဖြစ်ပွားနေဆဲ ဖြစ်ပါတယ်။ ဆီဆိုင် အနောက်ဘက်ခြမ်း၊ တောင်ဘက်ခြမ်း၊ အရှေ့ဘက်ခြမ်း၊ အရှေ့မြောက်ခြမ်း နေရာမှာတိုက်ပွဲတွေ ဖြစ်နေဆဲဖြစ်ပါတယ်” ဟု PNLA ပြန်ကြားရေးတာဝန်ခံ ခွန်ရိန်းယံက သျှမ်းသံတော်ဆင့်ကိုပြောသည်။

တိုက်ပွဲအတွင်း စစ်ကောင်စီဘက်က ထိခိုက်ကျဆုံးမှုအချို့ရှိခဲ့ပြီး၊ စစ်ကောင်စီက လက်နက်ကြီးဖြင့် ရမ်းသမ်း ပစ်ခတ်ရာ လက်နက်ကြီးကျည်အချို့ ကျေးရွာအတွင်း ကျရောက်၍ ပြည်သူလူထု၏ နေအိမ်အချို့လည်း ထိခိုက်ပျက်စီးခဲ့သည်ဟုဆိုထားသည်။

ပြီးခဲ့သည့် ဇွန်လ ၂၁ ရက်ကတည်းက စစ်ကောင်စီတပ်သည် စစ်သားနှင့် ပြည်သူ့စစ် အင်အား ၃၀၀ ခန့်ဖြင့် ဆီဆိုင်မြို့နယ် သဘကျေးရွာအုပ်စု နောင်စကာကျေးရွာဘက်သို့ စစ်ကြောင်းထိုးနေခြင်းဖြစ်သည်။

ထိုစစ်ကြောင်းထိုးနေစဉ်အတွင်း စစ်ကောင်စီတပ်နှင့် PNLA တို့ထိတွေ့တိုက်ပွဲခဲ့သည်ဟု PNLA ကထုတ်ပြန်ထားသည်။

စစ်ကောင်စီက လက်နက်ကြီး၊ ဒရုန်းများဖြင့် ဗုံးကြဲတိုက်ခိုက်ခြင်းကြောင့် သဘက်ချောင်းအနီးရှိ ကျေးရွာမှ ပြည်သူများ ရွာလုံးကျွတ်ထွက်ပြေးတိမ်းရှောင်နေရလျက်ရှိကြောင်း သိရသည်။

စစ်ကောင်စီနှင့် ပြည်သူ့စစ် PNO တို့သည် ဆီဆိုင်မြို့နယ် စစ်ကြောင်းထိုးပြီး လက်နက်ကိုင် တော်လှန်ရေး အင်းအားစုနှင့် ထိတွေ့တိုက်ပွဲဖြစ်ပွားနေသော်လည်း ကျေးရွာတွင်မှု ဒေသခံများကို အခြေခံစစ်ပညာသင်တန်း ပေးနေလျက်ရှိကြောင်း သိရသည်။

ရပ်ရွာဒေသတည်ငြိမ် အေးချမ်းရေးအတွက်ဆိုကာ အခြေခံစစ်ပညာသင်တန်း အမှတ် (၁) ကို ဖွင့်လှစ်သင်ကြားပေးနေကြောင်း၊ အမှတ် (၁) သင်တန်းအတွင်း သင်တန်းသား (၈၀) ကျော် တက်ရောက်ခဲ့ကြောင်း ပြည်သူ့စစ် PNO က ဇွန်လ ၂၁ ရက်၌ ထုတ်ပြန်ထားသည်။

ထို့အပြင် ဇွန်လ ၂၀ ရက်က ဆီဆိုင်မြို့နယ် လွယ်ထွဲကျေးရွာသို့ ပုံမှန်ဈေးလာရောင်းချနေသည့် ညောင်ရွှေမြို့နယ် ကျားတွန်ကျေးရွာမှ လူငယ် ၂ ဦးကိုလည်း စစ်ကောင်စီနှင့် ပြည့်သူ့စစ်က ဖမ်းဆီးသတ်ခဲ့သည်ဟု PNLA ကထုတ်ပြန်ထားသည်။